कुलुस्सि 1 - बारेली पावरी

सुभेच्छा

¹ पौलुस तोरोफसी, जी परमेश्वरोन मोर्जीसी येसु मसिहन प्रेषित छे, एने भाश तीमथी तोरोफसी,

² मसिहमा तिना चुखला एने विश्वासी भाशोन नावे जे कुलुसोमा रोयतला आमरू बास परमेश्वर तोरोफसी तुमु काजे दया एने शांती जोळती रोये.

धन्यवाद

³ आमु तुमरेन कोरता प्रार्थना कोरीन आपनु प्रभू येसु मसिहन बास मतलब परमेश्वरोन धन्यवाद कोरजे,

⁴ काहाकि आमु सोमवला कि मसिह येसु पोर तुमरू भुरसू छे एने आखा चुखला भाशोसी मोंग राखतला छे,

⁵ तिनी आस कोरली चीजोन वजेसी जो तुमरेन कोरता सोरगोमा मेकली छे, जेरा बारामा तुमु तीना वारली खोबरोन खोरलो वचन काजे सोमवी लेदला छे.

⁶ जो तुमरेनचा पुगलो छे एने जोसो जोगोमा बी फोव लावे एने बोढतो जातलो छे, तोसोत जिने दाहळे गोथो तुमु तीनाक सोमव्या एने खोरायसी परमेश्वरोन दया उवखी लेदा तुमरेमा बी ओसोत कोरतेला छे.

⁷ तेरी शिक्षा तुमु आपना मोंगावा साथीदार इपफ्रास गोथू आव्यु जू आमरेन कोरता मसिहन विश्वासी सेवक छे.

⁸ चू तुमरा मोंगोम जे आत्मामा छे आमरेपोर प्रकट कोऱ्यु.

आत्मिक उन्नतीन कोरता प्रार्थना

⁹ इनान कोरता जिने दाहळे गोथू यो सोमवलू छे, आमु बी तुमरेन कोरता जी प्रार्थना एने विनता कोरणे नि छुळ्या ती तुमु आखा आत्मिक ग्यान एने सोमोज साते परमेश्वरोन मोर्जीन उवखानमा पुरो होय जाय.

¹⁰ काहाकि तुमरी चाल चलन प्रभून लायक जुवे, एने चे आखा चीजोसी खुश होये, एने तुमरेमा आखा चीजोन वारला कामोन फोव लावे, एने तुमु परमेश्वरोन उवखानमा बोढता जावू.

¹¹ तेरी महिमान अनसारे आखा भातीन ताकतसी ताकतवाला बोनता जावू, न्या तोक कि खुशीमा आखा भातीन धीर एने सहन शीलता देखाळ सोके.

¹² एने बासोन धन्यवाद कोरो जू आमु काजे एरे लायक बोनायू कि विजावामा चुखला माणसो साते वाटामा सहभागी होये.

¹³ चु आमु काजे आंदारलान बंधनमा गोथू छुळावीन आपनु मोंगावा पुऱ्यान राजमा पुगाळ्यु,

¹⁴ जीनामा आपनु छुटकारू मतलब पापोन माफी जोळ जातली.

मसिहन ताकत एने तेरो काम

¹⁵ चू ते नि देखाये ओसलु परमेश्वरोन प्रतिरूप एने आखा जोगोमा पेहेलू छे.

¹⁶ काहाकि तीनामात आखा चीजोन बोनलो छे, सोरगो मायलो होय अगर धोरती पोरलो होय, देखाये एने नि देखाये, काय सिहासन, काय प्रभूत्व, काय प्रधानता, काय होक आखी चीजे तेरे लारे एने तेरेन कोरता बोनली छे.

¹⁷ चू आखी चीजोमा पेहेलू छे एने आखा चीजे तीनामा पाका रोयतला.

¹⁸ चू डील, मतलब मंडवीन मुंडको छे, चू पेहेलू छे, एने मोरलामा गोथू जीव उठने वावामा पेहेलू चू प्रधान ठोरे.

¹⁹ काहाकि परमेश्वरोन खुशी इनामा छे कि तीनामा आखो पुरो-पुरो रोये.

²⁰ एने तेरे ख्रुस पोर वोयलो लुयोन लारे मेवाळने कोरीन आखा चीजोन तेरेत लारे आपने साते मेवाय जाय चाहे चे धोरती पोरला होय कि सोरगो मायला होय.

²¹ तुमु जे पेहेले निकाव लेदला होता एने बुरो कामोन लारे मोनोमा दुष्मोन होता.

²² चू हिमी तेरो शारीरिक डीलोमा मोरोनोन लारे तुमरेसी मेव कोर देदू काहाकि तुमुक तेरे ओगोव चुखला एने बेगुना बोनावीन तिनाक उबराखसे.

²³ अगर तुमु भुरसान पाया पोर पाका उबरोय रोये एने तीना वारली खोबरोन आस काजे जिनाक तुमु सोमवला छे मा छुळू, जिनान वारली खोबर सोरगोन नेळो आखो जोगोमा कोराय गोयो एने जेरू मे पौलुस सेवक बोन्यू.

मंडवीन कोरता मेहनत

²⁴ हिमी मे तीना दुखोन लारे खुशी कोरो कि जो तुमरेन कोरीन उठाळतेलु एने मसिहन दुखोन कोमी तेरा डीलोन कोरता, मतलब मंडवीन कोरता आपना डीलोमा पुरो कोरतेलु.

²⁵ जेरो मे परमेश्वरोन तीना बुलावलान अनसारे सेवक बोन्यू जो तुमरेन कोरीन मेसेक आपाय गोयो काहाकि मे परमेश्वरोन वचन काजे पुरो-पुरो प्रचार कोरो.

²⁶ एने तीना भेद काजे जे टेमोन एने पिढीसी लिखाय रोयो बाकीन हिमी तीनाक तीनु चुखला माणसो पोर होयलो छे.

²⁷ जीनु पोर परमेश्वर प्रकट कोरणेन कोऱ्यु तीनुक ग्यान जोळे कि दिसरा जातीमा तीना भेदोकाजे महिमान किमोत काय छे, एने चू जो छे कि मसिह जू महिमान आस छे तुमरेमा रोयतलु छे.

²⁸ जेरी वारली खोबर कोरीन आमु होसात माणसोक जोताळतला कि आमु हर एक माणसो काजे मसिहमा पाको कोरीन उबराखो.

²⁹ इनान कोरता मे तेरी तिनी ताकतोन अनसारे जू मारेमा ताकत साते ओसोर पाळे, ती तनमोन लागाळीन मेहनत बी कोरतेलू छे.