इब्रानियो 13 - बारेली पावरी

स्वीकारनेन लायक सेवा

¹ भाशो भाशोन मोंग बोनलो रोये.

² पाहांतराय आड कोरने मा वीसरु काहाकि इनान लारे काहनास माणसे ओनजानलामा सोरग दूतोन आदर कोरला छे.

³ बंधनमा जेलमा छे तिंदरी फोम कोरु जोसा तुमु बी तिंदरे साते जेलमा छे, एने तिंदरा विचार कोरु जिंदरे साते दुय कावार कोरे काहाकि तुमरो बी डील छे.

⁴ वियाव आखामा आदरोन वात सोमजनु जुवे, वियाव-आथरून निरदोष रोये, काहाकि परमेश्वर व्यभिचार कोरणे वावान एने दिसरा बायरा साते ओसो कोरणे वावान नियाव कोरसे.

⁵ तुमरा स्वभाव बिना पोयशान लालचोन रोये, एने जो तुमरे जू से, तिनामा खुश रोयजी; काहाकि येसु खुद कोयलु छे, “मे तुसेक कोदि नि छुळो, एने कबी नि नाखो”.

⁶ इनान कोरता आमु हिंमतसी कोयजे, “प्रभू मारू सहायु छे मे नी बिहो माणसे मारो काय कोर सोकसे?

⁷ जा तुमरा डाहला होता, एने जे तुमु काजे परमेश्वरोन वचन सोमवाळला से, तिंदरी फोम कोरु; एने ध्यानसी तिंदरी चाल-चलनोन नाश देखीन तिंदरा भुरसान चाल चालू.”

⁸ येसु मसिह काल ने आज कायम एक सारखु छे.

⁹ भाती भातीन भुंडली शिक्षा सी घाबरायता झुनी काहाकि मोनोन मोंगसी मजबूत रोयनो वारू छे नी कि चोळावलो खाणो चीजोसी जीनु काजे तेरेसी काहीन लाभ नी होयो तीनुसी छेटा रोयु.

¹⁰ आपनी एक ओसी वेदी छे जां गोथी तंबून सेवा कोरणे वावा काजे खाणेन काहीन होक नी होय.

¹¹ काहाकि महायाजक जोनावरोन लुय पापबलिन कोरता चुखला शास्त्रामा लीन जातलु, तिंदरो डील साहवान बारथे दुख झेल्यू.

¹² इनान कोरता येसु बी माणसो काजे आपना लुयोन लारे चुखलो कोरणेन कोरता सोहोरोम झोपलान बारथे दुख झेल्यू.

¹³ इनान कोरता बुराई आपने उपोर लीन साहवान बारथे तीनानचा निकवी गोया.

¹⁴ काहाकि न्या आपनो काहीन स्थाइक देस नी होय बाकीन आपु तिना देसोन हेरमा छे, जो आपने वावो छे.

¹⁵ आखरी, आपु येसुन लारे स्तुतीन बलिदान परमेश्वर काजे हमेशा चोळाव्या कोरे मतलब तिना छुटोन फोव जो तीना नावो काजे स्वीकारला.

¹⁶ भोलाई कोरनो एने मोंता देखाळने मा वीसरु काहाकि ओसला बलिदानोसी परमेश्वर खुश होय जातलु छे.

प्रार्थनान विनता

¹⁷ आपना अगवान आग्या माणू एने तेरे साते रोयू काहाकि ओसला चे तुमरा जीवन काजे देखीन पूस-पास कोरतेला छे, कि तीनु काजे तिंदरू हिसाब आपनो छे, तीनु काजे यो काम खुशीमा कोरणे देवू नी कि असा निकवता जायीन, काहाकि इनासी तुमु काजे काहीन फायदु नी होये.

¹⁸ आमरेन कोरीन प्रार्थना कोरता रोयू काहाकि आमु काजे मालूम छे कि आमरो विवेक चुखो रोयो आमु आखी वातोमा वारली चाल चालनेन मोर्जी कोरता छे.

¹⁹ मे विनता कोरो कि तुमु एने बी जादा ओसोत कोऱ्या कोरु कि मे तुमरेनचा पोसू छाटू आव सोके.

आशिष

²⁰ हिमी शांती दाता परमेश्वर, जू गाडरान महान राखवाव आपना प्रभू येसु काजे ओमोरकाईन वायदान कोरता लुयोन लारे मोरलामा गोथू जीवतु कोर देदु.

²¹ तुमरा आखा वारला गुणोसी पुरो कोरे, जीनासी तुमु तेरी मोर्जी पुरी कोरु, एने जो काहीन तेरी नोजोरमा मोंगावू छे चू येसु मसिहन लारे आमरे महाय पुरा कोरे, तेरीत महिमा कायम होयती रोये. आमेन.

²² हे भाशो मे तुमु काजे विनता कोरो कि इना प्रचारोन वचन काजे धीर धोरीन सोमवी लेयू, काहाकि मे तुमु काजे कोम लिखलू छे.

²³ तुमु काजे यो ध्यान रोये कि आपनु भाश तीमथी काजे छुळ देदला छे अगर चू छाटू आव लाग्यू तीबी तेरे साते आवीन तुमु काजे मेवीस.

²⁴ आपना आखा अगवा एने आखा चुखला माणसो काजे नमस्कार कोरजू, इटलीन वासी तुमु काजे नमस्कार कोर रोया.

²⁵ तुमरे आखापोर दया होयती रोये, आमेन.