गलातियों 3 - बारेली पावरी

भुरसान लारे धारमिकता

¹ हे बिनादिमाकोण गलातिन माणसे, कून तुमु काजे मोनवी रोयू? तुमरो ते जोसो तुमरा डूवान सामने येसु मसिह ख्रुस पोर देखाळ छे.

² मे तुमरे जुव गोथू यो जाननेन कोर रोयू, कि तुमु आत्मा काजे काय, नियम शास्त्रान कामोमा गोथू नीती भुरसान वारली खोबरसी जोळ्यू.

³ काय तुमु ओसा बिन ओकोलोन छे कि आत्मान रिती पोर शुरू कोरीन हिमी डीलोन रिती पोर आखरी कोरसे.

⁴ काय तुमु ओसा दुख वायबारुत झेल रोया? बाकीन कांखुर माहीन वायबार नी.

⁵ जू तुमुक आत्मान दान कोरतेलू एने तुमरेमा मोटला कामे कोरतेला काय चा नियम शास्त्रन कामोसी नि ती वारली खोबर असो कोरे.

⁶ अब्राहाम ते परमेश्वर पोर भुरसू कोरतेलू एने यो तेरेन कोरता धारमिकता गीनायो.

⁷ आखरी, यो जान लेवू कि जू भुरसू कोरणे वावू छे चेत अब्राहामन पुऱ्या छे.

⁸ एने पवित्र शास्त्रान पेहेलेन जानीन कि परमेश्वर दिसरा जाती काजे विस्वासी धोरमी ठेरावसे; पेहेलेन अब्राहाम काजे जी वारली खोबर सोमवाळ देदु कि “तारेमा आखा काजे जातीन आशिष जोळसे.”

⁹ इनान कोरता जे भुरसू कोरने वावा छे, चे विश्वासी अब्राहामन साते आशिष आपतला छे.

नियमोन लारे स्राप

¹⁰ इनान कोरता जोत्रा माणसे नियम शास्त्रान कामो पोर भुरसू कोरलामा चे आखा पापोन ताबामा छे, काहाकि लिखलो छे “जू कुदू नियम शास्त्रान किताबमा लिखला आखा वातो काजे पावनेमा चात नी रोयतलु चू शापित छे.”

¹¹ बाकीन जी वात प्रगट होई कि नियम शास्त्रान लारे परमेश्वरोनचा कुदू धोरमी नी ठेरतू, काहाकि धोरमी जन भुरसासी जीवतलु रोयसे.

¹² बाकीन जी वात प्रगट होई कि नियम शास्त्रान भुरसासी काय मतलब नी होय; काहाकि जू तीनु काजे माणसे, चू तिंदरे वोजेसी जीवतु रोयसे.

¹³ मसिह जू आमरेन कोरीन शापित बोन्यू, आमुक मुले लीन नियम शास्त्रान श्रापमा गोथू छुळाव्यू काहाकि लिखलो छे “जू कुदु ख्रुस पोर चोळावतला चू शापित छे.”

¹⁴ यो इनान कोरता होयो, कि अब्राहामन आशिष मसिह येसुमा दिसरा जाती तोक पुगे एने आमरा भुरसान लारे चू आत्मा काजे स्वीकार कोरे जेरी वायदू होयली छे.

वातळी वायदु

¹⁵ हे भाशो मे माणसोन रिती पोरसी कोयो कि माणसोन वायदा बी पाका होय जातला, ती नी कुदू तिनाक टावतलु एने नी तीनामा काहीन वाढ होयतलो.

¹⁶ आखरी, वायदू अब्राहाम काजे एने पिढी काजे आपाय गयो, एने चू असो नि कहतलू कि पिढी काजे जोसा घोना सोवटान बारामा कोयलु छे “जोसू एकान बारामा कि तारा पिढी काजे एने मसिह छे.”

¹⁷ पुन मे यो कोय, जू वायदू परमेश्वर पेहेलेसी पक्की कोरलु होतु, तिना काजे नियम शास्त्रामा चार सौ तीस साल अवेत आवीन नी टाव सोकतलु कि वायदा कायमोन कोरता होये.

¹⁸ काहाकि ओगर जादाद नियमसी जोळतली छे ती एने अभीवचनोन सी नी, बाकीन परमेश्वर अब्राहाम काजे वायदान लारे आप देतलु छे.

नियमोन उद्देश

¹⁹ तेत्यार नियम शास्त्र का रोयी? चू ते गुणान वोजोहसी ओवते आपायलो कि तिनी पीढीन आवने तोक रोये जीनाक वायदू आपायलो होतो, एने चू सोरग दूतोन लारे एक अगवान हाते ठेराय गोयो.

²⁰ अगवू ते एखलान नी होतु, बाकीन परमेश्वर एकुत छे.

²¹ ती काय नियम शास्त्र परमेश्वरोन वायदान खिलापमा छे? कोबी नी; काहाकि ओगर ओसी नियम शास्त्र आपायलो जे जीवन आप सोकतलो, ती छाचलीन धारमिकतासी नियम शास्त्र पोरसी रोयती.

²² बाकीन पवित्र शास्त्रामा आखा काजे पापोन ताबामा कोर देदु, काहाकि चू वायदान आधार येसु मसिह पोर भुरसू कोरनो छे, भुरसू कोरणे वावान कोरता पुरो होय जाय.

²³ पुन भुरसा काजे आवनेन पेहेले नियम शास्त्रान ताबामा आमरी राखवावी होयती होती, एने भुरसा काजे आवने तोक जो प्रगट होयने वावो होतो आपनु तेरा बोंधनमा रोये.

²⁴ इनान कोरता नियम शास्त्र मसिहनचा तोक पुगाळनेन कोरता आपनो मास्तोर होयो कि आपनु भुरसासी धोरमी ठेराये.

²⁵ बाकीन जेतार भुरसू आव लाग्यू, ती आपनु आखा हिमी मास्तोरोन ताबामा नी रोयजे.

पुऱ्यु एने वारस

²⁶ काहाकि तुमु आखा तिना भुरसान लारे मसिह येसु पोर जे परमेश्वरोन पुऱ्या बोनसे.

²⁷ एने तुमरेमा गोथा जोतरा मसिहमा बाप्तिस्मा लेदला छे, चे मसिह काजे पेहर लेदला छे.

²⁸ हिमी नी कुदू यहुदि रोयू, नी युनानी, नी कुदू पावोर, नी स्वतंत्र, नी कुदु नोर, नी कुदु नारी, काहाकि तुमु आखा मसिह येसुमा एक छे.

²⁹ एने ओगर तुमु मसिहन होय ती अब्राहामन पीढीन एने वायदान अनसारे वारीस बी छे.