प्रेषित 8 - बारेली पावरी

शाउलोन विस्वास्यापोर जुलूम

¹ शाउल तेरी मोत सी सहमत होतु, तिने दाहळे यरुशलेमोन मंडवी पोर मोटूत छोळोन सुरवात होय गोयी एने प्रेषितोन काजे छुळीन आखान आखा यहुदिया एने सामरिया देसोमा तितर-बीतर होय गोया.

² काहनास भक्त माणसे स्तेफन काजे मोळवाट्यामा मेक्या एने तेरेन कोरता दुख कोऱ्या.

³ शाउल मंडवी काजे उजाळने बाज रोयू होतु; एने घोर घोरमा भोराईन माणसोक एने बायराक धोरीन घीसी घीसीन बंदी वाळामा नाखतू होतु.

साम्रीयामा फिलीपूस

⁴ जे तितर बीतर होयला होता, चे वारली खोबर सोमवाळता फिऱ्या,

⁵ एने फिलीप सामरिया सोहोरमा जायीन माणसोमा मसिहन प्रचार कोरनेन बाज गोयू.

⁶ जे वाते फिलीप कोयू तीनुक माणसे सोमवीन एने जे चिन्ह चे देखता होता चे देख देखीन ध्यान लागाळीन मोन लागाळया.

⁷ काहाकि घोणा सोवटामा गोथा भुंडली आत्मा मोटोत आवाज कोरीन आयळती जायीन निकवी गोयी, एने लोकेत लखवान बिमारी एने लेंगळा बी वारू कोराय गोया;.

⁸ एने तिना सोहोरोमा मोटीत खुशी आव गोयी.

शमौन जादुगार

⁹ इनान पेहेले इना सोहोरोमा शिमोन नावोन एक माणूस होतु, जू जादू मोंतोर कोरीन सामरिया माणसोक खुश कोरीन एने खुदो काजे एक मोटूत माणूस देखाळतू होतु.

¹⁰ नाना मोटला तोक तेरु मान कोरता होता, “यु माणूस परमेश्वरोन जी ताकत छे जी महान कोवायतेली छे.”

¹¹ चू घोणा दाहळामा तीनुक जादून कामोमा वाहरायाला कोर रोयू होतु, इनान कोरता चे तीनाक घोणा मानता होता.

¹² बाकीन जेतार चे फिलीपोन भुरसू कोऱ्या एने परमेश्वरोन राजोन एने येसु मसिहन नावोन वारली खोबर सोमवाळतू होतु ती माणसे, काय बायरा बाप्तिस्मा लेणे बाज गोया.

¹³ तेत्यार शिमोन खुद भी भुरसू कोऱ्यु एने बाप्तिस्मा लीन फिलीपोन पुठी रोयने बाज गोयू चू चिन्ह एने मोटा-मोटा मोटला काम होयतला देखीन नोवलाय कोरता होता.

शमौनन पाप

¹⁴ जेतार प्रेषितोन जे यरुशलेममा होता, सोमव्या कि सामरिया परमेश्वरोन वचनमा लेदला छे ती पतरस एने योहान काजे तिंदरेनचा मुकल्या.

¹⁵ योहान एने पतरस जायीन तिंदरेन कोरीन प्रार्थना कोऱ्या कि पवित्र आत्मा जुळे.

¹⁶ काहाकि पवित्र आत्मा हिमी तोक तिंदरे माहीन कुदा पोर नि उतरलु होतु चे निस्ता प्रभू येसुन नावोसी बाप्तिस्मा लेदला होता.

¹⁷ तेत्यार चे तिंदरे पोर हात मेक्या एने तीनुक पवित्र आत्मा जोळ्यू.

¹⁸ जेतार शिमोन देख्यू कि प्रेषितोन हात मेकनेसी पवित्र आत्मा आपायतलु, ती तिंदरेनचा रुप्या लावीन कोयू,

¹⁹ “यु ताकत मेसेक बी लावू, कि जीनु कुदा पोर हात मेक तीनाक पवित्र आत्मा जोळे.”

²⁰ पतरस तीनाक कोयू, “तारा रुप्या तारे पुठी नाश होये, काहाकि तू परमेश्वरोन दान रुप्यासी मुले लेनेन विचार कोऱ्यु.”

²¹ इनी वातोमा नि मारू हिस्सू होय, नि वाटू; काहाकि तारो मोन परमेश्वर सामने सुदी नि होय.

²² इनान कोरता इनी बुराईसी पश्चताप कोरीन प्रभू काजे प्रार्थना कोर होय सोकसे तारा मोनोन विचारोन माफ कोराय जासे.

²³ काहाकि मे देख रोयू कि तू बासोन तोसी कळवी जेहेर एने अधोरमी बंधनमा पोळ रोयू.

²⁴ शिमोन जोवाब आप्यू, “तुमु मारेन कोरीन प्रभूनचा प्रार्थना कोरु कि जे वाते तुमु कोया ती इंदरे माईन काहनास मार पोर नि आवीन पोड जाय.”

²⁵ आखरी, चे गोवायी आपीन प्रभून वचन सोमवाळीन यरुशलेममा पोछा जात रोया, एने सामरी घोणा सोवटा गावोमा वारली खोबर सोमवाळता गोया.

कुसोन खजिनदार काजे फिलीप्पुसोन प्रचार

²⁶ ओवतेन प्रभून एक सोरग दूत फिलीप काजे कोयू, एने दोक्षीन दिशा भूनी वाटी पोर जा, जी यरुशलेममा गोथी गाजा भूनी जातली जी रेवतावावी वाट छे.

²⁷ चू उठीन चाल पोळ्यु, एने देख्यू कुश देसोन एक माणूस आवने बाज रोयू होतु, जू खोजा एने कुशोन राणी कन्दाकेन मंत्री एने खजिनदार होता, एने आराधना कोरणे यरुशलेममा आवलु होतु.

²⁸ चू आपना रोथ पोर बोसलू होतु एने यशयाह भविष्य कोरतान किताब वाचतु जायीन पोछु जाणे बाज रोयू होतु.

²⁹ तेत्यार आत्मा फिलीप काजे कोयू, “साते जायीन इना रोथ पुठी जा.”

³⁰ फिलीप तेरा भूनी दोवळ्यु एने यशयाह भविष्य कोरतान किताब वाचतलू सोमव्यू एने पुछु, “जो तू वाचणे बाज रोयू काय तीनाक सोमजतलु कि”

³¹ चू कोयू, “जेतार तोक कुदू मेसेक सोमजाडने ती मे कोसू सोमजो?” एने चू फिलीप काजे विनता कोऱ्यु कि चू उपोर चोळीन तेरेनचा बोठे.

³² पवित्र शास्त्रान जू अध्याय चू वाचतु होतु, चू यु होता “चू गाडरान तोसु काटायने कोरता मुकलाय गोयो एने जोसो गाडरो तेरा झोटा काटने वावान सामने चूपचाप रोयतलु, तोसुत चू बी चुपचाप रोयू,

³³ तेरी नम्रतामा तेरु न्याय नि होय सोक्यू एने तेरे टेमेन माणसोन वर्णन कून कोरसे काहाकि धोरतीमा गोथू तेरु जीव उठाळ लेतलू.”

³⁴ इनापोरसी अधिकारी फिलीप काजे पुछु, “मी तुसेक विनता कोरो कि, यो देखाळ भविष्य कोरता यो कुनीन बारामा कोयतेला, आपना कि कुदा दिसरान बारामा?”

³⁵ तेत्यार फिलीप आपनो मूय उगाळ्यु एने इना पवित्र शास्त्रान सुरवात कोरीन तीनाक येसुन वारली खोबर सोमवाया.

³⁶ वाटे चालता-चालता चे एक पाणीन जागा पोर पुग गोया तेत्यार ग्यानी कोयू, “देख चा पाणी छे, हिमी मेसेक बाप्तिस्मा लेनेमा काय रुकावट नि होय.”

³⁷ फिलीप कोयू, “ओगर तू पुरा मोनोसी भुरसू कोरलु ती ली सोकतलु,” चू जोवाब आप्यू, “मे भुरसू कोरतेलू कि येसु मसिह परमेश्वरोन पुऱ्यु,.”

³⁸ तेत्यार चू रोथ उभराखीन आपना आदमी एने फिलीप एने अधिकारी दुयू पाणीमा उतरी पोळ्या एने चू अधिकारी काजे बाप्तिस्मा आप्यू.

³⁹ जेतार चे पाणीमा गोथा निकवीन उपोर आव्या ती प्रभून आत्मा फिलीप काजे चूटली गोयू एने चू अधिकारी तीनाक नि देख्यू एने चू खुशी कोरतू जायीन आपने वाटे चाल पोळ्यु.

⁴⁰ फिलीप अशदोद मा आव लाग्यू, एने जेतार तोक कैसरमा नि पुग्यू तेत्यार तोक नोगोर गाव वारली खोबर सोमवाळतू गोयू.