प्रेषित 7 - बारेली पावरी

महासभामा स्तेफनुसोन भाषण

¹ तेत्यार महायाजक, कोयू, “काय जे वाते खोरला छे?”

² स्तेफन कोयू “हे भाशो, एने बासो सोमवू आपनु बास अब्राहाम हराण मा बोसनेन पेहेले जेतार मेसोपटेमीयामा होता; ती विजावू परमेश्वर तीनाक दर्शन आप्यू.

³ एने तीनाक कोयू, तू आपना देसोमा एने आपना भायबेटामा गोथू निकवीन तिना देसोमा जा जीनाक मे तुसे काजे देखाळीस.

⁴ तेत्यार चू खास्दान देसोमा जायीन हराण मा जायीन रोयु तेरा बासोन मोरनेन बादमा, परमेश्वर तीनाक चा गोथू इना देसोमा लावीन रोयलु जीनामा हिमी तुमु वस रोया.

⁵ एने तीनाक काहीन वाटू नि ते पाय भी तीनामा जागू नि आप्या, बाकीन वायदू आप्यू कि मी जो देस तारो एने तारे ओवतेन पोयदावारीन हातोमा कोर दिस; हांजू तोक तिनी टेमे तेरा कुदू पुऱ्या बी नि होता.

⁶ एने परमेश्वर जो कोयू, तारा पुऱ्यान माणसे पारका देसमा पोरदेशी रोयसे, एने चे तीनु काजे दास बोनावसे एने चार सौ साल तोक दुख तोकलीत देसे.”

⁷ ओवतेन परमेश्वर कोयू, “जिना जातीन चे नोकऱ्या होयसे तीनुक मे दोंड आपीस एने तिंदरेन ओवते चे आवीन तिना जागामा मारी आराधना कोरसे.”

⁸ एने चू अब्राहम काजे सुंतान वायदू कोऱ्यु; एने इना देसोमा इसाहाक तीनासी पोयदा होयु एने आठ दाहळामा तेरी सुंता कोराय गोयी; एने इसाहाकसी याकुब एने याकुबसी युसूफ बारा कुळपती पोयदा होया.

⁹ “चे कुळापती युसूफ पोर डाव धोरीन तीना मिसर देसोमा जाणेवावान हाते वेच देदा, बाकीन परमेश्वर तेरु पुठी होतु”

¹⁰ एने तीनाक तेरा आखा तोकलीतमा गोथू छुळावीन मिसर देसोन राजा फारोन नोजोरमा दया एने ग्यान देख्या, एने चू तीनाक मिसोर पोर एने आखा घोरोन अधिकारी बोनाव्यू.

¹¹ तेत्यार मिसर एने कनानोन आखा देसमा काव पोळ्यु; जीनामा भारी दुख होयो एने आपना बाप दादानू काजे दाणा नि जोळतो होतो.

¹² बाकीन याकुब यो सोमवीन मिसर देसमा दाणा छे आपना बाप दादानू काजे पेहेली कावा मूकल्यु.

¹³ दिसरे कावा युसूफ खुदो काजे आपना भाशो काजे देखाळ्यू एने योसेफोन जात फारो काजे मालूम पोळ गोयी.

¹⁴ तेत्यार युसूफ आपनु बास याकुब एने आपनु आखो परिवार काजे जे पिंच्यातोर जोना होता बुलाव्यू.

¹⁵ तेत्यार याकुब मिसर देसमा गोयू; एने चा आपना बाप दादा मोर गोया.

¹⁶ एने या पुगाळता जाईन तीना मोळवाट्यामा मेक्या जीनाक अब्राहाम चांदी आपीन शेकेममा हमोरोन पुऱ्यान जुव मुले लेदलु होतु.

¹⁷ बाकीन जेतार चू वायदू पुरू होयनेन टेम साते आवी जो परमेश्वर अब्राहाम पुठी कोरलु होतु ती मिसर देसमा चे माणसे बोळ गोया एने घोन सोवटा होय गोया.

¹⁸ तेत्यार मिसर देसमा दिसरू राजा आव्यु जो युसूफ काजे नी उवखतू होतु.

¹⁹ चू आमरा जात पोर हुशारी कोरीन आमरा बाप दादा ते पुढी या तोक बुरु व्यहवार कोऱ्यु कि तीनु काजे आपना पुऱ्या काजे नाखनो पोळ्यो कि चे जीवता नी रोये.

²⁰ तिने टेमे मुसा पोयदा होयू, चू परमेश्वरोन नोजोरमा घोनु घाटावू होतु, चू तिन मोहनेतोक आपना बासोन घोरमा रोयू.

²¹ जेतार नाख देदा ती फारोन पुराय तीनाक चूट लेदी, एने आपनु पुऱ्यु बोनावीन पावी.

²² एने मुसा काजे मिसरीन आखी विद्यान वाचणे लागाळयु, एने चू वचन एने काम दुयोमा ताकत वावू होतु.

²³ जेतार मुसा चावीस सालोन होय गोयू, ती तेरे मोनोमा आव्यु कि मे आपना इस्राईल भाशोसी भेटो.

²⁴ चू एक माणसो पोर अन्याय होयतलु देखीन तीना काजे वाचाड्यू, एने मिसरी माणसो काजे लोळायानेन बोदलू लेदू.

²⁵ चू विचार कोऱ्यु कि तेरा भाशे समजसे कि परमेश्वर तेरे हातोसी तिंदरू छुटकारू कोरसे, बाकीन चे नि सोमज्या.

²⁶ दिसरे दाहळे जेतार चे तिंदरे-तिंदरेमा लोळायता होता ती चू चा आव लाग्यू एने यो कोयीन मेवावने कोरता सोमजाडयु “हे माणसो तुमु ते भाश-भाश छे, एक दिसरा पोर काहा अन्याय कोरतेला?”

²⁷ बाकीन चू आपना साते वावा पोर अन्याय कोरतू होतु, चू तीना काजे यो कोयीन धोकली देदु, “तुसेक कून आमरेपोर अधिकारी एने नियाव कोरने वावु ठेरावलु छे?”

²⁸ काय जिनी रितीसी तू काल मिसरी माणूस काजे मार नाख्यू मेसेक बी मार नाखनेन कोर रोयु.

²⁹ जी वात सोमवीन मुसा ढाश्यु एने मिद्यान देसोमा पोरदेशी बोनीन रोयने बाज गोयू एने तेरा दुय पुऱ्या पोयदा होया.

³⁰ “जेतार पुरा चावीस साल होय गोया, ती एक सोरगो दूत सिनाय बोयळान उजाळीमा तीनाक धोपतला झाडोन आगठामा दर्शन देखाळ्यू.”

³¹ मुसा यो दर्शन देखीन वाहराय गोयू एने जेतार देखनेन कोरीन चू साते गोयू ती प्रभून जी आवाज होई.

³² मी तारा बाप दादान अब्राहामन इसाहाकोन एने याकुबोन परमेश्वर छे, तेत्यार ते मुसा कापणे बाज गोयू, एने या गोथू तोक कि तीनाक देखनेन हिंमत नि रोयी.

³³ तेत्यार प्रभू तीनाक कोयू, आपना पायोमा गोथू खासळा निकाव ले, काहाकि जिना जागो पोर तू उबरोय रोयू चू चुखलु जागू छे.

³⁴ मे छाचलीन आपना माणसोन जे मिसरमा छे तोकलीत देखलू छे; एने तिंदरा ठुसका एने रोडनो सोमवलू छे; इनान कोरता तीनु काजे छुळावनेन कोरता उतरी रोयू, हिमी आव मे तुसेक मिसरमा मुकलीस.

³⁵ जिना मुसा काजे चे यो कोयीन नाकारता होता, तुसेक कून आमरेपोर अधिकारी एने नियाव कोरने वावा ठेरावलू छे? तीना काजे परमेश्वर अधिकारी एने छुळावनेवावू ठेरावीन, तीना सोरग दूतोन लारे जू जीनाक झाड्क्या दर्शन देदलु होतु मूकल्यु.

³⁶ युत माणूस मिसर देस एने रातलो दोरीयान एने बोयळामा चावीस साल तोक नेवलायन काम एने चिन्ह देखाळीन तीनुक निकावीन लाव्यू.

³⁷ चू मुसा छे जू इस्राईल माणसो काजे कोयू, “परमेश्वर तुमरा भाशोमा गोथू तुमरेन कोरता मारू सारखु एक भविष्य कोरता उभू राखसे.”

³⁸ यु चू छे उजाळीमा सोळविण इचमा चू सोरगोन दूत पुठी सिनाय बोयळा पोर तीना पुठी वाते कोऱ्यु एने आमरा बाप दादान होतु तीनाक जीवतलो वचन जोळ्यो कि आमरेनचा तोक पुगाळे.

³⁹ बाकीन आमरा बाप दादा तेरी माननेन मोर्जी नि होती, पुन तीनाक लावीन आपना मोने मिसरभूनी फेरावीन,

⁴⁰ एने हारुन काजे कोया, आमरेन कोरीन ओसु देवता बोनाव जो आमरे ओगोव-ओगोव चाले, काहाकि यु मुसा आमुक मिसर देसोमा गोथू निकाव लाव्यू आमुक नी मालूम तीनाक काय होय गोयो.

⁴¹ तीनु दाहळामा चे एक केवळो बोनावीन तेरी मूर्ती ओगोव बलि चोळाव्या, एने आपना हातोन काम पोरसी खुशी कोरणे बाज गोया.

⁴² आखरी, परमेश्वर मूय फेरवीन तीनुक छुळ देदु, कि सोरग मायला सेना काजे आराधना कोरनो, जोसो भविष्य कोरतान किताबमा लिखलो छे हे इस्राईलोन घोराना काय तुमु बोयळामा चावीस साल तोक जनावरोन बलि एने अनाजोन बलि मेसे काजे चोळाव रोयो कोरीन

⁴³ तुमु मोलखान तंबू एने रेफाम देवता काजे लीन फिरता होता, मतलब इनू मुर्त्याक जीनुक तुमु नोमोन कोरनेन कोरता बोनावला होता आखरी मी तुमुक बाबेलोन पोहोरले धोळे ली जाईन बोसाळीस.

⁴⁴ “गोवान तंबू बोयळामा आमरा बाप दादान इचमा होतु, जोसू चू ठेरावलू. जू मुसा काजे कोयू ‘जो आवीन तू देख्यू, तेरेन तोसो तू बोनाव.’”

⁴⁵ तीना मंडप काजे आमरा बाप दादान पेहेला सालोसी लीन योहोशू साते या ली आया; जिने टेमे ची तीनु दिसरा जाती पोर होक जोळ्या जीनुक परमेश्वर आपना डाहा-डाहान सामने गोथू वाहवी देदु, एने चू तंबू दाऊदन टेमे तोक रोयू.

⁴⁶ इनापोरसी परमेश्वर दया कोऱ्यु; आखरी चू विनता कोऱ्यु कि याकुबोन परमेश्वरोन कोरीन घोर जागू बोनावे.

⁴⁷ सुलेमान तेरेन कोरीन घोर बोनाव्यू.

⁴⁸ बाकीन परमप्रधान हातोन बोनावला घोरोमा नी रोयतलु जोसू कि भविष्य कोरतान लारे कोयलु,

⁴⁹ प्रभू कोयतेला, सोरग मारो सिहासन एने धोरती मारी पायो तोवेन जागू छे, मारेन कोरता तुमु काहना रितीन घोर बांधसु? एने मारा आरामोन कानलु जागो रोयसे

⁵⁰ काय आखा चीजे मारी हातेन बोनावली नि होय?

⁵¹ “हे हट्टी माणसो तुमरा मोने कानटान बिना सुंता माणसो, तुमु हमेशा पवित्र आत्मान खिलाप कोरतेला जोसा तुमरा बाप दादा कोरता होता, तोसात तुमु बी कोरतेला.”

⁵² भविष्य कोरता मायला कुदा काजे तुमरा दादान खिलाप कोऱ्या? चे इना धोरमीन आवनेन पेहेलेसी संदेश आपने वावाक मार नाख्या; एने हिमी तुमु बी तीनाक धोरावने वावा एने मारणे वावा होय जा.

⁵³ तुमु सोरग दूतोन लारे ठेरावला नियम ते मान्या बाकीन चे पाव्या नि.

स्तेफनुस काजे मारनो

⁵⁴ जे वाते सोमवीन चे कुहराया एने तीना पोर दात कोकळावने बाज गोया.

⁵⁵ बाकीन चू पवित्र आत्मासी भोरायीन सोरग भूनी देख्यू एने परमेश्वरोन महिमा काजे एने येसु काजे परमेश्वरोन जेवळे धोळे उभू रोयतलु देखीन

⁵⁶ कोयू, “देखू मी सोरग काजे उगाळलो एने माणसोन पुऱ्या काजे परमेश्वरोन जेवळे धोळे उबरोया देखणे बाज रोयू.”

⁵⁷ तेत्यार चे मोटोत आवाजसी आयळीन कानटा बोंद कोर लेदा, एने एखठात तीना काजे विलगीगोया.

⁵⁸ एने तीनाक सोहोरोन बारथे निकावीन तिना काजे दोगळा देणे बाज गोया, “एने गोवाने आपनेवावा आपना छिंदरा शाउल नावोन एक जुवानोन पायोंचा निकावीन मेक देदा”

⁵⁹ चे स्तेफन काजे दोगळा देता, होता एने चू यो कोयीन प्रार्थना कोरतू रोयू, “हे प्रभू येसु मारी आत्मा काजे स्वीकार कोर.”

⁶⁰ एने मांडा टेकविन उचात बुलोमा आयळू, “हे प्रभू यो पाप इंदरे पोर झुन लागाळे एने यो कोयीन चू मोर गोयू.”