इफिसीयो 3 - बारेली पावरी

डूकायलो देखायनो

¹ इना रितीसी मे पौलुस जो तुमु दिसरा जातीन कोरता प्रभू येसुन मसिह बांधायलु छे.

² अगर तुमु परमेश्वरोन तीना मोंगोन व्यवस्थान वारली खोबर सोमेवला छे, जो तुमरेन कोरता मेसे काजे आपलो होतो.

³ मतलब यो कि चू मारे पोर प्रगटीकरण लारे प्रगट होयो जोसो मे पेहेलेत वारू रितीसी लिख देदलु होतु.

⁴ जीना काजे तुमु भोनीन सोमजी सोकतला कि मे मसिहन चू भेद का तोक सोमोजतलो.

⁵ जो ओलोग टेमे माणसोन पुऱ्या काजे ओसो नी देखाळलो होतो जोसो कि आत्मान लारे हिमी तेरा चुखला प्रेषितोन एने भविष्य कोरता पोर प्रगट कोराय गोयो.

⁶ मतलब यो कि मसिह येसुमा वारली खोबरोन लारे दिसरा जातीन माणसे विरासत मा भागी से एने एक डीलन एने वायदान भागी छे.

⁷ मे परमेश्वरोन मोंगोन तिना दानोन अनसारे, जोतरी मोटला प्रभावोन अनसारे मेसे काजे आपाय गोयलो छे तिना वारली खोबरोन सेवक बोन्यू.

डुकायलान उद्देश

⁸ मारे पोर जे चुखला माणसो मायला नानासी ते नानू यो मोंग होयो कि मे दिसरा जातीन काजे मसिहन घोन मोटो धोनोन वारली खोबर सोमवाळे.

⁹ एने आखा काजे जी वात प्रगट तिनी वातोन भेद काय छे जो आखाक बोनावने वावू परमेश्वर पेहेलेन नी देखतू होतु.

¹⁰ काहाकि हिमी मंडवीन लारे परमेश्वरोन दिसरू रुपोन ध्यान तीना प्रधानोन अधिकारी पोर जू सोरगोन जाणे छे प्रगट कोराय गोयू.

¹¹ तिना कोवीन पेहेले माणसोन नुसार जो चू आपना प्रभू येसु मसिहमा कोरला होतो.

¹² जीनामा आमु काजे तीना पोर भुरसू कोरणेसी हिंमत भुरसासी परमेश्वर साते आवनेन होक छे.

¹³ इनान कोरता मे विनता कोरो कि जो दुख तुमरेन कोरता मेसे काजे होय रोयो तेरे वजेसी हिंमत मा छुळू काहाकि तीनामा तुमरी महिमा छे.

इफिसोन कोरता प्रार्थना

¹⁴ मे इना वजेसी तिना बास ओगोव मांडा टेको.

¹⁵ जीनासी सोरग एने धोरती पोर होर एक घोरोन नाव मेकाय जातलो छे.

¹⁶ कि चू आपना महिमान धोनोन अनसारे तुमुक यो दान आपे कि तुमु तेरी आत्मासी आपना डीलोमायलो माणसोन रूपमा ताकतसी बोनता जावू.

¹⁷ एने भुरसान लारे मसिह तुमरे मोनोमा बोसे कि तुमु मोंगोक वातडो धोरीन एने पायु घालीन.

¹⁸ आखा चुखला माणसो साते वारला रितीसी सोमजनेन ताकत ली लेवू तेरी चोळवाय एने नांबो एने उचो कोतरो छे एने उंडो कोतरो छे.

¹⁹ एने मसिहमा तिना मोंगोकाजे ग्यानसी पुरो छे कि तुमु परमेश्वरोन आखो आखान पुठी होय जाय.

²⁰ हिमी जो ताकत वावू छे कि आमरी विनता एने समज सी घोन सोवटो काम कर सोकतलु, तिना ताकत अनसारे जो आपनेमा काम कोरे.

²¹ मंडवीमा एने मसिह येसुमा ओमोरकाईन पीढी कायम महिमा होयती रोये, आमेन.