प्रेषित 2 - बारेली पावरी

चुखली आत्मान आवनो

¹ जेतार पेन्तिकुस्तोन दाहळू आव्यु ती चे आखा एक जागे एखठा होय गोया.

² एक-एक सोरगोमा गोथो मोटला आंजीन तोसो सोनसोनाटोन बुल होयू, एने तीनासी आखो घोर जा चे बोसला होता, घूम गोयो.

³ एने तीनु काजे आगठीन जीब धोपतली देखायी, एने तिंदरे माईन होर एक पोर आव लागी.

⁴ आखा पवित्र आत्मासी भोराय गोया एने, जिना रितीसी आत्मा तीनु काजे बुलावनेन ताकत आप्यू ओलोग-ओलोग भाषामा भूलणे बाज गोया.

⁵ सोरगोन तोवे होर एक जातीन भक्तीमान यहुदि यरुशलेममा रोयता होता.

⁶ जेतार आवाज आवी ती भिळ जमा होय गोयी एने माणसे बिहीने बाज गोया, काहाकि होर एक जोना काजे यो सोमायतो होतो कि ये मारीत भाषामा बुलरोया.

⁷ चे आखा वाहरायीन कोयने बाज गोया, “देखू जे बुलने बाज रोया काय गलीलोन नी होय?”

⁸ ती काय काहा आमरे गोथू होर एक आपनी जन्मोन भाषा सोमवी रोया.

⁹ आमु ते परदेशी एने मेदी, एने एलाम, एने मेसोपटेमीया एने यहुदि एने कप्पदूकिया, पुन्तुस आसिया.

¹⁰ फुग्रीया एने पमफुलीया, एने मिसर एने साइरीन एने लिबिया, देस जू कुरेनीन आस पास इनू आखा देसोन रोयने वावा एने रोमी यात्री.

¹¹ मतलब यहुदि एने मोन धोरू कोयने वावा चे क्रेती एने अरबी बी छे बाकीन आपनी-आपनी भाषामा, तिंदरे गोथू परमेश्वर मोटला कामोन वाते सोमवतेला छे.

¹² एने चे आखा वाहराय गोया, बिहीन एक दिसरा काजे कोयने बाज गोया; “यो काय होयने बाज रोयो?”

¹³ बाकीन दिसरा कुहराये कोया “जे ते नोवला मोंदोमा धंदू छे.”

पेन्तिकुस्तोन दाहळे पतरसोन भाषण

¹⁴ तेत्यार पतरस तीनु ग्यारा जोना साते उबरोयू एने मोटोत बुलोमा कोयने बाज गोयू “हे यहुदि एने आखा यरुशलेममा रोयने वावा यो सोमजी लेवू एने कानटा लागाळीन मारी वाते सोमवू.”

¹⁵ जोसा तुमु सोमजी रोया, जे माणसे नशामा नि होय, काहाकि हिमी ते सोन्दारेन नोव वाज रोया.

¹⁶ बाकीन ची जी वात छे, जू योयेल भविष्य कोरतान लारे कोवाय गोयलो होतो.

¹⁷ परमेश्वर कोये, कि आखरी दाहळामा ओसो होयसे कि मे मारू आत्मा आखा माणसो पोर रेचवीस, एने तुमरा बेटा बेट्यास भविष्यवाणी कोरसे, एने तुमरा जुवान्या दर्शन देखसे; एने तुमरा डाहला माणसे सोपनो देखसे

¹⁸ एने मे आपना पावोरे एने आपनी पावेरनी पोर बी तीनु दाहळामा आपनी आत्मान गोथी उतारीस एने चे भविष्यवाणी कोरसे

¹⁹ एने मी उपोर सोरगोमा अदभूत काम एने चे धोरती पोर चिन्हा मतलब लुय एने आगठो एने धुवाळान वादवो देखाळीस.

²⁰ प्रभून महान एने विजावान दाहळा आवनेन पेहेले दाहळू आंदारो. एने चांद रातलू लुय सारकू होय जासे

²¹ एने जू कुदू परमेश्वरोन नाव लेसे तेरा छुटकारू होयसे.

²² हे मारा दोस्त इस्राईल जे वाते सोमवू, कि येसु नासरी माणूस होतु, जेरो परमेश्वरोनचा गोथू होयनेन सोबूत तीना ताकत वावा काम एने मोटला कामोन, एने निशाणीसी देखाळ देदू एने परमेश्वर तुमरे बिचमा तेरे लारे कोरीन देखाळ्यू, जीना काजे तुमु खुद जानतेला छे.

²³ तिना येसु काजे जू परमेश्वरोन ठेरावलु योजना एने पेहेली ग्यानोन अनसारे धोराय गोयू तुमु अधोरमीन हातोसी ख्रुस पोर चोळावीन मार देदा.

²⁴ बाकीन तीना काजे परमेश्वर मोरनेमा गोथो बंधनमा गोथू बुलाळीन जीवाळ्यु, काहाकि यो होयने वावू होतो कि चू तेरे ताबामा रोयतू.

²⁵ काहाकि दाऊद तेरे बारामा कोयु कि “मी प्रभू काजे हमेशा आपने साते देखतू रोयू, काहाकि चू मारे जेवळे धोळे छे, ताकि मे पोळी नि जाम.”

²⁶ “इनान कोरता मारो मोन खुशीमा छे, एने मारी जीब खुशीमा छे एने मारो डील भी आसोमा बोनलो रोयसे.

²⁷ काहाकि तू मारा जीवो काजे अधोलोकमा नि छुळे, एने नि आपना पवित्र जोना काजे सोळने देय.

²⁸ तू मेसेक जीवनोन वाट देखाळलु छे; तू मेसेक तारा दर्शनोन लारे खुशीमा भोर देसे.”

²⁹ “हे भाशो कुलापती दाऊदन बारामा तुमु काजे पुरा योकीनोन साते कोय सोकतेलू कि चू मोर गोयू एने गाळाय गोयू एने चो मोळवाट्या आज तोक आमरे या छे.

³⁰ चू भविष्य कोरता होतु, चू जानतू होतु कि परमेश्वर मार साते वायदू कोरलु छे, कि तारा पिढीमा गोथू एक माणूस काजे तारा राज पोद सिहासन पोर बोसाळीस.”

³¹ चू होयने वावी वातो काजे पेहेलेसी देखीन मसिहन जीव उठनेन बारामा भविष्यवाणी कोऱ्यु कि नि ते तेरु जीव अधोलोकमा छुळाय गोयो एने नि तेरो डील सोळ्यो.

³² इनात येसुक परमेश्वर जीवाळ्यु जीनाक आमु आखा गोवा छे.

³³ इना रितीसी परमेश्वरोन जेवळे हातोसी आखान मोटो पोद एने बासोनचा गोथो पवित्र आत्मा लीन जेरो वायदू कोरलो होतो चू उतार देदू चू तुमु देख रोया एने सोमवी रोया.

³⁴ काहाकि दाऊद ते सोरगोमा नि चोळ्यु बाकीन चू खुद कोयु कि, प्रभू मारा प्रभू काजे कोयू, “मारे जेवळे धोळे बोस

³⁵ जेतार मी तारा दुष्मोनो काजे तारा पायोन बोसनेन जागू नि बोनाव दोम.”

³⁶ इनान कोरता इस्राईलोन आखो घोरानो जान लेये कि परमेश्वर तीनाक प्रभू, एने मसिह दुयूबी ठेराव्या इना येसु काजे जीना काजे तुमु ख्रुस पोर चोळाव्या, परमेश्वर बी ठेराव्या एने मसिहा बी.

³⁷ चे जेतार यो सोमव्या ती तिंदरा मोन भोराय गोयो एने चे पतरस एने दिसरा प्रेषितोन काजे पुछ्ने बाज गोयो “भाशो आमु काय कोरजे?”

³⁸ पतरस तीनु काजे कोयू, “मोन फिरावू एने तुमरे मायला आखा आपना-आपना पापोन माफीन कोरीन येसु मसिहन नावसी बाप्तिस्मा लेवू तेतार तुमु पवित्र आत्मान वरदान लेसू.”

³⁹ काहाकि यु वायदू तुमरे गोथा तुमरा पुऱ्या पारी एने तुमरे आखान कोरता जे नांबे-नांबे छे मतलब जे आखा जीनुक प्रभू आपनु परमेश्वर तेरेनचा बुलावसे.

⁴⁰ एने घोन सोवटी दिसरी वातोसी गोवायी आपीन तीनु काजे रावन्या कोरतू रोयू कि, इनी नाणी पिढीमा गोथू वाचाड.

⁴¹ आखरी चे माणसे तेरो वचन सोमव्या चे बाप्तिस्मा लेदा; एने तिने दाहळे तीनुमा लगभग तीन हजार माणसे मेवाय गया.

⁴² एने चे प्रेषितोन गोथा लगातार शिक्षा लेणे, एने संगती कोरणे, रुटू खाणे, एने प्रार्थना कोरणेन मोन लागाळ रोया होता.

विस्वास्यान संगती

⁴³ आखा माणसो पोर बिक भोरायली होती एने घोणा सोवटा नोवलायीन काम, एने चिन्ह चमत्कार प्रेषितोन लारे होयता रोया.

⁴⁴ आखा विस्वासी मेवीन-जुळीन रोयता होता एने तिंदरा आखा चीजे एखठा होता.

⁴⁵ चे आपनी संपती एने सामान वेचीन जोसो तीनु काजे गोरोज पोळती होती आखाक वाट देत होता.

⁴⁶ चे एक मोन लागाळीन दाहळीन मंदीरमा जाता होता एने घोर-घोर सूट खाता जायन खुशी एने मोनोसी एखठा खाणो भांगीन खाता रोयता होता.

⁴⁷ चे परमेश्वरोन स्तुती कोरता रोयता होता आखा माणसे तिंदरे साते वारला रोयता होता जिंदरा छुटकारू होयतू होतु तीनु काजे प्रभू तीनुमा मेवाळतू होतु.