प्रेषित 16 - बारेली पावरी

पौलुस एने तीमथी

¹ ओवतेन चू दिरबे एने लुस्त्रमा बी गोयू, चा तीमथी नावोन एक चेलु होतु जू काहना विश्वासी यहुदिन पुऱ्यु होतु बाकीन तेरु बास युनानी होतु.

² चू लुस्त्र एने इकुनियुमोन भाशोमा तेरो नाव होतो.

³ पौलुसोन मोर्जी होती कि चू तेरे साते आवे; एने जे यहुदि माणसे जिने जागे होता तिंदरेन कोरीन चू तेरी सुंता कोऱ्यु काहाकि चे आखा जानता होता कि तेरु बास युनानी होतु.

⁴ एने देस देसोम जाता जायीन चे इनी विधी काजे जे यरुशलेमोन प्रेषितोन एने डाह-डाहा ठेरावला होता माननेन कोरता तीनु काजे पुगाळाय जाता होता.

⁵ इना रितीसी मंडवी विस्वासमा पाकी बोनती रोयी एने आकळू दाहळीन बोढतू गोयू.

पौलुसोन दर्शन

⁶ फुग्रीया एने गलातिया प्रदेशमा गोथा, काहाकि पवित्र आत्मा तीनु काजे आसियाम वचन सोमावने मोना कोऱ्यु.

⁷ चे मुसियान साते पुगीण बिथुनीयामा जाणेन कोऱ्या बाकीन येसुन आत्मा तीनु काजे नि जाणे देदु.

⁸ आखरी चे मुसियामा गोथा त्रोआसमा आव्या.

⁹ चा पौलुस राती एक सोपनो देख्यू एक मकीदनी माणूस उबरोय रोयू होतु तीनाक विनता कोरीन कोय रोयू, “उरले धोळे उतरीन मकीदुनीयामा आव, एने आमरी सहायता कोर.”

¹⁰ तेरो यो सोपनो देखतेच आमु तेत्यारुत मकीदुनीया जाणेन कोऱ्या, यो सोमजीन कि परमेश्वर आमु काजे तीनुक वारली खोबर कोयने कोरीन बुलावलू छे.

¹¹ इनान त्रोआस गोथो ढोंड्यो छुळीन आमु सुदा सुमात्राके एने दिसरे दाहळे नियपुलीयामा आव्या.

¹² चा गोथा आमु फिलीप्पी पुग्या, जू मकीदुनीयान प्रांतोन मुख्य देस एने रोमीन वोस्ती होती, एने आमु तिना देसोमा थुलाक दाहळा तोक रोया.

¹³ शब्बाथोन दाहळे आमु देसोन झोपलान बारथे नोंदीन धोळे यो सोमजीन गोया कि चा प्रार्थना कोरणेन जागू होयसे, एने बोसीन तीनु बायरा काजे जे एखठा होयला होता वाते कोरणे बाज गोया.

युरोपोन पेहलू विस्वासी

¹⁴ लुदिया नावोन थुआतीरा देसोन जामन्या रोगोंन कापळा वेचने वावी एक भोक्तोन बायर सोमवी रोयी होती, प्रभू तेरु मोन उगाळ देदू कि ची पौलुसोन वातो पोर ध्यान लागाळे.

¹⁵ जेतार ची एने तेरा घोरानो मेवीन बाप्तिस्मा लेदा ती ची आमु काजे विनता कोरी “अगर तुमु मेसेक प्रभून विस्वासी सोमजी रोया, ती आवीन मारे घोर आवीन रोयू,” एने ची आमु काजे मोनावीन ली गोयी.

भुंडली आत्मासी छुटकारू

¹⁶ जेतार आमु प्रार्थना कोरणे जात रोया होता ती आमु काजे एक पावेरनी मेवी जीनीमा भविष्य कोयने वावी आत्मा होती; एने भविष्य कोरन्यान आखा घोराना वावान कोरता जुदो काय कोमायीन लावती होती.

¹⁷ ची पौलुस भूनी एने आमरे पोछोव आवीन आयळने बाज गोयी, “हे माणसो परमप्रधान परमेश्वरोन दास छे, जू आमुक छुटकारान वाते कोहीन सोमवाळतला छे.”

¹⁸ ची घोणा सोवटा दाहळा तोक ओसोत कोरती गोयी; बाकीन पौलुस काजे दुख लाग्यो एने चो पोछु फिरीन तिनी भुंडली आत्मा काजे कोयू, “मे तुसेक येसु मसिहन नावोसी आग्या आपो कि हिनीमा गोथू निकवी जा” एने ची तिना टेमे निकवी गोयी.

¹⁹ जेतार तेरु मालिक देख्यू कि आपनी कोमायीन आस जाणे बाज रोयी ती पौलुस एने सिलास काजे धोरीन चौकोमा प्रधानोनचा हापकीन लीगोयू;

²⁰ एने तीनाक फौजदार सुभेदारोनचा लीगोयू एने कोयू, “जी माणसे जे यहुदि छे एने आमरा देसोमा जुदो हाल चाल कोर रोया.

²¹ एने ओसी रिती देखाळने बाज रोया जीनाक सोमवीन मान लेनो आमरा रोमीन कोरीन ठीक नि होय”.

पौलुस एने सिलास जेलमा

²² जेतार गोरदी मायला माणसे तिंदरे खिलापमा एखठा होयीन चोळीन आव्या, एने सुबेदार तिंदरा कापळा फाडीन निकाव देदा, एने तीनु काजे वेत देनेन आग्या आप्यू.

²³ घोणा सोवटा वेत देवाळीन चे तीनु काजे बोंदी जेलमा नाख देदा, एने राखवावी कोरणे वावा काजे आग्या आप्यू कि वारू ध्यान राख एने तिंदरा पाय बांदायला साकव्यामा ओळकाव देदा.

²⁴ चू ओसी आग्या सोमवीन तीनुक बंदी वाळामा मेक्यू एने तिंदरा पाये बादांयलान साकव्यामा ओटकाळ देदु.

पौलुस एने सिलास जेलमा गोथा छुटकारू

²⁵ आदी रातोन टेमे पौलुस एने सिलास प्रार्थना कोरता जायीन परमेश्वरोन भजन गावता होता एने कैदि तिंदरो सोमवी रोया होता.

²⁶ ओतरामा एक मोटात भूकंप होयू, न्या तोक कि बोंदी जेलोन पायु हाल गोयू एने तेत्यारुत आखा झोपला उगळी गोया; एने आखान बंधन छुट गोयो.

²⁷ सिपायी राखवाव्यू जाग उठ्यू एने बोंदी जेलोन झोपला उगळलु देखीन सोमज्यू कि कैदि ढास गोया; आखरी चू तलवार उपसीन आपना खुदो काजे मार नाखनेन कोऱ्यु.

²⁸ बाकीन पौलुस मोटोत आयळीन कोयू, “आपना खुदो काजे काहीन दुखो पात मा कोरे काहाकि आमु आखा न्यात छे.”

²⁹ जेतार चू दिवू मांगाळीन माहाय कापतू जायीन पौलुस एने सिलासोन ओगोव पोळ गोयू.

दरोगान मन परिवर्तन

³⁰ एने तीनु काजे बारथे लावीन कोयू, “हे भाशो छुटकारू जोळे कोरीन मे काय कोरो?”

³¹ चे कोया “प्रभू येसु पोर भुरसू कोर ती तू एने तारो घोरानाक छुटकारू जोळसे.”

³² एने चे तीना काजे एने तेरा आखा घोरानो माणसो काजे प्रभून वचन कोया.

³³ राती तिनी टेमे चू तीनु काजे लीजायीन तिंदरो घाव धुव्यू एने चू आपना आखो माणसो साते बाप्तिस्मा लेदू.

³⁴ तेत्यार चू तीनु काजे आपना घोरोमा लीजायीन तिंदरे ओगोव खाणो मेक्यू एने आखो घोरानो मेवीन परमेश्वर पोर भुरसू कोरीन खुशी कोऱ्या,

³⁵ जेतार दाहळू उग्यु तेत्यार सुबेदार सिपायळान हाते कोय मूकल्यु कि तीनु माणसोक छुळ देवू.

³⁶ दरोगा राखवावी कोरणे वावू जी वात पौलुस काजे कोयू, “सुबेदार तुसे काजे छुळनेन आग्या कोय मूकललु छे इनान कोरता निकवीन शांतीसी जात रोय.”

³⁷ बाकीन पौलुस तीना काजे कोयू, “जे आमु काजे जू रोमी माणूस छे बिगर गुणावू ठेरावीन माणसो ओगोव देदु एने बोंदी जेलमा नाख्यू, हिमी काय आमुक चुराये निकाव रोया? ओसो नि; बाकीन चे खुद आवीन आमु काजे बारथे निकावे.”

³⁸ सिपायळा जी वात सुभेदार काजे कोया, एने चू यो सोमवीन कि रोमी छे बिही गोया.

³⁹ एने आवीन तीनु काजे सोमजाडया, एने बारथे लीजायीन विनता कोऱ्यु कि देसोम गोथा जात रोये.

⁴⁰ चे बोंदी जेलमा गोथा निकवीन लुदियानचा गोया, एने भाशो काजे मेवीन तीनुक शांती आप्या, एने जात रोया.