प्रेषित 17 - बारेली पावरी

थेस्सलुनीका नगर पौलुस एने सिलास

¹ ओवतेन चे अम्फिपुलिस एने अपुल्लोनीया गोथा थेस्सलुनीकामा आव्या, जो यहुदिन एक प्रार्थना घोर होतो.

² पौलुस आपना अनसारे तेरेनचा गोथू एने तीन शब्बाथोन दाहळे पवित्र शास्त्रमा गोथा तिंदरे साते वाद विवाद कोऱ्यु;.

³ तिंदरू मतलब खुल-खुलीन सोमजाडतू होतु कि येसु काजे दुख उठावनो एने मोरलामा गोथू जीव उठनो जोरुरी होतो; एने “युत येसु जेरी मे तुमु काजे काहनी सोमवाळतू होतु, मसिह छे,”

⁴ तीनु मायीन घोणा सोवटा जोना एने भोक्त युनानी मायला घोणा सोवटा; एने घोणा सोवटा कुलीन बायरा मान लेदा, एने पौलुस एने सिलास साते भेसकाय गया

⁵ बाकीन यहुदि रीसवायीन भावीन माणसो मायला काहनास दोगळू देण्या माणसोक यासोन घोर माणसे सामने लावणेन कोऱ्या.

⁶ चा तीनु काजे नि देखीन यो आयळता जायीन यासोन एने काहनास भाशो देसोन सुभेदारोन सामने हापकीन लाव्या, “एने जे माणसे जे जोगोक उलटो सुलटो कोर देदा, न्या बी आव गोयला छे,

⁷ यासोन तीनु काजे आपनेनचा गोथू राखलु छे, यु आखान आखा, यो कोयीन कि येसु राजा छे, एने केसरोन आग्यान खिलाप कोरतेला छे.”

⁸ चे माणसो काजे एने देसोन सुबेदार काजे सोमवाळीन बिहाळ देदा,

⁹ इनान कोरता चे यासोन एने बाकी माणसे जवाब पुछिन तीनु काजे छुळ देदा.

बिरीया नगरमा पौलुस एने सिलास

¹⁰ भाश तेत्यारुत रातन रात पौलुस एने सिलास काजे बिरीया मुकली देदा; एने चे चा पुगीण यहुदियान प्रार्थना घोर काजे गोया.

¹¹ जे माणसे ते थेस्सलुनीका यहुदामा गोथा वारू होता एने चे मोटली मोर्जीसी वचन स्वीकार कोऱ्या, एने दाहळीन पवित्राशास्त्रमा हेरता रोया कि ये वाते ओसात छे कि नि होय.

¹² इनान कोरता तीनुमा गोथा घोणा सोवटा एने युनानी कुळीन बायरा मायीन एने माणसोमा यान घोणा सोवटा भुरसू कोऱ्या.

¹³ बाकीन जेतार थेस्सलुनीका वावा यहुदि जान लेदा कि पौलुस बिरीयामा बी परमेश्वरोन वचन सोमवाळतलु, ती चा बी आवीन माणसो काजे उचकावने एने गरबळ कोरणे बाज गोया.

¹⁴ तेत्यार भाशे तेत्यारुत पौलुस काजे मुकली देदा कि दोरीया धोळे जात रोयू; बाकीन सिलास एने तीमथी चात रोय गोया.

¹⁵ पौलुस काजे पुगाळने वावा तीना काजे एथेंस तोक लीगोया एने सिलास एने तीमथीन कोरता आग्या लीन जात रोयू कि चे तेरेनचा छाटू सी छाटू आवे.

एथेंस नगरमा पौलुस

¹⁶ जेतार पौलुस एथेंस हिंदरी वाट जुव रोयू होतु, ती नोगोर काजे मुर्त्या सी भोरायलो देखीन हेरु जीव बोव गोयू.

¹⁷ आखरी चू प्रार्थना घोरोमा यहुदि एने भोक्ती कोरणे वावासी एने चौकमा जे माणसे जोळता होता तीनु काजे दाहळीन वाद विवाद कोऱ्या कोरतू होतु.

¹⁸ तेत्यार इपीकुरी एने स्तोईकीन माणसो माइन काहना तीना साते झोगळू कोरणे बाज गोया, एने काहनास कोया, “यु बळबळ कोरन्यू काय कोरणे चा रोयू?” बाकीन दिसरा कोया “चू दिसरा परमेश्वरोन प्रचारक मालूम पोळे, काहाकि चू येसु एने पोछोव जीव उठनेन वारली खोबर कोयतू होतु.”

¹⁹ तेत्यार चे तीना काजे आपने साते अरियुपगुसपोर लीन गोया एने पुछा काय आमु जान सोकसे कि यो नोवलो मोत जो तू सोमवाळ्यु, काय छे?

²⁰ काहाकि तू ओलोगुत वात आमु काजे सोमवाळे इनान कोरता आमु मालूम कोऱ्या कि तारो मतलब काय छे.

²¹ इनान कोरता कि आखा एथेंसवावा एने दिसरा देसोन छे, जे चा रोयता होता नोवली-नोवली वाते कोयने एने सोमवावने सिवाय एने कानला कामोन टेम नी विताळता होतु.

अरियुपगुसमा पौलुसोन प्रचार

²² तेत्यार पौलुस अरियुपगुसोन इचमा उबरोयीन कोयू, “हे एथेंसोन माणसोमा देखतू होतु कि तुमु आखान वातोमा परमेश्वर देवता काजे मोटू मानने वावा छे,

²³ काहाकि मे फिरतू जायीन आखी तुमरी पूजनेन चीजे देख रोयू होतु ती एक ओसी वेदी बी देख्यू जीना पोर लिखलो छे; ओनजान परमेश्वरोन कोरता इनान कोरता जीनाक तुमु बिना ओनजाण्यान पूजा कोरे, मी तुमु काजे तेरी वारली खोबर सोमवाळतलु.”

²⁴ जू परमेश्वर जोग एने तेरे मायला आखा चीजे बोनाव्यू, चू सोरग एने धोरतीन माहाराज होयीन हातोमा बोनावला मंदीरमा नि रोयतलु,

²⁵ ती काहना चीजोन गोरोजोन अनसारे माणसोन हातोन सेवा लेतलु छे, काहाकि चू खुद आखा काजे जीवन एने दोम लेनेन आखो काहीन आपतलु छे,

²⁶ चू एकुत मूवमा गोथो माणसोन आखा जाती काजे आखा धोरती पोर रोयनेन कोरता बोनावली छे; एने तेरो ठेरावला टेमे झुनो रोयनेन सिमाकाजे इनान कोरता बांदली छे,

²⁷ कि चे परमेश्वर काजे हेरो कोदि माईन तीना काजे छाचलीन देखे ती ते बी चे आमरेमा गोथा काहनास गोथू नांबे नी होय.

²⁸ काहाकि तीनामा आपु जीवतला रोयतला एने चालता फिरता एने पाका रोयतला पोसो तुमरा कोतरा भविष्य कोरता बी कोया आमु तेरा पिढी छे.

²⁹ आखरी परमेश्वरोन पिढी होयीन आमु काजे यो सोमोजनो वारलो नि होय कि परमेश्वर सोनो नि ते रुप्या नि ते दोगळा सारखू छे, जिना माणूस कामगिरी एने विचारोमा गाळाय गोयलु छे.

³⁰ इनान कोरता परमेश्वर आग्यान टेमोमा ध्यान नि लागाळतलु बाकीन हिमी आखा जागा पोर आखा माणसो काजे मोन फिरावनेन आग्या आपलु छे जीनामा चू तिना माणसोन लारे जोगोन नियाव कोरिस जीनान कोरता तिंदरू ठेरावलु छे एने तीना काजे मोरलामा गोथू जीवाळीन जी वात आखापोर मालूम कोर देदलु छे.

³¹ “काहाकि चू एक दाहळू ठेरावलु छे, जीनामा चू तिना माणसोन लारे धर्ममा गोथू जोगोन नियाव कोरसे जीनाक चू उब राखलू छे, एने तीनाक मोरलामा गोथू जीवाळीन जी वात आखी प्रणाम कोर देदला छे.”

³² मोरलान पोछोव जीव उठनेन वात सोमवीन काहनास ते मोजाक कोरणे बाज गोया एने काहनास कोया कि जी वात आमु तारे जुव गोथा कोत्यार सोमवसु.

³³ इनापोर पौलुस तिंदरा इचमा गोथू निकवीन गोयू.

³⁴ बाकीन काहना माणसे तीना साते ती मेवाय गोयू, एने भुरसू कोऱ्यु, जीनामा दियुनुसियुस अरियुपुगुस मेंबर होतु एने दमरिस नावोन एक बायोर होती एने तिंदरे साते ओवी बी माणसे होता.