इफिसीयो 5 - बारेली पावरी

मोंगोमा चालू

¹ इनान कोरता मोंगावा पुऱ्यान तोसा परमेश्वरोन अनुकरण कोरु.

² एने मोंगोमा चालू जोसू मसिह तुमरे पोर मोंग कोरलु, एने आमरेन कोरता खुदो काजे सुख आपने वावो सुगंधोन कोरता परमेश्वरोन ओगोव भेट चोळावीन बलिदान कोर देदू.

³ जोसा चुखला माणसोन लायक छे, तोसोत तुमरेमा भुंडला विचार काहना भातीन विटेवला कामे नि ती लालचोन वाते तोक नी होये.

⁴ एने नी बिन लाज्या नी ठगनेन वाते नी मोजाकोन; काहा यो वाते शोभा नी देती, पुन धन्यवाद सोमवायनो जुवे.

⁵ काहाकि तुमुक यो मालूम छे कि कुदा व्यभिचारोन नीती लालूच वावा माणसोक जे मूर्ती पुजान बरोबर छे मसिहन एने परमेश्वरोन राजमा वाटू नी होय.

⁶ कुदू तुमुक वायबार वातोसी धुकू नी देनो जुवे काहाकि इनान कामोन वोजेसी परमेश्वरोन रीस आग्या नि मानने वावा पोर पोळतेली छे.

⁷ इनान कोरता तुमु तिंदरेमा भेसकायू मा.

विजावामा चालू

⁸ काहाकि तुमु ते पेहेले आंदारलामा होता बाकीन हिमी प्रभूमा विजावो छे आखरी विजावान पुऱ्या सारखा चालू.

⁹ काहाकि विजावान फोव आखा भातीन भोलाई एने धारमिकता एने खोरलो छे.

¹⁰ एने यो पारखु कि प्रभू काजे काय गोवतेलो छे.

¹¹ आंदारलान बिना फोवोन कामोमा भेसकायू बाकीन तिनान खिलाप जावू.

¹² काहाकि तिंदरा डूकायला कामोन वात बी लाजवायने वावी वात छे.

¹³ पुन जोतरा कामोन खिलाप होय जातलु छे चे आखा विजावासी प्रगट होयतला छे काहाकि यो आखो काहीन प्रगट कोरतेलू चू विजावो छे.

¹⁴ इनान वोजेसी चू कोयतेलु, “हे सुवनेवावा जाग एने मोरलामा गोथा जीव उठ; ती मसिहन विजावो तार पोर चमकसे.”

दिमाके मा चालू

¹⁵ इनान कोरता ध्यानसी देखू कि कोसी चाल चालतला छे, बिन ओकल्या नी पुन ओकोलवावान तोसा चालू.

¹⁶ टेम काजे घोनो किमती सोमजू, काहाकि दाहळा काठला छे.

¹⁷ इनान वोजेसी बिन ओकल्या मा होयू पुन ध्यानसी सोमजू कि प्रभून मोर्जी काय छे.

¹⁸ आंगुरोन रोससी छाकला मा बोनु, काहाकि तीनामा लुचळाय होयतेली छे बाकीन आत्मामा पुरा भोराय जावू.

¹⁹ एने आपसमा भजन एने गीते एने आत्मिक गीत गाव्या कोरु एने आपना-आपना मोनोम प्रभून ओगोव गावता एने भजोन कोरता रोयू.

²⁰ एने हमेशा आखा वातोन कोरता आपना प्रभू येसुन मसिहन नावोसी परमेश्वर बासोन धन्यवाद कोरता रोयू.

²¹ मसिहन बिकोसी एक दिसरान ताबामा बोसीन रोयू.

बायोर एने ओदमीक कोयनो

²² हे बायर आपना ओदमीन ओसा अधीन रोयू जोसा प्रभून.

²³ काहाकि बायर ओदमीन मुंडको छे, जोसो कि मसिह मंडवीन मुंडको छे एने खुद डीलोन छुटकारू आपन्यु छे.

²⁴ पुन जोसू मंडवी मसिहन कोयामा छे, तोसाच बायराबी हर वातोमा आपना-आपना ओदमीन कोयामा रोयू.

²⁵ हे माणसो आपनी-आपनी लाडी पोर मोंग कोरु जोसू मसिह बी मंडवी पोर मोंग कोरीन खुदो काजे तेरोन कोरता आप देदू

²⁶ कि तीनु काजे वचनोन लारे पाणीसी चुखो कोरीन पवित्र बोनावू.

²⁷ एने तीनाक ओसी चोमोकने वावी मंडवी बोनावीन आपनेनचा उबरोये; जीनाक नी डाग, सुरकुती नी काहीन ओसी चीज होय पुन चुखला एने निरदोष होये.

²⁸ इना रितीसी वारू छे कि ओदमी आपनी-आपनी लाडी पुठी आपना डीलोन सारखो मोंग कोरजू आपनी लाडी पोर मोंग कोरतेलू चू आपना खुदो पोर मोंग कोरतेलू.

²⁹ काहाकि कुदु कोबी खुदोन डीलोपोर दुष्मोनी नी कोरतेलू पुन तीनाक देख भाव कोरतेलू जोसो मसिह मंडवी साते कोरतेलू छे.

³⁰ इनान कोरता कि आपनु तेरा डीलोन भागे से.

³¹ “इना वजेसी माणूस आपना आसी बासा काजे छुळीन आपनी लाडी पुठी जुळायीन रोयसे, एने चे दुय एक डील होयसे.”

³² यु भेद मोटू छे, पुन मे या मसिहन एने मंडवीन बारामा कोयने बाज रोयू.

³³ बाकीन तुमरेमा हर एक आपनी लाडी पुठी खुदो सारखो मोंग कोरनो एने लाडी बी आपना पाहणान बिक धोरे.