प्रेषित 18 - बारेली पावरी

कुरीन्थमा पौलुस

¹ इनान ओवतेन पौलुस एथेंस काजे छुळीन कुरिन्थमा आव्यु.

² चा तीनाक अक्कविल्ला नावोन एक यहुदि मेवी, जेरो जन्मो पुन्तुसमा होयलो होतो आपनी लाडी प्रीस्कील्ला साते इटलीमा गोथा तोकलीतमा आवलु होतु क्लौदियुस आखा यहुदि काजे रोम गोथू निकवीन जानेन आग्या आपलु होतु इनान कोरता चू तीनानचा गोयू.

³ तेरु एने तिंदरू एकुत उदेद्श होतु इनान कोरता चे तिंदरे साते एने चे काम कोरणे बाज गोया एने तिंदरू धंदू तंबू बोनावनेन होतु.

⁴ चू होर एक शब्बाथोन दाहळे प्रार्थना घोरोमा जोखळाय कोरीन यहुदि एने युनानी काजे बी सोमजाडयु.

⁵ जेतार सिलास एने तीमथी मकीदुनीया गोथा आव्या, ती पौलुस वचन सोमवाळनेन धूनमा यहुदि काजे गोवायी आपने बाज गोयू कि येसुत मसिह छे.

⁶ बाकीन जेतार चे विरोध एने बुराई मोजाक कोरणे बाज गोया ती चू आपना कापळा झोटकी तीनु काजे कोयू “तुमरो लुय तुमरेन माथा पोर रोये, मी निरदोष छे हिमी गोथू मे दिसरा जातीमा जायीस.”

⁷ चा गोथू चालीन चू तीतुस यूस्तुस नावोन परमेश्वरोन एक भोक्तोन घोरमा आव्यु, जेरो प्रार्थना घोर साते लागिन होतो.

⁸ तेत्यार प्रार्थना घोरोमा सरदार क्रिस्पुस आपना आखो घोरानो साते प्रभू पोर भुरसू कोऱ्या; एने घोणा सोवटा कुरीन्थ मायला सोमवीन भुरसू कोऱ्या एने बाप्तिस्मा लेदा.

⁹ प्रभू एक राती सोपनामा पौलुस काजे कोयू, “मा बिहे बाकीन कोयतू जा एने हुगु मा रोये;.

¹⁰ काहाकि मे तारे साते छे एने कुदू तार पोर चोळीन तारो नुकसान नी कोरे काहाकि आमु इना देसोमा घोणा सोवटा माणसे छे.”

¹¹ इनान कोरता चू तीनुमा परमेश्वरोन वचन सिकाळतु जायीन देढ साल तोक रोयू.

¹² जेतार गल्लीयो अखाया देसोन सरदार होतो ती यहुदि माणसे एक घोरोमा पौलुस पोर चोळीन आव्या, एने तीना काजे नियाव कोरनेन जागा पोर सामने लावीन कोयने बाज गोया.

¹³ यु माणसो काजे सोमजाडतेलु कि परमेश्वरोन आराधना इना रितीसी कोरु यो शास्त्रनियमोन खिलापमा छे.

¹⁴ जेतार पौलुस बुलने पोरुत होतु, ती गल्लीयो यहुदि काजे कोया, “हे यहुदि अगर यु काहना अन्याय एने काहीन भुंडली वात होती ती ठीक होतो कि मे तुमरी सोमवतू.

¹⁵ बाकीन यु जोखळाये बुले एने नावे तुमरे न्या वावान नियमोन बारामा छे, ती तुमु जाणू काहाकि मे इनी वातोन न्यायी बोनावने चाहतोलू

¹⁶ ती तुमुत जाणू; काहाकि मे इनी वातोन नियाव नी कोरनो चाहतु” एने चू तीनु काजे नीयावोन जागे गोथू ओगोव गोथू निकाव देदा.

¹⁷ तेत्यार आखा माणसे प्रार्थना घोरोन सरदार सोस्थिनेस पोकडीन नियाव कोरनेन जोगोन सामने देदा बाकीन गल्लीयो इना वातोन काहीन विचार नि कोऱ्या.

अंतखीयामा पोछो आवनो

¹⁸ पौलुस घोणा सोवटा दाहळा तोक चा रोयू एने भाशोन साते मेवीन किंख्रियामा इनान कोरता मुंडको बुळ्यु काहाकि चू मानता मानलू होतु, एने ढोंड्यामा सिरीयामा जात रोयू एने तिंदरे साते प्रीस्कील्ला एने अक्कविल्ला होता.

¹⁹ चू इफिस पुगीण तीनु काजे चा हेऱ्यु एने खुद प्रार्थना घोरमा जायीन यहुदि साते जोखळायने बाज गोयू.

²⁰ जेतार चे तीना काजे विनता कोऱ्या, “आमरे साते ओवी काहीन दाहळा रोय” ती चू कोबूल नी कोऱ्यु.

²¹ बाकीन यो कोयीन तीना काजे कोयीन जाणेन तीयारी कोऱ्यु, “अगर परमेश्वर चाहे ती मे तुमरेनचा ओवी आवीस” तेत्यार चू इफिसमा गोथू ढोंड्यो छुळीन चाल पोळ्यु;

²² एने कैसरीयामा उतरीन (यरुशलेममा) गोयू एने मंडवी काजे नमस्कार कोरीन अन्ताकियामा आव्यु.

पौलुसोन तीसोरू प्रचारोन यात्रा सरुवात एने अपोल्लूस

²³ एने थुलाक दाहळा रोयीण चा गोथू निकव्यू एने एक धोळे गोथू गलातिया एने फुग्रीया प्रदेशमा आखा चेला काजे मजबूत कोरतू फिऱ्यु.

²⁴ अपुल्लोस नावोन एक यहुदि जेरो जन्मो सिकनदरियामा होयलू होतु जू ग्यान वावु माणूस एने पवित्र शास्त्र काजे वारला रितीसी उवखायता होता इफिसमा आव्यु.

²⁵ चू प्रभून वाटोन सिकवोन भोन लेदलु होतु एने मोन लागाळीन येसुन बारामा ठीक-ठीक सिकाळे एने सोमवाळे बाकीन यो निसतो योहानोन बाप्तिस्मान वात जानतू होतु.

²⁶ चू प्रार्थना घोरोमा हिंमतसी बुलने बाज गोयू बाकीन प्रीस्कील्ला एने अक्कविल्ला तेरी वाते सोमवीन तीनाक आपनेनचा ली गोयली, परमेश्वरोन वाट तीनुक बी वारला रितीसी देखाळ्यू.

²⁷ जेतार चू पोछु विचार कोऱ्यु कि पोरले धोळे उतरीन अखाया जाम ती भाशोन हिंमत आपीन चेला काजे लिख्या कि चे तिनान वारला रितीसी मेवे एने चे चा पुगीण तिना माणसोन वारलो देखभाल कोऱ्या जे दयान वोजेसी भुरसू कोरला होता.

²⁸ अपुल्लोस तेरी ताकतसी एने कला साते यहुदि काजे आखा सामने अभिभूत कोऱ्यु, पवित्र शास्त्रमा गोथा प्रमाण आप्यू कि येसुत मसिह छे.