इफिसीयो 2 - बारेली पावरी

मोरलाम गोथा जीवन वोखे

¹ चू तुमु काजे बी जीवाळ्यु, जे आपना गुणा एने पापोन कोरता मोरला होता.

² जीनामा तुमु पेहेले इना संसारन रिती पोर एने वादवा मायला मालकोन राज मतलब तिना आत्मान अनसारे चालता होता, जे हीमी बी आग्या नि मानने वावामा काम कोरतेलू छे.

³ इनामा आमु बी आखान आखा पेहेले आपना डीलोन मोर्जीमा दाहळा जावाळता होता एने मोनोन मोर्जी पुरी कोरता होता एने दिसरा माणसो सारखो स्वभाव सी रीसोन पुऱ्या होता.

⁴ बाकीन परमेश्वर जू दयान मालिक छे, आपना तिना मोटला मोंगोन वजेसी जीनामा चू आमरेपोर मोंग कोऱ्यु.

⁵ जेतार आपनु गुणान वजेसी मोरला होता ती आपनुक मसिह साते जीवाळ्यु (मोंगसी तुमरो छुटकारू होयलो छे).

⁶ एने मसिह येसुमा तेरे साते जीव उठाळयु एने सोरगोन जागे तेरे साते बोसाळयु.

⁷ कि चू आपनी तिना दयासी जू मसिह येसुमा आमरेपोर छे आवने वावा टेमोन आपना दयान घोन सोवटो धोन देखाळे.

⁸ काहाकि भुरसान लारे दयासी तुमरो छुटकारू होयलो छे; एने यो तुमरे भूनी गोथा नी बाकीन परमेश्वरोन दान छे.

⁹ एने नी फर्मान वोजेसी ओसो नी होयो कि कुदू मोटाय कोरे.

¹⁰ काहाकि आपनु तेरा बोनावला एने मसिह येसुमा तिना वारला कामोन कोरता बोनवाय गोयला जीनु काजे परमेश्वर पेहेले गोथो आपना काजे कोरणेन कोरता तीयार कोऱ्यु.

येसु मसिहमा एक

¹¹ इना वजेसी फोम कोरु कि तुमु जे डीलोन रितीमा दिसरा जातीन छे एने जे माणसे डीलोन हातोसी कोरला सुंतान सुंता वावा कोवायता होता चे तुमु काजे बिगर सुंता वावा कोयतेला.

¹² तुमु माणसे तिनी टेमे मसिहसी ओलोग एने इस्राईलोन माणसोन पोदसी ओलोग कोरायला एने वायदान भागीदार नी होता एने बिन आसोन एने जोगोमा बिना परमेश्वरोन होता.

¹³ बाकीन हिमी येसु मसिहमा तुमु जे पेहेले नांबे होता मसिहन लुयोन लारे साते होय गोयला छे.

¹⁴ काहाकि चू आमरो मेव छे जू दुयू काजे एक कोर देदु एने ओलोग कोरणे वावा भीतळा काजे जी इचमा होती पाळ देदु.

¹⁵ एने आपना डीलोमा दुष्मोनी मतलब चे नियम शास्त्र जेरी आग्या नियमोपोर होती मिटाळ देदु कि दुयोसी आपनेमा एने नोवलु माणूस पोयदा कोरीन मेवाळ देदु.

¹⁶ एने ख्रुस पोर दुष्मोनी काजे नाश कोरीन तेरे लारे दुयो काजे एक डील बोनावीन परमेश्वर काजे मेवाळयु.

¹⁷ चू आवीन तुमु काजे जे नांबे होता एने तीनु काजे जे साते होता दुयू काजे हिव मेवीन वारली खोबर कोयू.

¹⁸ काहाकि तिनान लारे आमु दुयू एक आत्मामा बासोनचा पुगाळतलो.

मसिही आपना कोपरान दोगळू

¹⁹ इनान कोरता तुमु हिमी दिसरा एने भोटकने वावा नी होय बाकीन चुखला माणसोन साते आपना देसोन एने परमेश्वरोन घोरानान होय गोया.

²⁰ एने प्रेषितोन एने भविष्य कोरतान पायो पोर जिनान कुपरान दोगळू येसु मसिह खुद छे, बोनाव गोयलो छे.

²¹ जीनामा बोनावलो एक सात मेवीन प्रभूमा एक चुखला मंदीर बोनतेला जातलो छे.

²² जीनामा तुमु बी आत्मान लारे परमेश्वरोन रोयनेन जागा कोसा एखठा बोनावला होता.