प्रेषित 26 - बारेली पावरी

अग्रिप्पान सामने स्पष्टीकरण

¹ अग्रिप्पा राजा पौलुस काजे कोयू, “तुसेक आपना बारामा बुलनेन होक छे” इनापोर पौलुस हात ओगोव कोरीन आपना बारामा कोयने बाज गोयू.

² “हे राजा अग्रिप्पा जोतरा वातोन यहुदि मारे पोर घोणा सोवटा गुणू लागाळला छे, मे आपना खुदो काजे सोयावा सोमजो कि आज तारे ओगोव आपना बारामा तीनु आखान जोवाब आपने जाणे बाज रोयू.”

³ विशेष कोरीन इनान कोरता कि तू यहुदिन आखा खोरला पोंथोक एने रिती रीवाज मालूम छे आखरीमा मे विनता कोरो कि ध्यान दिन मारो सोमोव.

⁴ मारो चाल चालनो जुवानिमा गोथू हिमी तोक ओसलो रोयो, बाकीन मे इनाक पेहेलेसी आपनी जातीन इचमा एने यरुशलेममा काहना रितीसी जीव्या इनान आखा यहुदिक मालूम छे.

⁵ काहाकि चे मारे बारामा घोनो पेहेलेन मालूम छे कि मे आपना धोरमोन आखान कट्टर पंथान अनसारे फरुशी होयीन जीवन जोगलु छे अगर चे चाहता इनी वात सारखी गोवा छे कि आप खोकतला.

⁶ बाकीन हिमी ते बी आसोन बारामा जेरी वायदू परमेश्वर वायदू आमरे डाहला पूर्वज काजे कोरलु होतु मारू नियाव कोराय जातू.

⁷ आमरा बास पिढी इना वायदान फोव लेनेन आसोमा खुशीसी रात दाहळू परमेश्वरोन सेवा कोरला छे एने हे राजा इना आसोन बारामा यहुदि मारे पोर गुणू लागाळतला.

⁸ जो वात तुमु माणसो काजे अविस्वासी काहा लागतली कि परमेश्वर मोरला गोथू पोछु जीव उठलु छे?

⁹ मे बी योत सोमजी रोयू होतु कि नासरेथ येसुन नावोन खिलापमा घोनो काहीन कोरनो छे.

¹⁰ एने मे यरुशलेममा योत कोऱ्यु पुढाऱ्या हाते होक लीन मे घोणा चुखला माणसो काजे निस्तु जेलमा नाख्यू बाकीन जेतार तीनुक मार नाखता होता नी मे तिंदरा खिलाप आमरी संमती बी होती.

¹¹ मे खुद आखा आराधनालयमा जायीन तीनुक तोकलीत आप्या कोरतू होतु एने येसुन बुराई कोरावता होता, एने रीसवायीन देस मायीन गावमा तिंदरे पोछो पोळतू होतु.

¹² जेतार मे पुजारान होक एने आग्यान चिट्ठी लीन इना रितीसी दोरीयामा दमिश्क जातु होतु.

¹³ ती हे राजा मे दिसून टेमे वाटे दाहळा गोथू बी जादा विजावो सोरगोमा गोथो आवलो देख्यू जे मारे साते एने मारे साते वावा साते चारू धोळे चोमोकती होती.

¹⁴ जेतार आमु आखा धोरती पोर पोळ गोया ती मेसेक इब्री भाषामा जी आवाज सोमवायी शाउल-शाउल तू मेसे काजे काहा वेला पाळे?

¹⁵ “मे कोयू प्रभू तू कून छे?” प्रभू कोयू, “मे येसु छे जिनान तू छोळ कोर रोयू,”

¹⁶ बाकीन उठ एने आपना पायो पोर उभू रोय मे इनान कोरता तुसेक दर्शन आपलु छे कि तुसे काजे सेवक ठेरावो, एने तू निस्तू वातो काजे जी तू देखतलु छे गोवा ठेरावो बाकीन इना वातोन बी जीनान कोरता मे तुसेक दर्शन देखाळीस.

¹⁷ मे तुसेक तारा माणसोमा एने दिसरा जातीसी छुळावतू रोयीस जीनानचा तुसेक मुकली रोयु.

¹⁸ कि तू तिंदरा डूवा उगाळे इनान कोरता कि चे आंदारामा गोथा विजावामा भुतडान राजम गोथा परमेश्वरोन राजमा आवे, जीनासी चे पापोन माफी एने तीनु माणसो साते होक ली लेये जू मारे पोर भुरसू कोरनेन लारे चुखला होयला छे.

¹⁹ आखरी हे राजा अग्रिप्पा मे तीना सोरगोन दर्शनोन वात नि टोव्यू.

²⁰ बाकीन पेहेले दमिश्कमा ओवतेन यरुशलेम, एने यहुदिन आखा देसोमा रोयने वावाक न्या तोक कि दिसरा यहुदि काजे योत वारली खोबर कोयतू आव्यु कि पसतावू कोरु परमेश्वर भूनी फिरू मंदीरमा मोन फिराउन वारला कामे कोरु.

²¹ इना बारामा यहुदि मेसेक मंदीरमा धोर देदा एने मार नाखनेन कोऱ्या.

²² इना रितीसी परमेश्वरोनचा गोथो मदत लीन मे आज तोक बोनलू छे एने नानला मोटला ओगोव गोवायी आप रोयू एने जे वात भविष्य कोरता एने मुसा कोयलु छे कि चे होयने वावा छे इनुक छुळीन एने काय नि कोयतेलु.

²³ बाकीन जो कि मसिह काजे दुख उठावणे पोळसे एने चू मोरलामा गोथू जीव उठने वावामा पेहेलू होईन यहुदिन प्रजान एने दिसरा जातीमा विजावान प्रचार कोरसे.

²⁴ जेतार पौलुस आपना बचावमा इना रितीसी कोय रोयू होतु ती फेसतूस जुरेत कोयू “पौलुस तू गांडवाय गोयलु छे! तारो जादा भोनने तुसेक गांडवाड देदलो छे,”

²⁵ बाकीन पौलुस कोयू, “माहाराज फेसतूस मे गांडू नि होय बाकीन खोरली एने वारली वाते कोर रोयू.”

²⁶ इनी वातो काजे खुद राजाक मालूम छे कि तेरे सामने हिंमतसी बुल रोयू इना मायलो काहीन वात नि होयली जी तेरेसी डूकायली छे काहाकि यी वात कहाना कोपरामा नि होयी.

²⁷ हे राजा अग्रिप्पा काय तू भविष्य कोरताण भुरसू कोरतेलु? होय मेसेक मालूम छे कि तू भुरसू कोरतेलु.

²⁸ ती अग्रिप्पा पौलुस काजे जोवाब आप्यू, तू मेसे काजे थुलिक टेमोमा मसिही बोनावीन छुळीस.

²⁹ पौलुस कोयू “परमेश्वर कोरे थुलान नीती जादा टेमोन नि बाकीन जे आखा छे मारो आखा सोमवी रोया मारा इना बंधन काजे छुळीन मारे सारखा होय जाये.”

³⁰ तेत्यार राजा एने सुभेदार एने बिरनीके एने तिंदरे साते बोसने वावा उठीन उबोरोहीण;

³¹ एने ओलोग जाईन आपसमा कोयने बाज गोया, “यु माणूस ओसो ते काहीन नि कोरतेलु, जो मोतोन दोंड एने बंदीवाडामा नाखनेन लायक छे,”

³² अग्रिप्पा फेसतूस काजे कोयू, “ओगर यु माणूस केसरोन दोहाई नि आपतलु, ती छुट सकतू होतु.”