गलातियों 5 - बारेली पावरी

येसु मसिही मा आजादी

¹ मसिह आजादोन कोरता आपु काजे आजाद कोरलु छे हिमी तोक इनामा पाका रोयू, एने गुलामोन हातोमा ओवी पोसा मा जावू.

² देखू मे पौलुस तुमु काजे कोयो कि ओगर सुंता कोरसु ती मसिहसी तुमु काजे काय नी लाभ होये.

³ ते बि मे होर एक सुंता कोरणे वावा काजे जोताळो कि तिना काजे आखो नियम माननो पोळसे.

⁴ तुमु जे शास्त्र नियमन लारे धोरमी बोननेन कोरतेला छे, मसिहसी ओलोग एने मोंगसी पोळ गोयला छे.

⁵ काहाकि आत्मान लारे आपनु भुरसासी, आस कोरली धारमिकतान वाट जुवतला छे.

⁶ मसिह येसुमा संता वावा एने नी सुंता कोरला काय कामोन नी होय, बाकीन निसतू भुरसू, जू मोंगोन लारे प्रभाव पाळतलु.

मोंगोन लारे नियम शास्र पुरो होयनो

⁷ तुमु ते वारला रितीसी दोवोळता होता. हिमी तुमु काजे कुन रुक देदू कि खोरला काजे मा माणू.

⁸ ओसली सिकाय तुमुक बुलावने वावानचा गोथो नी होय.

⁹ थुलोक खमीर आखा कुसोनला पीठा काजे खमीर बोनाव देतलो छे.

¹⁰ मे परमेश्वर पोर तुमरा भुरसामा भुरसू मेकतलु कि तुमरु काहीन दिसरू विचार नी रोये; बाकीन जे तुमु काजे बिहाळतला छे, चू कुदू काहा नि होय दोंड जोळसे.

¹¹ बाकीन हे भाशो, ओगर मे हिमी तोक सुंतान प्रचार कोरो ती काहा हिमी तोक मेसेक सताव रोया? तेत्यार ते ख्रुसोन ठूकर जादा रोयो.

¹² वारू होयतो कि तुमु काजे अस्थिर, कोमजुर कोरतेला छे चे आपना डीलोक बी काट देतला छे;.

¹³ हे भाशो तुमु छुटकारू होयनेन कोरता बुलावला छे बाकीन ओसो नी होयो कि यो आजादी डीलोमा कामोन कोरता टेम बोनसे बाकीन मोंगसी एक दिसरान चेला बोनु.

¹⁴ काहाकि आखा नियम, इनी एकुत वातमा पुरी होय जातली छे, “तू तारा साते वावा पोर खुदो सारखो मोंग कोर.”

¹⁵ पुन ओगर तुमु एक दिसरा काजे दाते कोरीन चावतला एने फाळीन खातला ती हुशारीमा रोयू एक दिसरान भुंडला मा कोरु.

आत्मा एने माणसोन जीवाय

¹⁶ बाकीन मे कोयो, आत्मान अनसारे चालू ती तुमु डीलोन मोर्जी काहना रितीसी पुरा नि कोरे.

¹⁷ काहाकि डील आत्मान खिलापमा एने आत्मा डीलोन खिलापमा मोर्जी कोरतेला जे एक दिसरान खिलाप छे, इनान कोरता कि तुमु जो कोरनेन कोरतेला चो नी कोर सोकतला.

¹⁸ एने ओगर तुमु आत्मान चाल पोर चालता होसे ती नियम शास्त्रान ताबामा नी रोये.

¹⁹ डीलोन काम ते प्रगट छे, मतलब भुंडला विचार, भुंडला कामे, कामोन लालोच.

²⁰ मूर्ती पूजा जादू कुहराय, दुष्मोनी, झोगळा, रीस, खिलाप, भेदभाव, अधोरमी.

²¹ डाव मोतलोबी हेवा एने तिंदरे सारखा एने लोकेत कामे छे, इंदरा बारामा तुमु काजे पेहलेन कोय दोम जोसू पेहेले बी कोयलु छे, कि ओसा-ओसा कामे कोरने वावा परमेश्वरोन राजान वारीस नी होये.

²² बाकीन आत्मान फोव, मोंग, खुशी, शांती, धीर, दया, भोलाई, भुरसू.

²³ नम्रता एने सय्यम छे, ओसला-ओसला कामोन खिलापमा काहनो बी नियम शास्त्र नी होय.

²⁴ एने जो मसिह येसुन छे, तिंदरा मोर्जी काजे एने भुंडली मोर्जी पुठी ख्रुस पोर चोळाय गोयला छे.

²⁵ ओगर आपनु आत्मान लारे जीवतला छे, ती आत्मान अनसारे चाल्या बी.

²⁶ आपनु घोमंडी होयीन एक दिसरा काजे मा छेळू एने एक दिसरा पोर रीस मा कोरु.