कुलुस्सि 3 - बारेली पावरी

चुखलो जीवनोन नियम

¹ आखरी, जेतार तुमु मसिह पुठी जीवाळाय गोया, ती सोरगोन चीजोन हेर कोरणेमा रोयू, जा मसिह रोयतेलु छे, एने परमेश्वरोन जेवळे धोळे बोस रोयू.

² धोरती पोरला नि बाकीन सोरगोन चीजो पोर मोन लागाळू.

³ काहाकि तुमु ते मोर गोयला एने तूमरो जीवन मसिह साते परमेश्वरमा डुकायलो छे.

⁴ जेतार मसिह जू आमरो जीवन छे प्रगट होयसे तेतार तुमु बी महिमा साते देखाळाय जासे.

⁵ इनान कोरता आपना इना डीलो काजे मार देवू, जो धोरती पोर छे मतलब व्यभिचार, भुंडला काम, दुष्कामना, बुरी लालच एने लोभ काजे मूर्ती पूजान बराबर छे.

⁶ इना वजेसी परमेश्वरोन रिस आग्या नि मानने वावा पोर पोळतेलु छे.

⁷ एने तुमु बी बुराईमा जीवन जीवता होता ती इंदरेन तोसा चालता होता.

⁸ बाकीन हिमी तुमु बी आखा काजे, मतलब रीस, संताप, दुष्टपणा, भेदभाव, बुराई एने मुयोमा गोथो लोळ देनो आखी वाते छुळ देवु.

⁹ एक दिसरा काजे झूट मा मेकू काहाकि तुमु जूनला माणसो काजे तिंदरा कामो साते उतार नाखलो छे.

¹⁰ एने नोवला माणूस काजे पेहेर लेदला छे, जे आपना बोनावने वावान सारकु ग्यान हासील कोरनेन कोरता नोवलो बोनतो जातलो छे.

¹¹ तीनामा नि ते युनानी, नि यहुदि, नि सुंता, नि बिगर सुंता वावू, नि जोंगली, नि स्कुती, नी गुलाम, एने नि आजादी, निस्तु आखा काहीन एने आखामा मसिह छे.

मसिही जीवन

¹² इनान कोरता परमेश्वरोन नेवाळलान सारखा जे चुखला एने मोंगावी छे, मोटली दया, एने भोलाई एने दीनता एने नम्रता एने सहन शीलता ली लेवू.

¹³ एने अगर काहनास काजे गुणू लागाळनेन काय मतलब होय, ती एक दिसरान सोहोन कोर लेवू एने एक दिसरान गुणू माफ कोरु, जोसू प्रभू तुमरा गुणाक माफ कोऱ्यु तोसोत तुमु बी कोरु.

¹⁴ इना आखान उपोर मोंगोक जू पुरा बंधन छे, बांध देवू.

¹⁵ मसिहमा शांती जिनान कोरता तुमु एक डील होयीन बुलावला छे तुमरा मोनमा राज कोरे, एने धन्यवाद कोरता रोये.

¹⁶ मसिहन वचन काजे आपना मोनोमा जादा बोसने देवू, पाका ग्यान साते दिसरा काजे सिकाळू एने जोताळू, एने तुमरा मोनोमा मोंग साते परमेश्वरोन कोरता भजन, एने धन्यवादन गीत एने आत्मिक गीत गावू.

¹⁷ वचनमा नीती कामोमा जो कायबी वात कोरु आखो प्रभू येसुन नावोसी कोरु, एने तिनान लारे परमेश्वर बासोन धन्यवाद कोरु.

मसिही परिवारन कोरता नियम

¹⁸ हे लाड्या, जोसो प्रभूमा वारलो छे तोसोत आपना-आपना घोर वावान हातोमा रोयू.

¹⁹ हे लाडास आपनी-आपनी घोरवावी पोर मोंग कोर एने तीनु पोर रीस मा कोरु.

²⁰ हे पुऱ्या आखा वातोमा आपना-आपना आसी बासान आग्यान पालन कोरु काहाकि प्रभू इनासी खुश होयतेलु छे.

²¹ हे पुऱ्या-पारी वावा, आपना पुऱ्या-पारी काजे दोबावमा मा राखू, ओसो नि होयो कि तिंदरो मोन तुट जाय.

²² हे सेवक, जे डीलोन अनसारे तुमरा मालिक छे, आखान वातोमा तिंदरा आग्यान पालन कोरु, माणसो काजे खुश कोरणे वावान सारखो देखायनेन कोरता नी, बाकीन मोनोक सुदो एने परमेश्वरोन बिकोसी.

²³ जो काय तुमु कोरतेला छे, तन मोनसी कोरु यो सोमवीन कि माणसोन कोरीन नी बाकीन प्रभून कोरता रोयू.

²⁴ काहाकि तुमुक मालूम छे कि तुमु काजे एरे बोदले प्रभूनचा गोथो वाटू जोळसे; तुमु प्रभू येसु मसिहन सेवा कोरतेला छे.

²⁵ काहाकि जू बुरो कोरतेलू चू आपना बुरायीन फोव जोळतलो चा कुनीन भेदभाव नि होय.