प्रेषित 23 - बारेली पावरी

¹ पौलुस महासभान भूनी टोक लागाळीन देखतू जायीन कोयू, “भाशो मे आज तोक परमेश्वर कोरता वारला मोनोसी जीवन जोगलु छे.”

² इनापोरसी हनन्या महायाजक तीनु काजे जे तेरेनचा उबरोय रोया होता, तीनु काजे आपना परमेश्वरोन आग्या आपु.

³ तेत्यार पौलुस तीना काजे कोयू, “हे चुणु लागाळलो भीतळा, परमेश्वर तुसेक देसे. तू शास्त्रनियमोन खिलापमा मारो न्याय कोरणे बोस रोयू एने काहा शास्त्रनियमोन खिलापमा मारू न्याय कोरणे आग्या आप रोयू?”

⁴ जे उबरोय रोया होता चे कोया “काय तू परमेश्वरोन महायाजक काजे भोलो बुरो कोयतलु?”

⁵ पौलुस कोयू “हे भाशो, मेसेक नि मालूम कि यु महायाजक छे काहाकि लिखलो छे, आपना माणसोन अधिकारी काजे बुरो नि कोयनो.”

⁶ तेत्यार पौलुस यो सोमवीन कि एक तुमरी सदुकीन एने दिसरो फरुशीन छे महासभामा आयळीन कोया, “हे भाशो मे फरुशी एने फरुशीन पिढीन छे, मोरलान आस एने जीव उठनेन बारामा मारू नियाव चालू छे.”

⁷ जेतार चू जी वात कोयू ती फरुशीन एने सदुकीमा झोगळू होयने बाज गोयू; एने सभामा फुट पोळ गोयी.

⁸ काहाकि सदुकी ते यो कोयता होता कि नि पोछो जीव उठनेन छे कि नि सोरग दूतो एने नि आत्मा होय, बाकीन फरुशी यो आखो मानतला.

⁹ ती जुदी गोरबोळ होय गोयी, काहीन शास्त्री जे फरुशीयान इंदरे मायला होता, उठीन उबरोय गोया एने यो कोयीन झोगळायने बाज गोया “आमुक इना माणसोमा काहीन बुरो नि देखतो एने कोदा माईन भुंडली आत्मा नि ती सोरग दूत तीना साते बुलावलो छे कि काय?”

¹⁰ जेतार जुदु झोगळू होयू, ती सैनिकोन सोरदार इना बिकोसी कि पौलुसोन तुकडा-तुकडा नि कोर देय, सैनिक काजे आग्या आप्यू कि उतरीन तीना काजे हिंदरा इचमा गोथो जोबोर दोस्ती निकावे एने गोढ पोर लीजाय.

¹¹ तिनी राती प्रभू तिना साते उबरोयीन कोयु, “हे पौलुस हिंमत धोर; काहाकि जोसू तू यरुशलेममा मारी गोवायी आप्यू, तोसोत तुसे काजे बी रोममा गोवायी आपनो छे.”

पौलुस काजे मारनेन योजना

¹² जेतार दाहळू उग्यु ती यहुदि योजना बोनाव्या एने कोसोम खादा कि जेतार तोक पौलुस काजे मार नि नाखजे तेत्यार तोक नि खाजे नि पीजे.

¹³ चे आपोसमा जी कोसोम खादा जे चावीस जोना गोथा जादा होता.

¹⁴ चे प्रधान पुजारू एने डाहला पुढारीनचा जायीन कोया आमु यो पाको कोर लेदा कि जेतार तोक आमु पौलुस काजे मार नि नाखजे, तेत्यार तोक ओगर काहीन चाखे ती आमरेपोर धिक्कार छे.

¹⁵ इनान कोरता हिमी महासभा साते सैनिकोन सोरदार काजे सोमजाडू तीनाक तुमरेनचा लीन आव्या, सोमजू कि तुमु तेरे बारामा ओवी वारू पुस पास कोरणे होय ती; तेरे पेहेलेन आमरू तिना काजे मार नाखनेन विचार छे.

¹⁶ पौलुसोन भानजूस यो सोमवी लेदू कि चे तीनाक मारणे वावा छे ती गोढ पोर जायीन पौलुस काजे संदेश आप्यू.

¹⁷ पौलुस सुभेदार मायला एका काजे आपने साते बुलावीन कोयू, “इना माणसो काजे सैनिकोन सोरदारोनचा लीन जावू यु तीना काजे काहीन कोयनेन कोर रोयू.”

¹⁸ इनान कोरता चू तीना काजे सैनिकोन सोरदारोनचा लीजायन कोयू “बांदालु पौलुस मेसेक बुलावीन विनता कोऱ्यु कि यु जुवान सेना दोलोन सरदारसी काहीन कोयनो छे; इना काजे तेरेनचा लीन जा”.

¹⁹ सैनिकोन सोरदार तेरु हात धोरीन, एने ओलोग लीजायीन पुछु, “तू मेसेक काय कोयने होय रोयू?”

²⁰ चू कोयू, “यहुदि योजना कोर रोया कि तुसेक विनता कोरीन वाहने पौलुस काजे महासभामा लावे, इनान कोरता कि तेरो ओवी वारू विचार पुछ कोरनेन कोर रोया,

²¹ बाकीन तिंदरो सोमवतू झुनी काहाकि तीनु मायला चावीस गोथा जादा माणसे तीनाक मारनेन कोर रोया,, जे पाकु विचार कोर रोया कि जेतार तोक पौलुस काजे मार नि नाखजे तेत्यार तोक नि खाजे एने नि पीजे एने हिमी चे तीयार छे एने तारी वातोन वायदू जुव रोया.”

²² तेत्यार सैनिकोन सरदार तिना माणसो काजे जी आग्या आपीन मूकल्यु, “कुदा काजे कोयतू झुनी कि जी वात मेसे काजे कोयलु छे.”

पौलुस काजे कैसरीयामा मुकोलनो

²³ तेत्यार चू दुय सुभेदार काजे बुलावीन कोयू, “दुय सोव सेना सत्तर घुल्ला पोर बोसने वावू एने दुय सोव भाला काजे कैसरिया जाणेन कोरीन तीयार कोर मेक्यू, तू राती तीन वाजे निकोवजी.

²⁴ एने पौलुसोन सवारीन कोरीन घुल्लू तीयार कोरु कि तीना काजे कैसरीयामा फेलिकस सुभेदारोनचा वारू पुगाळ देवू.”

²⁵ चू इना रितीन चिट्ठी बी लिख्यू.

²⁶ माहाराज फेलिकस सुभेदार काजे क्लौदियुस लुसियासोन नमस्कार.

²⁷ इना माणसो काजे यहुदि धोरीन मार नाखनेन कोऱ्या बाकीन जेतार मेसेक मालूम पोळ्यो कि यु रोमी छे ती सैनिकोन सेना मुकलीन छुळाव लाव्यू.

²⁸ मेसेक मालूम पोळ्यो आपना शास्त्रनियम पोर विवादोन बारामा तीना पोर गुणू लागाळ रोया; एरेन कोरीन चे तिंदरे महासभामा लीग्या.

²⁹ तेत्यार मेसेक मालूम पोळ्यो आपना शास्त्रनियमोन विवादोन बारामा तीना पोर गुणू लागाळ्या; बाकीन मार नाखनेन एने बांदिन मेकनेन लायक तीनामा काहना नि होय.

³⁰ जेतार मेसेक मालूम पोळ्यो कि इना माणसो काजे मारणे वावा छे तेतारुत इना काजे तारेनचा मुकली देदु, मुद्दिया काजे बी आग्या आप्यू कि तारे सामने तीनापोर गुणू लागाळे.

³¹ आखरी जोसी सेना काजे आग्या आप्यू तोसोत चे पौलुस काजे लीन रातो रात अन्तिपत्रिसमा आव्या.

³² दिसरे दाहळे सवारी वावा इनू काजे तेरे साते जाणेन कोरीन तेरेनचा छुळीन गोढ पोर आव्या.

³³ चे कैसरिया पुगीण सुभेदार काजे चिट्ठी आप्या एने पौलुस काजे बी हेरे सामने उबराख्या.

³⁴ चिट्ठी वाचीन पुछु, “यु काहनला प्रांतोन छे?”

³⁵ एने जेतार जान लेदू कि किलीकीयान छे ती तीना काजे कोयू, “जेतार तारा दुष्मोन बी आवसे, ती मे तारा मुकदमा कोरिस” एने चू हिनाक हेरोदोन किल्लामा पेहेर मेकने कोरीन आग्या आप्यो.