इब्रानियो 11 - बारेली पावरी

भुरसान हिरो

¹ हिमी भुरसू ते आस कोरला चीजोन खातरी एने नी देखायने वावी चीजोन सोबूत छे.

² इना बारामा जूनला वारान माणसोन वारली गोवायी आपायली छे.

³ भुरसासी आपनुक मालूम पोळे कि आखी धोरती परमेश्वरोन वचनोन लारे बोनावली छे, बाकीन यो नि कि काहीन देखणेमा आवलो, चो देखायने वावी चीजोसी बोनावलो होसे.

⁴ भुरसासी हाबिल केन गोथो वारलो बलिदान परमेश्वर काजे चोळाव्यू, जिनान लारे तेरो धोरमी होयनेन गोवायी आपायी, एने परमेश्वर तेरो भेटोन बारामा गोवायी आप्यू. हिमी ते हाबिल मोर गोयलु छे ते बी भुरसान लारे हिमी तोक बुल रोयू.

⁵ भुरसासी हनोख उपोर चुटाय गोयू चू मोरोन काजे नि देख्यू, तेरो पोतू नी लाग्यू काहाकि परमेश्वर तीना काजे चूट लेदलु होतु, तेरे चुटाय जाणेन पेहेल तेरी जी गोवायी आपायली होती कि चूटनेन पेहेले चू परमेश्वर काजे मोंगावू होतु.

⁶ भुरसू बिना तेरे खुश कोरनो, नि होयने वावा सारको छे, काहाकि जू कुदु परमेश्वरोनचा आवतेलु तिनान कोरता यु भुरसू कोरणेन जादा गोरोज छे कि चू छे, एने तीनाक हेरने वावा काजे प्रतीफोव आपतलु.

⁷ भुरसासी नोहा तिनी वातोन बारामा जो तिने टेम तोक देखायती नी होती चेतावनी लीन बिकोसी आपना परिवारोक वाचाडनेन कोरता ढोंड्या बोनाव्यू इना रितीसी चू जोगो काजे गुवाव्यू ठेराव्यू एने तिना धारमिकतान होकदार बोन्यू जू भुरसान अनसारे छे.

⁸ भुरसासी अब्राहाम जेतार बुलवाय गोयू ती आग्या मानीन ओसली जागे जात रोयू जो तीना काजे होकदारसी जोळने वावो होतो तीना काजे नी मालूम होतो कि मे कां जाणे बाज रोयू, ते बी जात रोयू.

⁹ भुरसासी चू वायदान देसमा परदेशी बोनीन रोयू मतलब परदेसमा इसाहाक एने याकुब साते जे तेरे सारखा वायदान वरदान होता, मंडप मा रोयू.

¹⁰ चू तिनी पायु घालला देसोन वाट जुव रोयू होतु जीना काजे बोनावने वावू परमेश्वर छे.

¹¹ भुरसासी सारा डायी होय जाणे पोर भी भारपाये रोयनेन ताकत लेदी काहाकि ची वायदू कोरणे वावा काजे भुरसान लायक सोमजी.

¹² इना वोजेसी एकुत माणसोसी जू मोरलू होतु सोरगोन तारा एने दोरीयान धोळे वावी रेवती सारखो घोणा सोवटा पुऱ्या पोयदा होया.

¹³ यो आखो भुरसान बारामा मोऱ्या चे वायदू कोरला चीजो काजे नी लेदा, बाकीन तीनु काजे नांबेत गोथो देखीन तिंदरो अभिवादन कोऱ्या, एने मान लेदा कि आमु धोरती पोर पोरदेशी एने पारका छे.

¹⁴ जे ओसला वाते कोयतेला चे यो पुरो कोर देतला छे कि चे तिंदरा देसोन हेरेमा छे.

¹⁵ अगर चे तिना देसोन बारामा विचार कोरता ती जीनामा गोथा चे निकवला होता तीनु काजे पोछु फिर जाणेन मोकू होतु.

¹⁶ बाकीन चे एक वरदान मतलब सोरगोन परमेश्वरोन लालच छे, इनान कोरता परमेश्वर तिंदरू परमेश्वर कोवायनेन नी लाजवायतू काहाकि चू तिंदरेन कोरता एक देस तीयार कोरलु छे.

¹⁷ भुरसासी अब्राहाम पारखाय जाणेन टेमे इसाहाक काजे वेदी पोर चोळाव्यू मतलब जीना काजे वायदू आपलु होतु चू तेरा पुऱ्या काजे बलि चोळावने वावू होतु.

¹⁸ एने जीनासी यो कोवायलो होतो “इसाहाकसी तारो पिढी कोवायसे”, चू तेरा एकलौता काजे बली चोळावने बाज गोयू.

¹⁹ चू यो मान लेदू कि परमेश्वर टाकत वावु छे कि तीनाक मोरलामा गोथू जीवाळे, इना रितीसी तिन गोथू दाखलान रितीसी चू तीनुक जुळ्यु.

²⁰ भुरसासी इसाहाक याकुब एने एसाव काजे भविष्यमा होयने वावी वातोन बारामा आशिष आप्यू.

²¹ भुरसासी याकुब तेरे मोरणेन टेमे युसूफोन आखा पुऱ्या काजे आशिष आप्यू एने आपना लाकळीन सिगान साहरू परमेश्वरोक नोमोन कोऱ्यु.

²² भुरसासी युसूफ आपने मोरणेन टेमे इस्राईलोन पुऱ्या काजे निकवीन जाणेन वाते कोऱ्यु एने तेरे बारामा हुकुम आप्यू.

²³ भुरसासी मुसा काजे जेतार चू पोयदा होयू, तेरा आसी बासा तीन मोहिना तोक डुकाळीन मेक्या, काहाकि चे देख्या कि पुऱ्यु घाटावू छे एने चे राजान आग्यासी नी बिह्या.

²⁴ भुरसासी मुसा मोटू होय जाणे पोर फारोन बेटीन पुऱ्यु कोवाळनेन नी मान्यु.

²⁵ चू पापोन थुलिक वारोमा सुख कोरणे पेक्षा परमेश्वरोन माणसोन साते दुख झेलणे वारू सोमज्यू.

²⁶ चू मसिहन वजेसी बुराई होयनेमा मिसरदेशोन धोनोन भोंडार गोथू महान सोमज्यू काहाकि चो प्रतीफोव जोळनेन आस लागलु होतु.

²⁷ भुरसासी चू राजान रीससी नी बिह्तु जायीन मिसर देस काजे छुळ देदु, काहाकि चू नी देखला काजे जोसो देखला सारकू पाकु बोनीन रोयू.

²⁸ भुरसासी चू वोलांडोन तीहीवार एने लुय छिळकनेन रिती काजे मान्यु जीनासी चू पेहेलेन नाश कोऱ्यु तीना काजे हात नी लागाळनु जुवे.

²⁹ भुरसासी चे रातला दोरीयामा गोथा ओसा पोरले धोळे जात रोया माणू सुकले जागा पोर चालीन गोयला होसे एने जेतार मिसरी वावा बी तोसा कोरणे गोया ती चे डूबीन मोर गोया.

³⁰ भुरसासी यरीहोन सोहोरोन भीतडा बी पोळ गोया, जेतार चे सात दाहळे तेरे धोळे फिरता रोया.

³¹ भुरसासी राहाब वेश्या बी, आग्या नि मानने वावा साते नाश नी होई, काहाकि ची एखलामा हेरे वावा काजे सोमावीन मेकली होती.

³² इनासी आवी जादा काय कोयो? काहाकि टेम नी होयली कि मे गिदोन, बाराक, शमशोन, इप्ताहाक, दाऊद, शमुवेल, एने भविष्य कोरता वाते कोय.

³³ जे भुरसासी राज जीक्या धारमिकतान कामे कोऱ्या वायदू कोरलान चीजे ली लेदा कि नाहारोन मूय बोंद कोऱ्या.

³⁴ आगठीन आच काजे हुगरायदेदा, तलवारोन धारसी वाच गोया कोमजूरी ताकत वावा कोराय गोया, लोळाय जीकीन देखाळया, विदेशी सेना काजे ठूकिन दोवळाव देदा.

³⁵ बायरा पोछा जीव उठनेन लारे आपला मोरला काजे पोछा जीवतला देख्या, काहनास काजे तोकलीत आप्या बाकीन चे छुटकारू नी मांग्या जीनासी कि एक वारला पोछोव जीव उठने काजे ली लेये.

³⁶ घोणा सोवटा माणसे मजाकमा उळावने, चाबका खाणे एने बंधनमा जेलमा रोयनेन लारे पारखाय गोया.

³⁷ तीनु पोर दोगळा देदा एने कुदा काजे चीरीन दुय तुकडा कोर देदा तिंदरी परीक्षा लेदा तलवारोन कोरीन मार नाख्या चे गोरीबोमा तोकलीत एने दुख झेलता जायीन बुल गाडरा एने बुकळान खाल पेहऱ्या न्या ने वा भोटोकता फिऱ्या.

³⁸ जोग तिंदरे लायक नी होतो चे रेगीस्थान बोयळा बीळामा एने धोरतीन दोरोमा डूकायता फिऱ्या.

³⁹ हिमी तोक भुरसान वजेसी इंदरी आखान वारली गोवायी आपाय ते बी चे वायदू कोरली चीजो काजे नी लेदा.

⁴⁰ काहाकि परमेश्वर आमरेन कोरता पेहेले गोथू एक वारली वात ठेरावलु होतु कि चे वायदू कोरली चीजो काजे नी लेदा.