प्रेषित 5 - बारेली पावरी

चुखली आत्माक झूट मेकनो

¹ हनन्या नावोन एक माणूस होतु एने तेरी लाडी, सफीरा जे थुलिक जागा वेच्या.

² एने तिना दामोमा गोथो थुलोक राख लेदा; एने जी वात तीनुक मालूम होती, एने एक वाटू लावीन प्रेषितोन पायोन ओगोव लावीन मेक देदू.

³ पतरस कोयू हे हनन्या! भुतडो तारा मोनोमा जी वात काहा नि कोयू कि तू पवित्र आत्माक झूट बुलने एने जागान दामोमा गोथो काहीन निकावीन मेक लेदू.

⁴ जेतार तोक ची तारेनचा होती काय ची तारी नि होती? एने आखी वेचाय गोयी ती काय तारा ताबाम नि होतो? तू जी वात तारा मोनोमा काहा लाव्यू? तू माणसोक नि बाकीन परमेश्वर काजे झूट मेक देदलु छे.

⁵ जी वाते सोमवतात हनन्या पोळ गोयू एने जीव छुळ देदु, एने आखा सामने वावाक बिक भोराय गोयी.

⁶ ओवतेन जुवान्या उठीन तेरी धोळपोर कापळो लावीन बारथे ली जाईन गाळ देदा.

⁷ लगभग तीन घोंटामा तेरी लाडी जो काय होयलो होतो, नि सोमजीन माहाय आवी.

⁸ ती पतरस तिनी काजे कोयू, “मेसेक देखाळ काय तुमु चू जागू ओतरामात वेचला छे?” ची कोयी “हाव ओतरातमा.”

⁹ पतरस तिनी काजे कोयू, “जी काय वात छे कि तुमु दुय प्रभून आत्मान पारख कोरीन एकी कोऱ्या? देख तारा लाडा काजे गाळनेवावा झोपला पोरुत उबरोयला छे एने तुसे काजे बी बारथे लीजासे.”

¹⁰ तेत्यार ची तेत्यारुत तेरे पायोमा पोळ गोयी एने, जीव छुळ देदी; एने जुवान्या माणसे माहाय आवीन तिनीक मोरली देख्या एने बारथे लीजायीन तेरा लाडा साते गाळ देदा.

¹¹ आखो मंडवीमा इनी वातोक आखा सोमोवनेवावा पोर घोन मोटी बिक भोराय गोयी.

प्रेषितोन लारे चिन्ह चमत्कार

¹² प्रेषितोन हातोसी घोनी चिन्ह एने चमत्कार माणसोन इचमा देखायता होता एने चे आखा एक विचारोसी सुलेमानोन देवळी पोर एखठा होयता होता.

¹³ बाकीन कुदान हिंमत नि होयती होती कि तीनुमा जाय लागे; ते बी माणसे तिंदरी बोढाई कोरता होता.

¹⁴ भुरसू कोरणे वावा घोणा सोवटा माणसे एने बायरा परमेश्वरोन मंडवीमा जादा आकळासी बोढता गोया.

¹⁵ न्या तोक कि माणसे मांदला काजे वाटी पोर लावीन खाटला पोर लुटाळ देता होता एने जेतार पतरस आवे ती तेरु सहावू तिंदरे काहनास पोर पोळ जाय,

¹⁶ यरुशलेमोन आस पासोन देसोमा गोथो बी घोणा सोवटा माणसे बिमारी एने भुंडली आत्मा भोराईन लावीन एखठा होयता होता एने आखा वारू होय जाता होता.

प्रेषित काजे जेलमा नाखनो

¹⁷ तेत्यार महायाजक एने तेरा आखा साती जे सदुकीन जातीन होता रीसवाय गोया.

¹⁸ एने प्रेषित माणसो काजे धोरीन जेलमा बोंद कोर देदा.

¹⁹ बाकीन राती परमेश्वरोन एक सोरग दूत बंदी वाळान झोपलु उगाळीन तीनु काजे बारथे लावीन कोयू.

²⁰ “जावू मंदीरमा उबरोयीन इनी जीवनोन आखी वाते माणसो काजे सोमवाळू.

²¹ चे यो सोमवीन विजावो होयतेत मंदीरमा जायीन प्रचार कोरणे बाज गोया.” तेत्यार महायाजक एने तेरा साती आवीन महासभान एने इस्राईलोन आखा पुढारी एखठा कोऱ्या, एने जेलखानामा कोय मुकल्या कि तीनु काजे लीन आव.

²² बाकीन सिपायळा चा पुगीण जेलखानान तीनुक नि जोळ्या, एने पोछा आवीन जो संदेश आप्या.

²³ आमु जेलखाना काजे ध्यान लागाळीन बोंद कोरला होता एने राखवाव्या काजे बारथे झोपला पोर उबरोयलु देख्या; बाकीन जेतार देख्या ती माहाय कुदु नी जोळ्यो.

²⁴ जेतार मंदीरोन सरदार एने प्रधान पुजारू जे वाते सोमव्या, जी तिंदरे बारामा चिंता लागी कि तिंदरो काय होयो.

²⁵ तोतरा पोर काहनुस आवीन तीनु काजे कोयू “जीनु काजे तुमु जेलखानामा मेकला होता चे माणसे मंदीरमा उभू रोयीण प्रचार कोरणे बाज रोया.”

²⁶ तेत्यार सरदार सिपायळा साते जाईन तीनु काजे लीन आव्या, बाकीन ताकतसी नि काहाकि चे माणसो काजे बिहीता होता.

²⁷ चे तीनु काजे लावीन महासभान सामने उबराख देदा; तेत्यार महायाजक तीनुक पुछु,

²⁸ “काय तुमु काजे आमु जोताळीन आव्या नी कि तुमु इना नावोसी प्रचार मा कोरु? ते बी देखू तुमु आखा यरुशलेम काजे आपनो प्रचार आपीन भोर देदा, एने तीना माणसोन लुय आमरा माथा पोर लावनेन कोर रोया.”

²⁹ तेत्यार पतरस एने दिसरा प्रेषितोन जोवाब आप्या “माणसोन आग्यासी बोडीन परमेश्वरोन आग्यान पालन कोरनेन आमरो काम छे.”

³⁰ आमरा डाहलान प्रभू येसु जीवाळलु जीनाक तुमु ख्रुस पोर टांगीन मार देदला होता.

³¹ तीना काजे परमेश्वर प्रभू काजे छुटकारू आपन्यु ठेरावीन आपने जेवळे हाते उचू कोर देदू छे, कि चू इस्राईल काजे मोन फिरावनेन ताकत पापोन माफी आप सोके.

³² इनी वातोन गोवा छे तोसोत पवित्र आत्मा बी जीनाक परमेश्वर तीनुक आपलु छे जे तेरी आग्या मानतला छे.

³³ यो सामविन चे रीसवाय गोया एने तीनुक मार नाखनेन कोऱ्या.

³⁴ बाकीन गमलीएल नावोन फरुशी जू नियम शास्त्रध्यापक होतु एने आखा माणसोन ओदर होतु महासभामा उभो रोयीण हुकुम आप्यू कि इनू माणसो काजे थुलिक वारोन कोरीन बारथे निकाव देवू.

³⁵ एने चू तीनुक कोयू, हे इस्राईल तुमु इना माणसोन जो काहीन कोरणे बाज रोया तीनाक विचार कोरीन सोच समजीन कोरु.

³⁶ काहाकि इना दाहळान पेहेले थियूदास जो दावू कोरीन चाल पोळ्यु होतु कि मे बी काहीन छे; एने लगभग चार सौ माणसे तेरे पोछोव चाल पोळ्या होता बाकीन तीनाक मार नाख्या एने तेरा आखा साती वेरा-वेर होय गोया एने मिट गया.

³⁷ तीना माणसोन ओवतेन स्वामी सुमारी ओवतेन गलीलोन डाहालू यहुदा उबरोय गोयू एने चू काहीन माणसो काजे आपने भूनी कोर लेदू चू बी सोर गोयू एने तेरा साती आखा वेर-वेर होय गोया.

³⁸ इनान कोरता हिमी मे बी तुमु काजे कोयो कि इनू माणसोसी नांबेत रोयू एने इंदरे साते काहीन काम मा राखू, काहाकि अगर जो धर्म एने काम माणसोमा गोथो होयतो ती सोर जासे.

³⁹ बाकीन ओगर परमेश्वर तरफसी से ती तुमु तीनु काजे मिटाळ नि सोके, कोबी होसो ती नि होये कि तुमु परमेश्वर साते बी लोळयने वावा ठेरायसे!

⁴⁰ तेत्यार चे तिंदरी वात मान लेदा एने प्रेषितोन काजे बुलावीन देवाळ्या; एने जू आदेश आपीन छुळ देदा कि येसुन नाव एने पोछा लेता झुनी.

⁴¹ चे इनी वातो पोर खुश होईन महासभा ओगोव गोथा जात रोया, कि आमु तेरे नाव कोरता अपमान होयनेन ते ठेहेऱ्या.

⁴² चे दाहळीन मंदीरमा एने घोर-घोरमा प्रचार कोरणे, एने इनी वातीन वारली खोबर सोमावने सी कि येसुत मसिह छे नि रुक्या,.