इब्रानियो 2 - बारेली पावरी

छुटकारान उपेक्षान खिलाप

¹ इना वजेसी जुवे कि आमु तीनु वातो पोर जो आमु सोमवला छे, ओवी बी मोन लागाळू, ओसो नी होये कि वोयीन तिनासी नांबे जात रोये.

² काहाकि ओगर चो वचन जो सोरग दूतोन लारे कोवायलो होतो, जेतार चू वातळू रोयू एने हर एक गुणा एने आग्या नी माननेन ठीक-ठीक फोव जोळ्यो.

³ ती आमु महान छुटकारान निश्‍चिन्त रोयीन कोसा वाचसू? एने जेरी चर्चा आखान पेहेले प्रभून लारे होई, एने तेरी वाते सोमवने वावान लारे आमु काजे खातरी होई.

⁴ एने तिना रितीसी परमेश्वर बी तेरी मोर्जीन लारे चिन्ह चमत्कार एने भाती भातीन मोटला कामे एने पवित्र आत्मान वरदानोन वाटनेन लारे तेरी गोवायी आप्यू.

⁵ चू तिना आवने वावा जोगो काजे जेरी वाते आमु कोरता होता, सोरग दूतोन हातोमा नी कोऱ्या.

⁶ बाकीन काहनुस का यो गोवायी आप्यू, “माणूस काय छे कि तू तेरो फोम कोरे? ओगर माणसोन पुऱ्यु काय छे कि तू तेरी चिंता कोरतेलू?”

⁷ तू तीना सोरोग दूतो सी थुलोक कोम कोऱ्यु; तू तीना पोर महिमा एने आदरोन मुकुट मेक्यू, एने आपना हातोन कामो पोर होक आपलु छे.

⁸ तू आखो काहीन तेरे पायो तोवे कोर देदलु छे.

⁹ बाकीन आमु तीना काजे मतलब येसु काजे जू थुलाक टेमोन कोरीन सोरग दूतो सी कोम कोराय गोयू, मोरोनोन दुख हाकेलनेन कोरीन महिमा एने आदरोन मुकुट पेहेरलु देखला, काहाकि परमेश्वरोन मोंगसी चू आखान मोरोनोन चव चाखे.

¹⁰ काहाकि जिनान कोरता आखो काहीन छे एने तिनान लारे आखो काहीन छे तिनान यो वारू लाग्यो कि जेतार चू घोणा सोवटा पुऱ्या काजे महिमामा पुगाळे ती तिंदरू छुटकारू आपनेवावा काजे दुख हाकलनेन लारे पुरो कोरे.

¹¹ काहाकि चुखलो कोरणे वावू एने पवित्र होयने वावू आखा एकुत मा गोथो छे, इनान कोरता तीनुक भाश कोयने नी लाजवायतू.

¹² चू कोयतलु, “मे मारा भाशोमा तारा नावोन प्रचार कोरिस; आखान इचमा मे तारा नावोन स्तुती गावीस.”

¹³ एने ओवी, “मे तीना पोर आपनु भुरसू मेकीस” एने ओवी यो बी “देख, मे पुऱ्या जीनुक जो परमेश्वर मेसे काजे आपलु छे.”

¹⁴ आखरी; जिना रितीसी पुऱ्या मास एने लुयोन सहभागीता छे, ती चू खुद बी तीना रितीसी सहभागी होय गोयू, कि मोरोनोन लारे तीनाक मोरने पोर ताकत जोळी मतलब भुतडा काजे रिकामो कोर देये.

¹⁵ एने जोतरा जो मोरोनोन बिकोन मारे पुरी जीवाय गुलाम गिरीमा फोस गोयला होता, तीनुक छुळाव लेये.

¹⁶ काहाकि चू सोरग दूतो काजे नि बाकीन अब्राहामन पिढी काजे सोमवतलु.

¹⁷ इना वजेसी तीनुन जुवतो होतो, कि आखा वातोमा तुमरा भाशो सारखो बोनु जीनासी चू परमेश्वर सी नात बोनावे, एक दयावू एने भुरसान लायक महायाजक बोने ताकी माणसोन पापोन कोरता पोसतावू कोरे.

¹⁸ काहाकि जेतार चू पारखोन हाळ दुख हाकल्यू, ती चू तिंदरी बी मदत कोर सोकतलु जिंदरी पारख होयतेली छे.