इब्रानियो 1 - बारेली पावरी

पुऱ्यान स्वभाव

¹ पेहेला युगमा परमेश्वर डाहा-डाहा सी थुलो-थुलो कोरीन एने अलग-अलग भविष्य कोरतान लारे वाते कोरीन.

² इना आखरी दाहळामा आमु काजे आपना पुऱ्यान लारे वात कोरलु छे, जिना काजे चू आखा चीजोन वारीस ठोराव्यू, एने तिनान लारे चू, आखा संसारोक बोनाव्यू.

³ चू तेरी महिमान विजावो एने परमेश्वरोन रुपोन प्रतिरूप छे, एने आखा चीजो काजे हेरो ताकतोन वचनोन लारे सोमावतेलु छे, चू पापो काजे धुवीन उचला जागा पोर महामहीमोन जेवळे धोळे बोस रोयू.

⁴ एने सोरग दूतो सी तोतरुत मोटू ठेऱ्यू, जोतरू चू तिंदरे गोथा मोटो पोदन वारीस होयीन मोटो नाव हासील कोर लेदू.

येसु सोरग दुतोसी मोटू

⁵ काहाकि चू सोरग दूतोमा गोथू परमेश्वर केतार कुनीसी कोयू, “तू मारू पुऱ्यु छे, आज मे तुसे काजे पोयदा कोरलु छे” एने ओवतेन चू यो, “मे तेरु बास होयीस, एने चू मारू पुऱ्यु होयसे.”

⁶ एने जेतार चू पेहेला काजे जोगोमा पोछु लावे ती, कोये, “परमेश्वरोन आखा सोरग दूत तीनाक नोमोन कोरे.”

⁷ एने सोरग दूतोन बारामा यो कोये, “चू आपना दूतो काजे वाहावू एने आपना सेवक काजे होवो-होवो आगठो बोनावतलू छे.”

⁸ बाकीन पुऱ्यान बारामा चू कोये “हे परमेश्वर, तारो सिहासन कायमोन छे एने तारा राज दंडन नियाव राज दोंड छे.”

⁹ तू धर्म सी मोंग एने अधोरम साते दुष्मोनी कोरतेलू छे, इना वोजेसी परमेश्वर, तारू परमेश्वर तारा सातीदारो सी बी बोडीन खुशीन तेलोसी ज्यादा अभिषेक कोरलु छे.

¹⁰ एने, “हे प्रभू पेहेले तुत धोरतीन पायु घाल्यू एने सोरग तारात हातोन कारागीरी छे.”

¹¹ चे ते नाश होय जासे, बाकीन तू बोनलु रोयसे, एने चे आखा छिंदरा सारखा जुना होय जासे.

¹² एने तू तीनुक चादरान तोसो गुंडावीस एने चे छिंदरा तोसा बोदली बी जासे बाकीन तू चू से एने तारा सालोन नाश नि होये.

¹³ बाकीन सोरग दूतोमा गोथू चू कुणी काजे केतार कोयू, “तू मारे जेवळे धोळे बोठ, जेतार तोक मे तारा दुष्मोनो काजे तारा पायोन नेचली पिढी नि कोर दोम.”

¹⁴ काय चे आखान सेवा चाकरी कोरणे वावी आत्मा नि होय? जे छुटकारू लेनेवावान कोरता सेवा कोरणेन कोरता मुकलाय गोयला छे.