इफिसीयो 4 - बारेली पावरी

मसिहन डीलोमा एक

¹ इनान कोरता मे जू प्रभूमा बांदायलु छे तुमु काजे विनता कोरो कि जिना बुलावला गोथो तुमुक प्रेषितोन छे तेरे सारखी चाल चालू.

² मतलब आखरी नम्रतासी एने धीर धोरीन मोंगसी एक दिसरान वेठ लेवू.

³ एने मेवोन बंधनमा आत्मान एकी कोरणेन कोशिश कोरु.

⁴ एकुत डील छे एने एकुत आत्मा छे; जोसो तुमु काजे जे बुलावला गोयला होता आपना बुलावनेसी एकुत आस छे.

⁵ एकुत प्रभू छे एकुत भुरसू एने एकुत बाप्तिस्मा.

⁶ आखान एकुत बास छे जू आखान उपोर एने आखान इचमा एने आखामा छे.

आत्मिक वरदान

⁷ बाकीन आमरेन गोथा होर एक काजे मसिहन दानोन अनसारे दया जोळी.

⁸ इनान कोरता चू कोये चू उपोर चोळ्यु एने बोंदी वावा काजे बांधीन लीगोयू एने माणसो काजे दान आप्यू.

⁹ तेरो चोळनेसी ओवी काय जोळतलो निसतो यो कि धोरतीन नेचली जागा पोर उतरलु होतु.

¹⁰ एने चू उतरी गोयू चू युत छे, जू आखा सोरगोम गोथू उपोर चोळी बी गोयू कि आखो काय पुरो कोरो.

¹¹ चू कुदा काजे प्रेषित नेवाळीन, एने काहनास काजे भविष्य कोरता नेवाळ्या एने वारली खोबर सोमवाळनेवावा नेवाळीन एने काहनास काजे राखवावी कोरने वावा एने प्रचारक नेवाळीन आप देदु.

¹² जीनासी चुखला माणसे तीयार होय जाय एने सेवान काम कोराय जाय एने मसिहन डीलोन बोढतो जाय.

¹³ जेतार तोक आपनु आखान भुरसू एने परमेश्वरोन पुऱ्यान उवखायतामा एक नी होय जाजे एने एक पाकु माणूस नी बोन जाय एने मसिहन पुरा डीलोम तोक बोढ नि जाये.

¹⁴ काहाकि आपनु ओगा पुऱ्या नी रोये चे माणसोन झुटा विद्या एने हुशारीमा तिंदरा भ्रोमोन विचारोन एने प्रचारोन होर एक वावाक उछवाय जाय इंखुर तिन्खुर फिराव देतला छे.

¹⁵ बाकीन मोंगोमा खोरलो बुलता जायीन आखा वातोमा तीनामा जो पाको छे मतलब मसिहमा बोढतू जाय.

¹⁶ जीनासी आखो डील होर एक जूळीन सहायतासी एखठा गाळायन तीना प्रभाव अनसारे जो होर एक डीलोन ठीक-ठीक कोरनेन लारे तीनुमा रोयतला छे आपना खुदो काजे बोढावता ती चा मोंगसी बोढती कोरतेली छे.

नवलू माणूस

¹⁷ इनान कोरता यो कोयो कि एने प्रभूमा विनता कोरो कि जोसा दिसरा जातीन माणसे आपना मोनोन दिसरा रिती पोर चालतला तुमु आखा हिमी गोथा ओसा मा चालु.

¹⁸ काहाकि तिंदरी दिमाक आंदारी होय गोयली छे एने बिना जानकारीन वजेसी जो तीनुमा छे एने तिंदरो मोनोन वातळो होयनेन वोजेसी चे परमेश्वरोन जीवनोसी ओलोग कोरला छे.

¹⁹ एने चे हुगा होयीन लुचळायमा लाग गोयला छे कि आखा भातीन भुंडला काम लालचसी कोऱ्या कोरे.

²⁰ बाकीन तुमु मसिहन ओसी शिक्षा नी जोळी.

²¹ बाकीन छाचलीन तुमु तेरो सोमव्या एने जोसो येसुमा खोरलो छे, तीनामा सिकाळला बी छे.

²² कि तुमु पोछला चाल-चलन अनसारे जुनलो स्वभाव काजे जी भोरमायलो वावी लालचोन अनसारे नाश होय जातलो छे उतार नाखू.

²³ एने मोनोन आत्मान स्वभावमा नोवला बोनता जावू.

²⁴ एने नोवला माणसो काजे पेहेर लेवू जो परमेश्वरोन अनसारे खोरलान धारमिकता एने पवित्रतामा बोनावलु छे.

आत्माक धक्कू घोनु आपता

²⁵ इनान वोजेसी झुटो बुलनेन छुळीन होर एक साते वावा साते खोरो बुलू काहाकि आपनु खुदोमा एक दिसरान डील छे.

²⁶ रीस ते कोरु बाकीन पापोमा कोरु; दाहळू बुडनेतोक तुमरी रीस नी रोयनो जुवे.

²⁷ एने नी भुतडा काजे टेम आपु.

²⁸ चुरी कोरणे वावू ओवी चुरी नि कोरे, बाकीन वारला कामे कोरणेमा आपनो हातसी मेहनत कोरु इनान कोरता कि जीनाक गोरोज से तीनाक आपनेन कोरता तेरे जुव काहीन रोये.

²⁹ कानली भुंडली वाते तुमरा मुयोमा नि निकवे, बाकीन गोरोजोन अनसारे चोत निकवे जो बोढती वाटू वारू छे, काहाकि तिनासी सोमवने वावा पोर दया होये.

³⁰ परमेश्वरोन पवित्र आत्मा काजे दुखी मा कोरु जीनासी तुमरे पोर छुटकारान कोरता आत्मान छापू देदलु छे.

³¹ आखा भातीन कोळवो एने रीस एने प्रकोप एने कळ एने बुराई एने आखो भेदभाव सी तुमरेसी नांबे मेकाय जाये.

³² एक दुसरा पोर दया एने करुणामय होयू एने जोसा परमेश्वर मसिहमा तुमरा गुणा काजे माफ कोर देदू तोसात तुमु बी दिसरान गुणाक माफ कोरु.