प्रेषित 27 - बारेली पावरी

पौलुस काजे रोममा मुकोलनो

¹ जेतार जो पाको होय गोयलो कि आमु ढोंड्यामा इटली जाणेन ती पौलुस काजे एने दिसरा बंदी काजे राजान सेनादलोन युलीयुस नावोक एक सुभेदारोन होवाले कोर देदा.

² एने अद्रमुत्तियुम एक जहाज काजे आसियान वावा जागे गोथो निकवीन जाय अरिस्तर्खुस नावोन थेस्सलुनीकान एक मकीदुनीया आमरे साते होतो.

³ दिसरे दाहळे आमु सिदोनमा उतऱ्या एने युलीयुस दया कोरीन पौलुस काजे तेरा दुस्तोनचा जाणे देदा कि चे तेरी पाहांतराय कोरे.

⁴ चा गोथा आमु ढोंड्यान लारे साईप्रस आडोव होयता जायीन चाल पोळ्या काहाकि वाहवी सामने गोथी होती.

⁵ एने जेतार आमु किलिकिया एने पमफुलीया, दोरीयान धोळे गोथा निकव्या ती लूसिया मूरा पोर उतऱ्या.

⁶ चा सुभेदार काजे इटली जाणे वावो सिकनदरोन जहाज मेव्यो एने चू आमु काजे तीना पोर लेदू.

⁷ जेतार आमु माणसे घोन सोवटा दाहळा तोक धीरा-धीरा जाता जायन मुशकीलसी कनिदुस ओगोव पुग्या ती वाहवी ओगोव जाणे नी देती होती सलमोने ओगोव होयीन क्रेतान टापू आडोव ओगोव गोया.

⁸ एने तेरा काठे-काठे मेहनोतसी चालीन आमु एक जागा पोर पुग्या जो “शुभलंगरबारी” नावोन कोवायतू होतु चा गोथा लसया देसोन गाव साते होतो.

पौलुसोन सालाह नजर अंदाज

⁹ घोनी टेम होय गोयी एने पाणी वाटेशी मुरकिळ होय गोयली होती, न्या तोक कि उपासोन दाहळे वीत गोयला होता आखरी पौलुस यो कोयीन चेतावनी आपने लाग्यू.

¹⁰ हे भाशो मेसेक ओसो लागे कि इना दोरीयान वाटे माल एने जहाज बी नि होय बाकीन आमु काजे आमरो बी जीवन तोकलीत लेणे पोडी.

¹¹ बाकीन सुभेदार पौलुसोन वातोन पेक्षा ढोंड्यान चालाळनेवावान वातोक ज्यादा ध्यान देदु.

¹² इनान कोरता कि चे टापूमा सेव्वान दाहळामा रोयने काठो होतो, घोणा सोवटा माणसोन जी संमती होय गोयी कि चा गोथो ओगोव जायीन काहना रितीसी फिनिक्स पुगीण सेव्वान दाहळामा बितावे यो क्रेतान एक बंदर होतो जेरो मुख दोक्षीन एने अरब पच्छिम भूनी छे.

दारीयामा आंजी

¹³ जेतार दोक्षीनोन हवा सोवे-सोवे चालने बाज गोयी यो विचार कोरीन कि आमरो उद्देश होतो चो लंगर चुटीन एने धोळे-धोळे क्रेतान साते माइन जाणे बाज गोया.

¹⁴ बाकीन इतरीक वारोमा धरतीमा गोथी एक मोटूत आंजी आव्यो जू युरकुलीन कोवायतू होतु.

¹⁵ जेतार आंजी जहाज पोर लागी तेतार तेरेनचा उभी नि रोय सकी आखिर आमु तीना काजे वाहवा भूनी जान देदा एने आमु बी तेरे साते वोयता जात रोया.

¹⁶ तेत्यार कौदा नावोन टापू आडोव वोयतो-वोयतो आमु मुशकीलसी ढोंड्या काजे हातोमा ली सोक्या.

¹⁷ ओवतेन जहाज चालाळन्या तीनाक उठाळीन घोणा सोवटा उपाय कोरीन जहाज नेळो बांद्या, एने सुरतीसोन चूट्टान बालू पोर टेकाय जाणेन बिकसी पाल एने सामान उतारीन वोयता-वोयता जात रोया.

¹⁸ दिसरे दाहळे जेतार आमु आंजीमा गोथा जुदा झेलकाव्या खाता रोया होता कि चे जहाज मायलो सामान नाखने बाज गोया.

¹⁹ तिसरे दाहळे चे आपने हातोसी जहाजन दुवळा एने पाल एने बी नाख देदा.

²⁰ जेतार जुदा सोवटा दाहळा तोक नि ते दाहळू देखाये देदु नि तेरा तारा देखाया मोटीत आंजी चाल रोयी होती, ती धीरा-धीरा आमरो वाचनेन आस बी जात रोयी.

²¹ जेतार चे बी खाणान जादा दाहळा वीत गोया तेत्यार पौलुस तिंदरे सामने उबरोयीन कोयू, हे भाशो जुवतो होतो कि तुमु मारी वात सोमवता एने क्रेत गोथा नि आवता एने नि ते ढोंड्याक छुळता तेत्यार नि ते तोकलीतमा पोळता एने नि ते दुख झेलता,

²² हिमी कि मे तुमु काजे विनता कोरो हिंमत कोरु काहाकि तुमरे मायीन काहना जीवन नुकसान नि होये बाकीन जहाज होयसे.

²³ काहाकि परमेश्वरोन जू मे छे एने जेरी सेवा कोरतेलू तेरु सोरग दूत आज राती मारेंचा आवीन उबरोय गोयू.

²⁴ चू कोयू “पौलुस मा बिहे, तुसेक केसरोन ओगोव उबरोयनो जरूरी छे देख परमेश्वर इना आखाक जे तारे साते चाल रोया तुसेक आप देतलो छे.”

²⁵ इनान कोरता हे, “भाशो हिंमत राखू काहाकि मे परमेश्वर पोर भुरसू कोरतेलू छे कि जोसो मेसेक कोयलो छे, तोसोत होयसे,

²⁶ बाकीन काहनास टापू पोर आपनुक जाणो पोळसे.”

ढोंड्यान टूटनो

²⁷ बाकीन जेतार चौवादवी रात आवी आमु अद्रिया दोरीयामा फिरता रोयता होता रातमा ढोंड्यो चालाळन्या अनुभव कोऱ्या कि आमु काहनास टापून साते पुग गोया.

²⁸ थाह लेणेपोर चे वीस हात उंडो होतो एने थुलोक ओगोव जायीन चे एने जान लेदा कि पोंदरे हात उंडो लाग्यो.

²⁹ ती इना बिकोसी कांखुर मायीन दोगळामा नि ठूकवाय जाय चे ढोंड्यान पोछले जागे चार लंगर नाखीन विजावो होयनेन वाट देखणे बाज गोया.

³⁰ जेतार कि ढोंड्यो चालाळने वावा ढोंड्यामा गोथा ढासनेन कोर रोया होता एने गलही सी लंगर नाखनेन बाहाणे ढोंड्या काजे दोरीयामा उतार देदला होता.

³¹ ती पौलुस सुभेदार एने सेना काजे कोयू, “अगर यो माणसे जहाज पोर नि रोये ती तुमु बी नि वाच सोकतला.”

³² ती सेना दुवळाक काटीन ढोंड्यो लाकळान पाळ देदा.

³³ जेतार विजावो होयने पोर होतो पौलुस यो कोयीन आखा काजे खाणो खाणेन कोरता सोमजाडयु, आज चौदा दाहळा होय गोया तेत्यारुत तुमु चिंता कोरणे वोजेसी भुका रोया एने तुमु कायबी नि खादा.

³⁴ मे तुमु काजे सोमजाडो आपना जीवन वाचाडनेन कोरता खाय लेवू काहाकि तुमरे मायला काहनास एकोन झोटू बी नि उखवे.

³⁵ यो कोयीन चू रुटू लेदू एने आखान सामने परमेश्वरोन धन्यवाद कोऱ्यु एने भांगीन खाणे लाग गोया.

³⁶ इनासी आखा काजे हिंमत आवी एने चे बी खाणो खादा.

³⁷ जहाज पोर आमु बी आखा दुय सोव छत्तीस जोना होता.

³⁸ एने जेतार चे खाणो खायीन आखरी यो नि गोहू दोरीयामा नाखीन जहाज काजे फोवरो कोरणे बाज गोया.

³⁹ जेतार दाहळू उग्यु ती चे तिना जागा काजे कून उवखी बाकीन तीनुक एक सपाट जागू तीनु काजे देखाय पोळ्यु, एने चे विचार कोऱ्या कि जहाज काजे तीना जागा पोर लागाळने वारू रोयसे.

⁴⁰ चे लंगर काटीन दोरीयामा छुळ देदा एने तिनी टेमे दूवळान बांदलो ढिलो कोर देदा एने वाहविन पुठी पाल निकावीन चाल पोळ्या.

⁴¹ बाकीन पाणीमा इचमा जाणेन टेमे जहाज रेवतामा फोस गोयो एने आपठायनेसी टूटने लाग्यो.

⁴² सैनिकोन विचार होतु कि कैदि काजे मार नाखनेन जीनासी कि चे कुदुबी झेपीन ढासी नि जाय.

⁴³ बाकीन सुभेदार पौलुस काजे वारू रितीसी लीजानेन कोरीन तीनु काजे ओसो कोरनेसी रुक्या एने आदेश आप्यू कि झेपता होय चे पेहेले कुदिन काठ पोर निकवीन जाय.

⁴⁴ एने बाकी जे रोयला जहाजन लाकळा एने पाट्या पोर बोसीन निकवी जाय इना रितीसी माणसे काठ पोर वारला पुग गोया.