गलातियों 2 - बारेली पावरी

पौलुसोन काम

¹ चौदा सालोन ओवते बरनाबास पुठी ओवी यरुशलेममा गोयू, एने तीतुसो काजे बी पुठी लीगोयू.

² मारो जाणो परमेश्वरोन विजावान अनसारे होये; एने जी वारली खोबर मे दिसरा जातीन माणसोमा प्रचार कोरतेलू, तीतुस काजे मे कोय देतलु, बाकीन एखलामा तीनु काजे जा मोटला गीनायला, काहाकि ओसो नी होये कि मारी इना टेमोन पोछली दोवोळ वायबार ठेराये.

³ बाकीन तीतुस काजे भी जे मारे पुठी होतु एने यु युनानी छे, सुंता कोरणेन कोरीन जोबराइ नी कोरला होता.

⁴ जो इना झुटा भाशोन वोजेसी होये, जे चुरी कोरनेसी भोराय गोयला होता, कि इना छुटकारान जू मसिह येसुमा आमु जोळलु छे, भेद लीन आमु बोंदी बोनाव्यू.

⁵ एक घोळीभोर तिंदरा ताबामा रोयने आमु नी मान्य, इनान कोरता कि वारली खोबरोन खोराइ तुमरेमा टेकिन रोये.

⁶ ओवते जे माणसे काहीन सोमजता होता तिंदरी मोर्जी कोसी बी होती, मेसेक तिंदरे पुठी काहीन काम नी होय; परमेश्वर कुदान भेदभाव नी कोरतेलू.

⁷ बाकीन इंदरे सीवाय जेतार चे देख्या कि जोसा सुंता कोरला माणसोन कोरता वारली खोबरोन काम पतरस काजे सोप देदला होता, तोसोच देणे वावान कोरता मेसेक वारली खोबर सोमवाळने काम सोपाय गोयो.

⁸ काहाकि जू पतरस काजे सुंता होयला माणसोमा प्रेषितोन काम मोटा ताकत साते कोराव्या, चू मेसेक बी दिसरी जातीन माणसोमा ताकत काम कोराव्यू.

⁹ एने जेतार चे इना दयासी जो मेसेक जोळलो होतो, सोमजी गोयू, ती याकुब एने कैफा, एने योहान जे मंडवीन खांबा सोमजता होता, मेसेक एने बरनाबास काजे संगतीन जेवळ्या हात मेवाळयु कि आमु दिसरा जातीन माणसोमा जाय, एने चे सुंता कोरलानचा;

¹⁰ निस्ता यो कोयु कि आमु गरीबोन खोबर लेजे, एने इना कामो काजे कोरणेमा मे भी कोशिश कोरतू होतु.

अंतखीयामा पौलुसोन असंगती

¹¹ पुन जेतार कैफा अन्ताकियामा आव्यु, ती मे तेरा मुयो पोर तेरु सामनु कोऱ्यु काहाकि चू गुणावू ठेरलू होतु.

¹² इनान कोरता कि याकुब भूनी गोथा लोकेत माणसे आवनेन पेहेल चू दिसरा जातीन माणसो पुठी खाया कोरतू होतु बाकीन जेतार चे आव्या ती सुंता होयला माणसोन बिहीन पोछा जात रोया एने ओलोग कोरणे बाज गोयू.

¹³ तिंदरे पुठी रोयला यहुदि बी ढोंग कोऱ्या, या तोक कि बरनाबास बी तिंदरा ढोंगमा पोळ गोयू.

¹⁴ बाकीन जेतार मे देख्यू कि चे वारली खोबरोन खोराइ पोर सुधी चाल नी चालता ती मे आखान सामने कैफा काजे कोयू “जेतार तू यहुदि होयीन भी दिसरा जातीन माणसोन तोसु चाले एने यहुदिन तोसु जीवे ती तू दिसरा जातीन माणसो काजे यहुदिन तोसा चालने काहा कोयतेला.”

भुरसू एने काम

¹⁵ आमु ते जन्मो गोथा यहुदि छे, एने पापी दिसरा जातीमा गोथा नी.

¹⁶ ते बी यो सोमजीन कि माणूस नियम शास्त्रान कामोसी नी पुन निस्तु येसु मसिह पोर भुरसू कोरणेन लारे धोरमी गीनायतेलु छे, आमु ते खुद भी येसु मसिह पोर भुरसू कोरणेसी धोरमी ठेहऱ्या; इनान कोरता नियम शास्त्रान कामोसी कुदू प्राणी धोरमी नी ठेराये.

¹⁷ आमुक मसिहमा धोरमी ठेहरनेन देखतला, ओगर आपनु खुद पापी निकव्या ती काय मसिह पापोन सेवक छे? कोबी नी.

¹⁸ काहाकि जो काहीन मे पाळ देतलु ओगर तीना काजे एने बी बोनावतलु ती खुद काजे गुणावू ठेरावतलु.

¹⁹ मे ते नियमोन लारे नियमोन कोरता मोर गोयू कि परमेश्वरोन कोरता जीवो.

²⁰ मे मसिह पुठी ख्रुस पोर चोळाय गोयू, हिमी मे जीवतलु नी रोयू पुन मसिह मारेमा जीवतला छे; एने मे डीलोम हिमी मे जीवतलु छे, जू परमेश्वर परमेश्वरोन पुऱ्या पोर छे, जू मार पोर मोंग कोऱ्यु एने मारेन कोरीन खुदो काजे आप देदू.

²¹ मे परमेश्वरोन दया काजे वायबार नी ठेरावतू; काहाकि ओगर नियम शास्त्रान लारे धोरमी होयता ती मसिहन मोरनो वायबार होयतो.