गलातियों 6 - बारेली पावरी

आखा साते भोलाई कोरु

¹ हे भाशो अगर कुदु माणूस काहना गुणामा धोराय बी जाय ती तुमु जे आत्मिक छे, नम्रता पुठी ओसला काजे सोमावू, एने खुद बी हुशारीमा रोयू कि तुमु बी परीक्षामा नी पोळे.

² तुमु एक दिसरान भार हाकलु एने इना रितीसी मसिहन नियम शास्त्र काजे पुरा कोरु.

³ काहाकि ओगर कुदू काहीन बी नी होयने पोर बी खुदो काजे काहीन सोमजतलु छे, ती खुदो काजे धोकू देतलु छे.

⁴ पुन हर जोना आपनात कामो काजे पारखतला, एने तेत्यार दिसरान बारामा नी बाकीन आपनात बारामा तीनु काजे घोमंड कोरणेन टेम होयसे.

⁵ काहाकि हर जोना आपनूत भार हाकलसे.

जीवन, खेतोमा वेरनो तोसो छे

⁶ जीनाक वचनोन शिक्षा जोळतली चू आखा वारला चीजोमा भोनावने वावा काजे भागीदार कोरे.

⁷ धोकू मा खावू; परमेश्वर मोजाकमा नी उळावाय जातलो, काहाकि माणूस जो काय वेरतलु चोत काटसे.

⁸ काहाकि जू आपना डीलोन कोरता वेरतलु, चू डीलोन लारे विनाशोन काटनी कोरसे एने जू आत्मान कोरता वेरतलु, चू आत्मान लारे ओमोरकाईन जीवनोन काटनी काटसे.

⁹ आमु वारला कामे कोरणेन धीर नी छुळे, काहाकि ओगर आमु ढिला नी होयजे ती टेमो पोर काटनी काटसु.

¹⁰ इनान कोरता जा तोक टेम जोळे, आपनु आखा पुठी वारू कोरु, खास कोरीन भाशो साते.

आखरी चेतावनी एने सुभेच्छा

¹¹ देखू, मे कोसा मोटा-मोटा शब्दामा तुमु काजे मारे हातोसी लिखलू छे.

¹² जे माणसे डीलोन दिखावू कोरणेन कोरतेला, चेत तुमरी सुंता कोरणे वावान कोरता दबाव नाखतला, निस्ता इनान कोरता कि चे मसिह काजे ख्रुसोन वोजेसी वेला नी पाळावे.

¹³ काहाकि सुंता कोरणे वावा खुद ते नियमोपोर नि चालतला पुन तुमरी सुंता एरेन कोरता कोरणे हेरतेला कि तुमरो डीलोन हालत पोरसी घोमंड कोरे.

¹⁴ बाकीन ओसो नी होयो दिसरा काहना वातोन मोटाय कोरे, निस्त आपनु प्रभू येसुन मसिहन ख्रूसोपोर जिनान लारे जोग मारा नोजोरमा एने मे जोगोन नोजोरमा ख्रुस पोर चाळाय गोयलु छे.

¹⁵ काहाकि सुंता एने नी सुंता होयला काहीन छे, बाकीन नोवली कोव.

¹⁶ जोतरा इना नियमोपोर चालसे तिंदरे पोर, एने परमेश्वरोन इस्राईल पोर शांती एने दया होयती रोये.

¹⁷ ओगोव कुदू मेसेक दुख घोन आपता, काहाकि मे येसुन डागो काजे आपना डीलमा लीन फिरतलु.

¹⁸ हे भाशो, आपनु प्रभू येसु मसिहन दया तुमरो आत्मा पुठी रोये. आमेन.