प्रेषित 9 - बारेली पावरी

शौउलोन मन बदलनो

¹ शाउल ते हांजू तोक प्रभून चेला काजे धमकी देणे एने मारनेन घातमा होतु, महायाजकोनचा गोयू.

² एने चू दमिश्क प्रार्थना घोरोन नावो पोर इनी विचारो पोर चिठ्या मांग्यू कि काहना माणसे काहना बायरा जीनुक चू इना पंथमा देख्यू तीनुक बांधीन यरुशलेममा ली आवे.

³ बाकीन चू चालतु-चालतु जेतार चू दमिश्कोन साते पुग गोयू, ती उचकालुन, सोरगोमा गोथा तेरे चारू धोळे विजावू चोमके.

⁴ एने चू धोरती पोर हिट पोळ्यु एने यु बुल सोमव्यू, “हे शाउल हे शाउल तू मेसेक काहा सोतावलू छे?”

⁵ चू पुछु, “हे प्रभू, तू कून छे?” चू कोयू, “मे येसु छे जीनुक तू सोतावलू.

⁶ बाकीन हिमी सोहोरमा उठीन जा, एने जो तुसेक कोरनो छे चो तुसेक कोयीस.”

⁷ जे माणसे तीना पुठी होता, चे भोंगलाय गोया; काहाकि बुल ते सोमवता होता पुन कुदा काजे देखता नि होता.

⁸ तेत्यार शाउल धोरती पोर गोथू उठ्यू, बाकीन जेतार डूवा उगळ्या ती तीनाक काय देखाय नी पोळ्यो, एने चे हेरु हात धोरीन दमिश्कोमा लीगोया.

⁹ चू तीन दाहळा तोक नी देख सोक्यू, एने नी खादु एने नी पिदू.

शाउलोंन बाप्तिस्मा

¹⁰ दमिश्कोन हनन्या नावोन एक चेलु होतु तीना काजे प्रभू दर्शन मा कोयलु “हनन्या!” चू जवाब आप्यू, “प्रभू देख मे या छे.”

¹¹ प्रभू तीना काजे कोयू, “उठीन तिनी गोविमा जा जी सुदी कोवायती होती, एने यहुदान घोर जायीन शाउल नावोन एक तरसुसमा रोयने वावान बारामा पुछपाछ होयो काहाकि देख चू प्रार्थना कोरणे बाज रोयू.”

¹² एने चू दर्शन मा हनन्या नावोन एक माणसो काजे माहाय आवतू एने आपनो पोर हात मेकायतलु देख्यू, जीनासी कि चू एने पोछु देख सोके बाकीन हनन्या जोवाब आप्यू.

¹³ हनन्या जवाब आपी, हे प्रभू मी लोकेत इना माणसोन बारामा सोमवाळलू छे कि यु यरुशलेममा तारा चुखला माणसो काजे कोतरू नुकसान कोरलु छे.

¹⁴ एने या भी तीनाक पुजारू जुव गोथू होक जो जोळलु छे कि जेरो नाव लीन रोया तीनु आखा काजे बंदी बनाय लेये.

¹⁵ बाकीन प्रभू कोयू, “तू जात रोय; काहाकि यो ते दिसरा जातीन एने राजान एने इस्राईलोन सामने मारो नाव लेनेन मार नेवाळलु ठहरुलु छे.”

¹⁶ एने मी तीनाक देखाळीस कि मारा नावोन कोरीन तीनाक कोतरो दुख सहन कोरनो पोळसे.

¹⁷ तेत्यार हनन्या जायीन तीना घोरोमा भोरायू एने तिना पोर हात मेकीन कोयू, “भाश शाउल, प्रभू येसु जू तुसेक वाट्ये जिने तू आवतू होतु दर्शन आप्यू, चू मेसेक तारेनचा मूकल्यु कि तू पोछु देखणे बाज जाये एने पवित्र आत्मासी पुरू मोराय जाय.”

¹⁸ तेत्यार तेतारुत शाउलोन डूवामा गोथा खीपऱ्यान सारखो पोळ्यो एने चू पोछु देखणे बाज गोयू आवते चू उठीन बाप्तिस्मा लेदू.

¹⁹ तेत्यार खाणो खायीन तीनाक ताकत जोळी. ओवतेन चू लोकेत दाहळा तोक तीनु चेलानु पुठी रोयू जे दमिश्कमा होता.

शोउलोन लारे येसुन प्रचार

²⁰ “एने चू मामार प्रार्थना घोरमा येसुन प्रचार कोरणे बाज गोयू, युत परमेश्वरोन पुऱ्यु छे.”

²¹ आखा सोमवने वावा भोंगलायीन कोयने बाज गोया, “काय यु चू ते नि होय यु यरुशलेममा यो नाव लेणे वावाक नाश कोरतू होतु, एने या इनी वातोसी आवलु होतु कि बाकीन पुजारानचा ती जाणे?”

²² बाकीन शाउल एने ताकतवान होयतू होतु एने पोटाळ देदु कि मसिह युत छे, दमिश्क रोयने वावा यहुदिन मूय बंद कोरतू गोयू.

²³ जेतार लोकेत दाहळा जात रोया ती यहुदि आखा मेवीन तीनाक मारनेन डाव धोऱ्या.

²⁴ बाकीन शाउल काजे तिंदरू योजना मालूम पोळ गोयू चे तीनाक मारनेन कोरीन रात दाहळू फाटकोण चा पोळ रोया होता.

²⁵ बाकीन तेरा चेला रातीन तीनाक एक खिल्लामा बोसाळीन सोहोरोन कोट गोथा नेचा उतार लाव्या.

²⁶ यरुशलेममा आवीन चू चेला काजे भेटनेन कोशिश कोरणे बाज गोयू बाकीन चे आखा तीनाक बिहीता होता एने तीनुक भुरसू नि होतु कि यु बी चेलु छे.

²⁷ बाकीन बरनाबास तीनाक आपने पुठी प्रेषितोन चा लीजायीन तीनुक कोयु कि यु काहनास रितीसी वाटे प्रभू काजे देख्यू एने चू इना पुठी वाते कोऱ्यु, एने यो कि दमिश्कमा चू कोसू हिंमतसी येसुन प्रचार कोऱ्यु.

²⁸ चू तिंदरे पुठी यरुशलेममा आवतू जातु एने हिंमतसी येसुन नावोन प्रचार कोरतू गोयू.

²⁹ एने युनानी भाषा यहुदि पुठी वात एने जोखळी पोळतू होतु बाकीन चे तेरी हत्या करनेन कोशिश कोरणे बाज गोया.

³⁰ बाकीन जेतार भाशोनुक मालूम पोळ गोयो ती चे तीनाक कैसरीयामा लीगोया, ओवतेन चे तीनाक तरसुस मुकली देदा.

³¹ आखरी आव्या यहुदि, गलील एने सामरिया मंडवी काजे शांती जोळी, एने तेरी बोढती होयती गोयी, एने ती प्रभून बिक मा चालती एने पवित्र आत्मासी बोढती गोयी.

³² आवते ओसो होयो कि पतरस तीना आखा पाहटा मायला चुखला माणसोनचा पुग्यू, जा लुद्दामा रोयता होता.

³³ चा तीनाक ऐनियास नावोन लखवा बिमारी वावाक एक जोन भेट्यू जू आठ सालोन गोथू खाटलामा पोळलु होतु.

³⁴ पतरस तीना काजे कोयू, “ऐनियास कोयू येसु मसिह तुसेक वारू कोरणे बाज रोयू उठ आपनु चादरा वारू कोर” चू तेतारुत उठीन उभू रोय गोयू.

³⁵ तेत्यार लुद्दा एने शारोनमा आखा रोयने वावा तीनाक देखीन प्रभू भूनी फिऱ्या.

³⁶ यापोमा तबीता मतलब दुर्कस नावोन एक चेला रोयती होती जी बाय हमेशा वारला-वारला कामे एने दान कोऱ्या कोरती होती.

³⁷ तीनु दाहळामा ओसो होयो कि ची मांदली पोळीन मोर गोयी, एने चे तिनी काजे उंगवावीण माहाय वावा घोरमा मेक देदा.

³⁸ इनान कोरता कि लुद्दा, यापे साते होतु, चेला यो सोमवीन कि पतरस वा छे, दुय माणसोक तेरेनचा जी विनता कोरणे मूकल्या, आमरेनचा आवने वारमा लागाळे.

³⁹ तेतार पतरस उठीन तिंदरे पुठी चाल पोळ्यु जेतार चू पुग्यू ती चे तीनाक उपोर घोरमा लीगोया आखा रोंडायला बायरा रोडता जाईन तेरेनचा आवीन उबरोय गोया एने डोगला एने छिंदरा दुर्कस तिंदरे साते रोयीण बोनाव्या कोरती होती, चे तीनाक देखाळने बाज गोया.

⁴⁰ तेत्यार पतरस आखा काजे बारथे निकाव देदु एने मांडा टेकाळीन प्रार्थना कोऱ्यु एने धोळ काजे देखीन कोयू “हे तबीता उठ” तेतार ची आपना डूवा उगाळ लेदी एने पतरस काजे देखीन उठ बोसी.

⁴¹ चू तेरु हात तिनीक आपीन उठाळ्यू एने चुखला माणसो एने रोंडायलानुक बुलावीन तिनीक जीवतली सोप देदु.

⁴² यो वात पुरा यापमा पोसोरी गोयी, एने घोणा सोवटा माणसे प्रभू पोर भुरसू कोऱ्या.

⁴³ एने पतरस यापमा चामळान धोंदु कोरणे वावाक शिमोन नावोन माणसो साते लोकेत दाहळा तोक रोयू.