प्रेषित 21 - बारेली पावरी

यरुशलेमोन यात्रा

¹ जेतार आमु तिंदरेनचा गोथा ओगोव होयीन ढोंड्याक सुळया ती सुदले वाटे गोथा कोसमा आव्या, एने दिसरे दाहळे रुदुसमा एने चा गोथा पतरा मा.

² चा एक जहाज फीनीके जातलो मेव्यो आमु तीना पोर चोळीन तीनाक छुळ देदा.

³ जेतार साईप्रस देखाय पोळ्यो ती आमु डाखरे हाते सूळ्या एने सिरीया चालीन सोरमा उतऱ्या; काहाकि चा जहाज मायलो समान उतारनो होतो.

⁴ चेला काजे मेवीन आमु चा सात दाहळा तोक रोया चे आत्मान सिकाळला पौलुस काजे कोया यरुशलेममा पाय घोन मेके.

⁵ जेतार चे दाहळा पुरा होय गोया ती आमु चा गोथा चाल पोळ्या; एने आखा बायरा एने पुऱ्या साते आमु काजे देसोन बारथे तोक पुगाळ्या; एने आमु काठे मांडा टेकिन प्रार्थना कोऱ्या.

⁶ तेत्यार एक दिसरा काजे भेटीन आमु ते जहाज पोर चोळ गोया एने चे आप आपने घोर जात रोया.

⁷ तेत्यार आमु सोर गोथा पाणीमा ढोंड्या पोर चोळ गोया एने चे पतूळीमाइ मा पुग्या एने भाशोन काजे नमस्कार कोरीन तिंदरे साते एक दाहळू रोया.

⁸ दिसरे दाहळे आमु चा गोथा चालीन कैसरमा आव्या, एने फिलीपूस वारली खोबरोन प्रचार कोरनेवावान घोरमा जे सातमा गोथा एक होतु; जायीन तेरेनचा रोया.

⁹ तेरी चार कुवारी पुरायटा होता, जे भविष्यवाणी कोरता होता.

¹⁰ जेतार आमु घोन सोवटा दाहळा तोक रोय लेदा ती अगबुस नावोन एक भविष्य कोरता यहुदियामा गोथू आव्यु.

¹¹ चू आमरेनचा आवीन पौलुस काजे तेरे साते लीन तेरु कोळ्यान पोटटू लीन तेरा हात पाय बांधिन कोयू, “पवित्र आत्मा यो कोयो कि जिना माणसोन यो कोळ्यान पोटटू छे, तीना काजे यरुशलेममा यहुदि इना रितीसी बांधसे, एने परराष्ट्रीयान हातोमा आप देसे.”

¹² जेतार आमु जी वाते सोमव्या, ती आमु एने चा वावा माणसे विनता कोऱ्या कि यरुशलेममा मा जाय.

¹³ बाकीन पौलुस जोवाब आप्यू, “तुमु काय कोरणे बाज रोया कि रोडी-रोडीन मारो मोन दुखाळतला? मे ते प्रभू येसुन नावोसी यरुशलेममा नि सुतू बांधायनेन नी बाकीन मोरनेन कोरता बी तीयार छे.”

¹⁴ जेतार चू नी मान्यु ती आमु यो कोयीन हुगा रोय गोया, “प्रभून मोर्जी पुरी होये.”

¹⁵ इनू दाहळान ओवतेन आमु तीयारी कोरीन यरुशलेममा चाल देदा.

¹⁶ कैसरमा गोथा बी काहीन चेला आमरे साते होय गोया एने आमुक माणसोन नावोन साइप्रसोन चेलानचा गोया आमु तेरेनचा टीके.

यरुशलेममा पौलुसोन आवनो

¹⁷ जेतार आमु यरुशलेममा पुग्या ती भाशे खुशीमा आमु काजे मेव्या, जा आखा डाहा-डाहा एखठा होता.

¹⁸ दिसरे दाहळे पौलुस आमुक लीन याकुबोनचा लीन गोयू जा सारी आखा पुढारी एखठा होता.

¹⁹ तेत्यार चे तीनाक नमस्कार कोरीन, जे-जे कामे परमेश्वर तेरी सेवान लारे दिसरा जात्यामा कोरलु होतु, एक-एक कोरीन आखा कोयू.

²⁰ चे यो सोमवीन परमेश्वरोन महिमा कोऱ्या एने तीना काजे कोया, “हे भाशो, तू देख रोयू कि यहुदामायीन घोणा होजारोक माणसे भुरसू कोरला छे; एने आखा नियम शास्त्र पोर मन लागाळला छे.

²¹ तीनु काजे बायरामा सिकाळ देदला छे कि तू दिसरा जातीमा रोयने वावा यहुदिया काजे मुसा पोछु फिरनेन सिकाळतलु, एने कोयतेला कि आपना पुऱ्यान सुंता कोरावू एने तिनी रिती पोर चालु.

²² नि ओवतेन काय कोरजे? माणसे जरूर सोमजसे कि तू आव रोयू.

²³ इनान कोरता जो आमु तुसे काजे कोयजे चोत कोर, आमरेनचा चार माणसे छे जो मानता मांगला छे.

²⁴ तीनु काजे लीन तिंदरे साते आपनो खुदो काजे चुखो कोर; एने तिंदरेन कोरता खोरचू आप कि चे मुंडको बुळावे तेत्यार आखा सोमजे कि जी वाते तीनु काजे तारे बारामा कोयली छे, ची खोरली नि होय बाकीन तू खुद शास्त्रनियम मानीन तेरे अनसारे चाल रोयो.

²⁵ बाकीन तीनु दिसरा जातीन बारामा जे भुरसू कोरला छे; आमु यो फैसलु कोरीन लिखीन मुकली रोया कि चे मूर्तीन सामने बलि कोरला मास सी एने लुयसी एने गोवू दाबलान मास सी वाचीन रोयजू.”

²⁶ पौलुस तीनु माणसो काजे लीन दिसरे दाहळे तिंदरे साते चुखू होयीन मंदीरमा गोयू, एने चा सोमवाळ देदू कि चुखू होयनेन दाहळे मतलब तीनु मायला होर एक जोनान कोरीन चोळावू चोळावनेन दाहळा केतार पुरा होयसे.

मंदीरमा पौलुसोन धोरायनो

²⁷ जेतार चे सात दाहळा पुरा होयने पोर होता ती आसियान यहुदि पौलुस काजे मंदीरमा देखीन आखा माणसो काजे भोडकाव्या, एने ओसो आयळीन तीना काजे धोर लेदा.

²⁸ “हे इस्राईल मदत कोरु; यु चू माणूस छे जू माणसोक एने शास्त्रनियम एने इना जागान खिलापमा होर जागे माणसो काजे सिकाळतलु न्या तोक कि युनानी काजे बी मंदीरमा लावीन इना चुखला जागा काजे अपवित्र कोर देदू.”

²⁹ चे इनान पेहेले इफिसवासी कि त्रुफीमूस को तिना साते देसोमा देखायला होता एने सोमजता होता कि पौलुस तिना काजे मंदीरमा लीन आवतू होतु.

³⁰ जेतार आखा देसोमा बोदनाम होय गोयो, एने दोवळीन एखठा होय गोया एने पौलुस काजे धोरीन मंदीरोन बारथे घीसळीन लीगोया एने तेत्यारुत झोपलु बोंद कोर देदा.

³¹ जेतार चे तीना काजे नाखनेन कोऱ्या ती पालटोन सोरदार काजे मालूम पोळ्यो कि आखा यरुशलेममा मालूम होय रोयो.

³² तेत्यार चे सुभेदार एने सिपायळा काजे लीन तिंदरे साते तोवे देखाळीन आव्या; एने पलटनोन सोरदार काजे एने सिपायळाक देखीन पौलुस काजे देणेन देदा.

³³ तेत्यार पालटनोन सोरदार साते आवीन तीना काजे धोर लेदू; एने दुय साकवमा बांदनेन आग्या आप्यू पुछने बाज गोयू, “यु कून छे, यु काय कोरलु छे?”

³⁴ तेत्यारुत गोरदीमा कुदू काहीन, एने कुदू काहीन आयळता गोया, जेतार गरबळ लारे चू खोरली वात नी सोमजी सोक्यू ती तिना काजे गोढमा लीजानेन आग्या आप्यू.

³⁵ जेतार चू पायत्र्या पोर आव्यु ती ओसो होयो कि गोरदीन भीळमा सिपायळा तीनाक उचलीन ली जाणो पोळ्यो.

³⁶ काहाकि माणसोन भिळ ओसी आयळती जाईन तेरे पोछोव पोळी कि “तीना काजे मार नाखू.”

³⁷ जेतार पौलुस काजे गोढ पोर लीन जाणे वावा होता ती टूवान सोरदार कोयू काय मेसेक आखा होक छे कि मे तुसे काजे काहीन पुछो चू कोयू, “काय तू युनानीक मालूम छे?

³⁸ काय तू मिसरी नि होय, जू इनू दाहळा पेहेले दुष्मोन बोनावी बांड कोरणे वावा माणसोक बोयळा लीन गोयू होतु?”

³⁹ पौलुस कोयू “मे ते तरसुसन यहुदि माणूस छे, किलिकिया प्रसिद्ध सोहोरोन निवासी छे मे तुसेक विनता कोरो कि मेसेक माणसोन साते वाते कोरणे दे.

⁴⁰ जेतार चू होव कोयू ती पौलुस पायत्र्या पोर उबरोयीन आपना हातोन इशारासी माणसो काजे एने जेतार न्या आखा हुगा रोय गोया ती चू माणसो काजे इब्री भाषामा कोयू.