इब्रानियो 10 - बारेली पावरी

जानवरोन बलिदान अपरीयाप

¹ शास्त्रनियम ते वारली चीजोन स्वरूप नि होय, बाकीन साहवू छे, आमरी माणसोन लारे हमेशा होर साल चोळाव जाणे वावा बलिदान साते आवने वावा काजे चू कोबी मजबूत नी कोर सोकतलो.

² नीती तिंदरो चोळावनेन बोंद काहा नी होय जातो? सेवा कोरणे वावा ते एकुत कावा चुखा होय जातला एने तिंदरा विचारे तीनु काजे एने पापी नी ठेरावतलो.

³ इनासी ओगोव तीना बलिदानोन लारे होर साल पापोन फोम कोरतेला.

⁴ काहाकि यो नि होयने वावो छे कि बुले एने बुकळान लुय पापो काजे छेटा कोरे.

येसु मसिहन बलिदान पर्याप्त

⁵ इना वजेसी मसिह जोगोमा आवनेन टेमे कोयतेला कि, “तू बलिदान एने भेट काजे नी मांग्यू बाकीन तू मारेन कोरता एक डील तीयार कोरलु छे.

⁶ तू होमबलि एने पाप बलिसी खुश नी होयू.”

⁷ तेत्यार मे कोयू “देख मे आव लागलु छे, शास्त्रनियममा मारे बारामा योत लिखलो छे, हे परमेश्वर, मे तारी मोर्जी पुरी कोरो.”

⁸ उपोर ते चू कोये, “तू बोलीदान एने भेट होमबलि एने पापबलि नी मांग्यू एने नी तीनुसी खुश होयू,” अगर यो बलिदान नियम शास्त्रान अनसारे चोळावे.

⁹ तेत्यार चू कोयू “देख मे आव लागलु छे कि तारी मोर्जी पुरी कोरो, चू पेहेला काजे छेटू कोर देतलु कि दिसरा काजे उबराखे.

¹⁰ इना मोर्जीन लारे येसु मसिहन डीलोन एकुत कावा हमेशान कोरता बलिदान चोळाव जाणेसी आपु चुखला कोराय गोयला छे.”

¹¹ आखा पुजारू दाहळीन उबरोयीन सेवा कोरे, एने एकुत भातीन बलिदान जो पापो काजे कोबी बी छेटू नि कोर सोकतू होतु, घोळी-घोळी चोळावता होता.

¹² बाकीन जे पुजारू ते पापीन बोदले हमेशान कोरता एकुत बलिदान चोळावीन परमेश्वरोन जेवळे धोळे जायीन बोश्यू.

¹³ एने तिने टेमे गोथी वाट जुव रोयू कि तेरा दुष्मोन तेरा पायोन नेचली पिढी बोन जाय.

¹⁴ काहाकि चू एकुत बलिदानोन लारे जे चुखला कोराय जातला हमेशान कोरता पाको कोर देतलु छे.

¹⁵ एने पवित्र आत्मासी आपनु काजे गोवायी आपतलु छे; काहाकि यो कोयनेन ओवतेन,

¹⁶ प्रभू कोये कि जू वायदू मे तीने दाहळान ओवतेन जू वायदू तिंदरे साते बांदिस ची जी छे कि मारा नियम तिंदरा हातोमा नाखीस एने तिंदरा मोनोमा लिखीस, चू ओगु कोये.

¹⁷ मे तिंदरा पापे एने तिंदरा अधोरमोन कामो काजे पोछु फोम नी कोरो.

¹⁸ हिमी जा हिंदरी माफी होय गोयी चा पापोन कोरता काहीन बलिदान बाकी नी रोयी.

हिंमत राखीन परमेश्वरोनचा पुगनो

¹⁹ इनान कोरता हे भाशो, जेतार आपुक येसुन लुयोन लारे एक नोवला एने जीवतली वाटसी मंदीरमा भोरायनेन हिंमत आव लागली छे.

²⁰ जी चू पोडदु मतलब आपना डीलोन लारे आपनेन कोरता उगाळ देदलु छे.

²¹ एने जेतार कि आपना एक ओसलु महान पुजारू छे जू परमेश्वरोन घोरोन अधिकारी छे.

²² ती आवू आपु खोरला मोनोसी एने पुरा भुरसू साते एने विचारो काजे छेटा कोरणेन मोनोपोर पोर तेळा लीन, एने डीलो काजे चुखला पाणीसी धुवीन परमेश्वर साते आवू.

²³ आवू आपु आपनी आसोन अंगीकार काजे पाका बोनीन हिंमतसी धोर रोयू काहाकि जू वायदू कोऱ्यु कि चू खोरलो छे.

²⁴ एने ध्यान लागाळू कि काहना भातीन मोंग एने वारला कामोन एक दिसरा काजे उत्साहित कोर सोकतला.

²⁵ एने एक दिसरा साते एखठा होयने मा छुळू, जोसो कि कोतरा जोनान रिती छे, बाकीन एक दिसरा काजे प्रोत्साहित कोरता रोयजू, एने तिना दाहळा काजे साते आवला देखीन एने तेतार-तेतार एने बी जादा इना वातो काजे कोऱ्या कोरु.

²⁶ अगर खोरलान उवखान हासील कोरनेन बादमा बी आपु जानीन पाप कोरे ती पापोन कोरता कानलो बलिदान नी होय.

²⁷ बाकीन शिक्षान भयानक वाट एने आगठो तीयार छे जो दुष्मोन काजे धोपाळ देसे.

²⁸ जू कुदु मुसान शास्त्रनियम काजे नी माने चू दुय नीती तीन माणसोन गोवायी पोर बिना दयान मार नाखला.

²⁹ ती तुमु विचार कोरु कि चू माणूस एने बी कोतरा मुशकीलोन दोंडोन भागीदार होयसे, जू परमेश्वरोन पुऱ्या काजे पाये कोरीन रोंदव्या एने वायदान लुय काजे जिनान लारे चू चुखला ठेराय गोयू, अपवित्र सोमव्या एने दयान आत्मान अपमान कोऱ्या.

³⁰ काहाकि आमु तीना काजे उवेखतला, जू कोयू “बोदलु लेणे मारो काम छे, बोदलु मेत आपीस एने ओवी यो प्रभू तेरा माणसोन नियाव कोरसे.”

³¹ जीवतला परमेश्वरोन हातोमा पोळनो मुशकीलोन वात छे.

³² बाकीन तीनु दाहळान फोम कोऱ्यु जेतार तुमु विजावो लेनेन ओवतेन खुदो तोकलीतमा पाका उबरोयला होता.

³³ कोबी-कोबी ते तुमु बुराई एने दुखोन लारे माणसोन ओगोव तमाशा बोन्या एने कोबी ते तुमु तिंदरे साते भागीदार बोन्या जिंदरी हाल कोरतला छे.

³⁴ काहाकि तुमु बंदी इंदरे साते मोंग देखाळ्या एने आपनी मालमत्ता काजे कोबजामा कोर लेनेन यो सोमजीन खुद कोबूल कोऱ्या कि तुमरे जुव ओवी बी ज्यादा खुशी कोर लेनेन यो सोमजीन खुद कोबूल कोऱ्या कि तुमरे जुव एने बी जादा वारली एने टीकनेवावी संपत्ती छे.

³⁵ इनान कोरता आपनु भुरसू मा छुळू जेरो महान प्रतीफोव छे.

³⁶ काहाकि तुमु काजे धीर धोरणो गोरोजोन छे, कि तुमु परमेश्वरोन मोर्जी पुरो कोरीन इनी वायदान फोव काजे ली लेय.

³⁷ काहाकि हिमी थुलिक वारमा आवने वावू, आवसे एने वार नी लागाळे.

³⁸ मारू धोरमी जन भुरसामा जीवतलु रोयसे बाकीन चे अगर पोछा फिर गोया, ती मारा मोनो काजे खुशी नी लागे.

³⁹ बाकीन आमु छेटा होयने वावा नि होय कि आमु नाश होय जाय, बाकीन भुरसू कोरणे वावा छे कि जीव काजे वाचाळे.