इफिसीयो 6 - बारेली पावरी

आसी-बासा एने पुऱ्या

¹ हे पुऱ्या, प्रभूमा आपना आसी बासान कोयामा रोयू, काहाकि यो वारलो छे.

² आपनी आश एने बासोन आदर कोर (जी पेहेली आग्या छे जिंदरे साते वायदू बी छे.)

³ कि तेरो भोलो होये, एने तू कोवीमा लोकेत दाहळा जीवतलु रोये.

⁴ हे पुऱ्यावावा, आपना पुऱ्या काजे रीस मा लागाळू, बाकीन प्रभून शिक्षा एने चेतावनी आपता जायीन तीनुन देख रेख कोरु.

मालिक एने दास

⁵ हे दास, जे माणसे इना जोगोमा मे तुमरा मालक्या छे, आपना खोरला मोनोसी बिहता एने कापता जायीन जोसा मसिहन तोसाच तिंदराबी आग्या माणू.

⁶ माणसो काजे खुश कोरणे वावा सारखो चाकरी नी कोरीन पुन मसिहन दास सारका मोनसी परमेश्वरोन मोर्जी पोर चालू.

⁷ एने तिनी सेवा काजे माणसोन नी बाकीन प्रभून जानीन खोरला दिलसी कोरु.

⁸ काहाकि तुमुक मालूम छे कि जू कुदू ओसो वारलो काम कोरसे चू नोकर होसे नीती आजादोन प्रभू जुव गोथा ओसुत जोळसे.

⁹ हे मालक्या, तुमु बी धोमक्या देणे छुळीन तिंदरे पुठी तोसुच वेहवहार कोरु; काहाकि तुमुक मालूम छे इंदरु एने तुमरू दुयोन मालिक सोरगोमा छे, एने चू कुदान भेद नी कोरतेलू.

आत्मिक हत्यार

¹⁰ इनान कोरता प्रभूमा एने तेरी ताकतोन प्रभावमा ताकत वावा बोनु.

¹¹ परमेश्वरोन आखा हत्यार बांध लेवू कि तुमु भुतडान योजनान सामने उबा रोय सोकू.

¹² काहाकि आपनो यो लोळायनो लुय एने मासोपुठी नी होय बाकीन प्रधानो पुठी, एने अधिकारी पुठी एने इना जोगोन आंदारलान सुभेदारोपुठी एने भुंडला भुंड लाव आत्मिक सेना पुठी छे जे सोरगोमा छे.

¹³ इनान कोरता परमेश्वरोन आखा हत्यार बांध लेवू कि तुमु काठला दाहळामा लोळाय सोकसू, एने आखो काहीन पुरो कोरीन बोनला रोय सोकू.

¹⁴ इनान कोरता खोरलासी कोळ्यो कोसीन, एने धारमिकतान चिलखत पेहेरीन,

¹⁵ एने पायोमा मेव कोरावनेन वारली खोबरोन तीयारीन खासळा पेहेरीन;.

¹⁶ इनू आखा पुठी भुरसान ढाल लीन मजबूत रोयू जीनासी तुमु तिना बुराईसी आखा धोपतला बिलख्या उलवी सोकू.

¹⁷ एने छुटकारान टूपी एने आत्मान तलवार जो परमेश्वरोन वचन छे, ली लेवू.

¹⁸ हर टेमे एने हर भातीसी आत्मान प्रार्थना, एने विनता कोरता रोयू कि आखा चुखला माणसोन कोरता जागता रोये कि आखा पवित्र माणसोन कोरता लगातार विनता कोऱ्या कोरु.

¹⁹ एने मारेन कोरता बी मेसेक बुलनेन टेम ओसला प्रबळ वचन आपाय जाय कि साहसोन साथ वारली खोबरोन भेद देखाळ सोकू.

²⁰ जिनान कोरता मे साकव्यासी बांधलु राजदूत छे; एने यो बी कि मे इतरा वारामा जोसो मेसेक लाग्यो हिंमतसी बुलो.

आखरी नमस्कार

²¹ तुखीकुस, जू मोंगावा भाश एने प्रभूमा विश्वासी सेवक छे, तुमुक आखा वाते देखाळसे कि तुमु बी मारी हालत सोमजसु कि मे कोसू रोयतलु.

²² तीनाक मे तुमरे साते इनाक कोरता मुकेल्लू छे कि तुमु आमरी हालत काजे सोमजू एने चू मारा मोनो काजे शांती आपे.

²³ परमेश्वर बास एने प्रभू येसु मसिहन भूनी गोथो भाशो काजे शांती एने भुरसा पुठी मोंग जोळे.

²⁴ जे आपना प्रभू येसु मसिह पुठी खोरलो मोंग कोरतेला, तिंदरो आखापोर दया होयती रोये.