कुलुस्सि 4 - बारेली पावरी

मसिही दया

¹ हे मालिक आपना-आपना पावोर साते नियाव एने ठीक-ठीक व्यहवार कोरु, यो सोमजीन कि सोरगोमा तुमरु बी एक मालिक छे.

² प्रार्थनामा लागला रोयू, एने धन्यवाद साते आमरेन कोरता जागता रोयू.

³ एने इना साते-साते आमरेन कोरता बी प्रार्थना कोरता रोयू, कि परमेश्वर आमरेन कोरता वचन सोमवाळनेन ओसू झोपलु उगाळ देदू कि आमु मसिहन तिना भेदोन वर्णन कोर सोके जिनान वजेसी मे बंदीमा छे.

⁴ एने तीनाक ओसो प्रगट कोरो जोसो मेसेक कोरनो वारू छे.

⁵ टेमो काजे किमती सोमजीन बारथे वावा साते ग्यानसी व्यहवार कोरु.

⁶ तुमरो वचन हमेशा मोंगसी एने सोहलानिसी तुमरे आखा माणसो काजे वारला रितीसी जोवाब आपने आवळी जासे.

आखरी नमस्कार

⁷ मोंगावा भाश एने भुरसान लायक सेवक, तुखीकुस; जु प्रभूमा मारू सहकारी छे, मारी आखी वाते तुमुक देखाळसे.

⁸ तीनु काजे मे इनान कोरता तुमरेनचा मूकल्यु कि तुमुक आमरी हाल मालूम होय जाय, एने चे तुमरा मोन काजे शांती आपे.

⁹ तीनु पुठी मे उनेसीमूस काजे बी मुकेललु छे, जे भुरसान लायक एने मोंगावा भाश एने चे तुमरा जीवो काजे शांती आपे.

¹⁰ अरिस्तर्खुस जे मारे साते बोंदी छे एने मरकुस जू बरनाबासोन भाश लागतलु (जिनान बारामा तुमु आग्या लेदला होता कि अगर चू तुमरे साते आवे ती तेरे पुठी वारला रितीसी देगभाल कोरजू).

¹¹ एने येसु जू यूस्तुस कोवायतलु होतु, तुमुक नमस्कार कोय रोया, सुंता कोरला माणसोमा गोथू जू परमेश्वरोन राजोन कोरता मारू मोदतगार एने मारी शांतीन वजा रोयला छे.

¹² इपफ्रास जे तुमरेमा गोथा छे एने मसिह येसुन दास छे, तुमुक नमस्कार कोये एने हमेशा प्रार्थनामा कोशिश कोरतेला छे, काहाकि तुमु पाका होयीन पुरा भुरसा साते परमेश्वरोन मोर्जी पोर पाका रोयू.

¹³ मे तिंदरू गोवा छे कि चू तुमरेन कोरीन एने लौदीकिया एने हियरापुलिसवावान कोरता घोनी मेहनोत कोरतू रोयू.

¹⁴ मोंगावा डाक्टर लुका एने देमासोन तुमु काजे नमस्कार.

¹⁵ लौदीकिया भाश एने नुमफास एने घोरोन मंडवी काजे नमस्कार कोयजू.

¹⁶ जेतार चिट्ठी तुमरेनचा वाचाय जाय ती ओसा कोरजू कि, लौदीकियान मंडवीमा बी वाचाय जाय एने चो चिट्ठी जी लौदुकिया गोथो आवे ती तुमु बी भोनजू.

¹⁷ एने अरखिप्पुस काजे कोयजू कि सेवा प्रभूमा तुसेक आपली छे, जीनाक सावधानीमा पुरी कोरजू.

¹⁸ मेसेक पौलुसोन मारा हातोन लिखला नमस्कार, मारा साकव काजे फोम कोरजू, तुमरे पोर मोंग होयती रोये. आमेन.