प्रेषित 24 - बारेली पावरी

फेलिकस सामने पौलुस

¹ पाच दाहळा बाद हनन्या महायाजक घोणा सोवटा पुढारी एने तिरतुल्लुस नावोन काहनास वोकील काजे साते लीन आव्यु चे सुभेदारोन सामने पौलुसोन केस चालू कोऱ्यु.

² जेतार तीना काजे बुलाव्या ती तिरतुल्लुस तीना पोर गुणू लागाळीन कोयने बाज गोयू “हे माहाराज फेलिकस, तारे लारे आमरेमा वारलो छे; एने तारे हुकुमशी इनी जातीन कोरीन घोणा सोवटो भुंडला सुदरी जातलो छे.”

³ तीना काजे आमु होर एक जन धन्यवाद साते मानतला छे.

⁴ बाकीन इनान कोरता कि तुसे काजे ओवी दुख नी आप सोके, मे तुसे काजे विनता कोरो कि दया कोरीन आमरो दुयोन वात सोमवी ले.

⁵ काहाकि आमु इना माणसो काजे तोकलीत एने जोगोन आग्या यहुदिमा गोरबोळ कोरणे वावू एने नासरीन कुपोंथोन मुखी कोवायतलु.

⁶ यु मंदीर काजे भुंडलो कोरणे कोऱ्यु बाकीन आमु इना काजे धोर लेदा आमु इना काजे आपना शास्त्रनियमोन अनसारे दोंड आपे देदा;

⁷ बाकीन सैनिकोन सोरदार लुसियास जोबोर जुस्ती आमरे हातोमा गोथू हापकी लेदू.

⁸ एने विरोध कोरणे वावा काजे तारो सामने आवनेन आग्या आप्यू इना आखो वातो काजे जिनान बारामा आमु इनापोर गुणू लागाळतला तू खुद चौकसी कोरीन सोमजी जासे.

⁹ यहुदि तीनाक साथ देता जायन कोया जी वात इना रितीसी छे.

फेलिकस सामने पौलुसोन उत्तर

¹⁰ जेतार सुभेदार पौलुस काजे बुलनेन इशारू कोऱ्यु ती चू जोवाब आप्यू “मे यो सोमजीन कि तू घोणा सालोसी इना जातीन नियाव कोर रोयू खुशीमा मारो जोवाब आपो,

¹¹ तू खुद सोमोज सोकतलु कि जेतार गोथू मे यरुशलेममा आराधना कोरणे आव्यु मेसे काजे बारा दाहळा गोथा जादा नि होया.”

¹² जे मेसेक नी मंदीरमा नि प्रार्थना घोरोमा, नि गावोमा कुनी साते विवाद कोरतेलू एने नि कोरावतलु देख्या.

¹³ एने नि ते तिनी वातो काजे जिनान जे मार पोर गुणू लागाळता रोया तारे ओगोव खोरलो साबित कोर सोकतला.

¹⁴ बाकीन मे तेरे सामने यो मान लोम जिना पंथ काजे जे कुपंथ कोयतेला तिना रिती पोर मे आमरा बाप दादान परमेश्वरोन आराधना कोर रोयू; एने जे वाते शास्त्रनियम एने भविष्य कोरतान किताबमा लिखलो छे तिना आखापोर भुरसू कोरतेलू.

¹⁵ एने परमेश्वर सी आस कोरतेलू कि जीनाक तुमु खुद बी राख रोया कि धोरमी अधोरमी दुयोन जीव उठनो छे.

¹⁶ इनापोरसी मे खुद कोशिश कोरतेलू कि परमेश्वरोन एने माणसोनचा गोथो मारो मोन हमेशा निरदोष रोये.

¹⁷ घोणा सालोन बादमा आपना माणसो काजे दान पुगाळने एने भेट चोळावने आवलु होतु.

¹⁸ चे मेसेक मंदीरमा, चुखला मोनोसी, बिना गोरदीन, एने नि दोगु कोरतेलू काहीन भेट चोळावतलु देख्या बाकीन आसियान काहनास यहुदी होता एने तीनुक सही होतो.

¹⁹ अगर मारे खिलापमा तिंदरे जुव काहीन वात होय ती या तारे सामने उबरोयीन मार पोर गुणू लागाळता.

²⁰ नि ती जे माणसे यो न्या छे चे देखाळे कि जेतार मे यहुदि सभान सामने उबरोया रोय होतु, तेत्यार चे मारेमा काय भुंडो देख्यू.

²¹ एने इनी एक वात काजे छुळीन जो मे तिंदरे इचमा मा उबरोय रोयू होतु तेत्यार मे जुरेत मोटा बुलोमा कोयलु होतु “मोरनेमा गोथो पोछोव जीव उठनेन बारामा आज मारू नियाव तारे सामने कोराय रोयू.”

²² ती फेलिकस जू इना पंथान पुरी पुस पास मेकतलु फेसलान सुनवाई काजे उबरोयीन कोयू, जू सेनान सरदार लुसियास आवसे, ती तुमरी वातोन नियाव होयसे.

²³ ती चू सुभेदार काजे आग्या आप्यू कि थुलोक छुट आपीन पौलुसोन राखवावी कोर एने तेरा दोस्त माईन कुदा काजे बी तेरी सेवा कोरणे घोन रूकता.

पौलुसोन फेलिकस एने तेरी लाडी साते वात

²⁴ थुलाक दाहळा बाद फेलिकस तेरी लाडी दुसिल्ला साते चा आव्यु ची एक यहुदि बायर होती फेलिकस पौलुस काजे बुलावने मूकल्यु एने येसु मसिहन भुरसान बारामा तीनासी सोमव्यू.

²⁵ बाकीन जेतार पौलुस नेकीन आत्मान धीर एने आवने वावा नियावोन बारामा बुल रोयू होतु ती फेलिकस बिही गोयू एने कोयू “इनी टेमे तू जात रोय टेम जोळसे ती मे तुसेक ओवी बुलावीस.”

²⁶ तिनी टेमे तीनाक जी आस बी होती पौलुस हीनाक काहीन धोन आपसे इनान कोरता फेलिकस पौलुस काजे वात कोरीन कोरता घोळी-घोळी बुलावने मुकोलतू होतु.

²⁷ दुय साल ओवतेन वीत जाणेन फेलिकसोन जागू पूरकियुस फेसतूस लेदू एने फेलिकस यहुदि काजे खुश कोरनेन कोरता पौलुस काजे बोंदी जेलमा रोयने देदु.