प्रेषित 28 - बारेली पावरी

माल्टा द्वीप मा पौलुसोन स्वागत

¹ जेतार आमु वाच गोया ती आमु काजे मालूम पोळ्यो कि यु जागू मालटा कोवायतू.

² चा वावा आदिवासी आमरेपोर दया कोऱ्या, पाणी पोळनेसी सेवो लागणे बाज रोयो होतो इनान कोरता चे आगठो धोपाळीन आखान स्वागत कोऱ्या.

³ बाकीन जेतार पौलुस लाकळान गोठू एखठा कोरीन आगठापोर मेक्यू ती आच लागणे सी घोळसु निकवीन तेरे हाते पोर चोसटी गोयू.

⁴ जेतार रहीवासी इना घोळसा काजे तेरा हातो पोर लीपटायला देख्या ती एक दिसरा काजे कोयने बाज गोया छाचलीन यु माणूस खुनी छे ओगर यु दोरीयामा गोथू वाच गोयू ते बी नियाव कोरणे वावू इना काजे जीवतलु नि राखे.

⁵ जेतार चू घोळसा काजे आगठामा झोटकी देदु एने तीना काजे काय धोकू नि होयो.

⁶ जे ते वाट देख रोया होता कि यु सूज जासे नि ती पोळीन मोर जासे बाकीन जेतार चे घोनी टेम तोक वाट देखता रोया एने देख्या कि इना काजे कायबी नि होयो ती आपना विचार बदलीन कोयने बाज गोया कि यु ते काहनुस देवता छे.

⁷ तिना जागान आस पास तिना टापून प्रधान पुबलियुसन जाणू होतु चू आमरो स्वागत कोऱ्यु.

⁸ ओवतेन ओसो होयो कि पुबलियुसन बास सेरीसी एने बारथीन तोकलीतमा बिमार पोळ रोयू होतु, पौलुस तीना काजे देखणे माहाय गोयू एने प्रार्थना कोरीन तेरु हात तीना पोर मेक्यू एने तीना काजे वार कोर देदु.

⁹ इना वातोन ओवतेन द्वीप टापू पोरला दिसरा बिमारी वावा आवीन वारू होयने बाज गोया.

¹⁰ एने चे आमरू भाती-भाती रितीसी आदर सतकार कोरणे बाज गोया जेतार आमु चा गोथा जाणे बाज गोया चे आमरी गोरोजोन आखी चीजे ढोंड्या पोर मेक देदा.

पौलुस रोममा

¹¹ तीन महिनान बाद आमु सिकनदरोन एक जहाजन लारे जाणे बाज रोया, इना टापू पोर सेव्वान दाहळा निकवी गोया होता एने जेरो नाव “जूळवा भाश” दयस्सकुर होतु,

¹² ओवतेन सूरकुसमा लंगर नाखीन आमु तीन दाहळा तोक रोया.

¹³ चा गोथो आमु फिरीन रेगीयोनास आव्या, एने एक दाहळा बाद दोक्षीनो भूनी वाहवी चाली आखरी आमु दिसरे दाहळे पुतियुलीमा आव्या.

¹⁴ चा आमु काजे काहनास भाशे मेव्या जे आमु काजे विनता कोऱ्या कि आमु तिंदरेनचा सात दाहळा तोक रोयजे इना रितीसी आमु रोममा पुग्या.

¹⁵ जेतार भाशे आमरा बातमी सोमव्या ती अप्पियूसोन ती धोरम शाळा तोक चे आमरे साते मेवने आव्या, तीनुक देखीन पौलुस काजे हिंमत आवी कि चू परमेश्वर काजे धन्यवाद कोऱ्यु.

¹⁶ जेतार आमु रोममा पुग्या ती पौलुस काजे एक सैनिक साते तेरो विचारपूस कोरणे वावू ओलोग रोयनेन परवानगी आप्यू.

¹⁷ ओवतेन ओसो होयो कि तीन दाहळान ओवतेन चू यहुदियान डाहला माणूस काजे बुलाव्यू जेतार चे एखठा होया ती चू तीनु काजे कोयू “भाशो कोदि माईन मे आपनी जाती एने आपना डाहलान रिती रिवाजोन खिलाप काहनाबी नि कोऱ्यु, ते बी मे यरुशलेममा गोथु धोरायीन रोमीन हातोमा आपी देदा.”

¹⁸ चे चौकसी कोरणेन सुळीन मेसेक छुळ देणेन कोऱ्या, काहाकि मेसेक मोरोन दोंड देनेन काहीन वोजेह नि होतो.

¹⁹ बाकीन जेतार यहुदि खिलाप कोऱ्या ती मेसेक केसर काजे मांग कोरनो पोळ्यो बाकीन यो नि कि मेसेक आपनी जाती पोर काहनो खिलाप कोरणो छे.

²⁰ इनान कोरता मे विनता कोऱ्यु कि तुमु माणसो काजे मेवो एने वात कोरो काहाकि इस्राईलोन आसोन वजेसी साकव्यामा बंदी वानी छे.

²¹ चे जोवाब आप्या, “नी ते आमुक यहुदियामा गोथो तारे बारामा चिट्ठी जोळी एने नि ती भाशो मायलु तारे बारामा न्या आवीन वात पुगाळ्यु एने नि भुंडली वात कोऱ्या.”

²² बाकीन आमु तारा विचार सोमवनेन मोर्जी राखतला काहाकि आमुक इना पंथोन बारामा यो मालूम छे कि आखे जागे माणसे एरा खिलापमा वाते कोरतेला.

²³ तेत्यार तेरेन कोरता एक दाहळू ठेरावीन घोणा सोवटा माणसे तेरे रोयनेन जागा पोर आव्या परमेश्वरोन राजोन बारामा वारला रितीसी तीनुक सोमजाड्यू एने सोंदारे गोथा सांतोतोक मुसान शास्त्रनियम एने भविष्य कोरतान किताबमा गोथी येसुन बारामा तीनु काजे सोमजाडने कोशिश कोरतू रोयू.

²⁴ कहानास माणसे इनी वातो काजे मान लेदा बाकीन कहानास भुरसू नी कोऱ्या.,

²⁵ जेतार चे एक दिसरा साते सोमजोता नि होया, तेत्यार चे पौलुसोन इना एक वात काजे कोयने पोर चे जात रोया, “पवित्र आत्मा, यशयाह भविष्य कोरतान लारे तुमरा डाहा-डाहा सी वारूत कोया.”

²⁶ जाईन इनू माणसो काजे कोय दे “तुमु सोमवता ते रोयसु बाकीन नि सोमजे; एने देखता ते रोयसु बाकीन तुमु काजे नि देखाये”.

²⁷ काहाकि इनू माणसोन मोने भारा होय गोयला छे चे कानटे कोरीन कम सोमवताला पुन चे आपना डूवा बोंद कोर लेदाला छे ओसो नि होयनो जुवे कि चे डूवे कोरीन देखे एने कानटे कोरीन सोमवे चे एने मोनसी समजे एने ओवतेन मे तीनु काजे वारू कोरो.

²⁸ आखरी तुमु सोमवी लेवू कि परमेश्वरोन यो छुटकारू दिसरा जातीनचा मुकलाय गोयला छे एने चे सोमोवसे.

²⁹ एने चे जे वाते कोय देदु ती यहुदि आपसामा घोणा विवाद कोरता जाईन चा गोथा निकवी गोया.

³⁰ पौलुस आपना भाळेन घोरमा पुरा दुई साल तोक रोयू एने तेरेनचा आवतेला तीनु आखान स्वागत कोरतेलू.

³¹ पुन चू काहना रूकावट हिंमत कोरीन परमेश्वरोन राजोन वारली खोबर प्रचार कोरतु जायन एने प्रभू येसु मसिहन बारामा सीखाळतलु होतु.