प्रेषित 15 - बारेली पावरी

यरुशलेमेन सभा

¹ थुलाक माणसे यहुदियामा गोथा आवीन भाशो काजे सिकाळने बाज गोया, “जेतार तोक मुसान रितीन अनसारे तुमरी सुंता नि होये ती तुमुक छुटकारू नि जोळे.”

² तेत्यार पौलुस एने बरनाबास इंदरे साते मतभेद एने वाद विवाद होयो ती पाको कोऱ्या कि पौलुस, बरनाबास एने तिनी मायला दिसरा माणसे इना तकलीपोन बारामा प्रेषित एने पुढारी इंदरेनचा यरुशलेममा आव्या.

³ आखरीमा मंडवी फीनीके एने सामरियामा गोथा आखा भाशोक दिसरा जाती मायला मोने परीवर्तनोन खोबर वारला रितीसी सोमवाळता जायीन एने खुशी पुगाळता होता.

⁴ जेतार चे यरुशलेम पुग्या ती तिंदरा स्वागत मंडवीन प्रेषितोन एने पुढारीन लारे कोऱ्या ती चे यो आखो कोयीन सोमवाळ्या जू परमेश्वर तिंदरे साते ठेरलु होतु.

⁵ बाकीन फरुशी पंथान काहना विस्वासी उबरोयीन तीनु काजे कोया “तिंदरी सुंता कोरणे एने मुसा नियमशात्र पावणेन आदेश आपनेन गोरोज छे.”

⁶ प्रेषितोन पुढारी इना बारामा विचार कोरणे कोरीन एखठा होया.

⁷ आखो झोगळू होय गोयो तेत्यार पतरस उबरोयीन तीनु काजे कोयू “हे भाशो, तुमुक मालूम छे घोणा सोवटा दाहळा होया, परमेश्वर तुमरेमा गोथू नेवाळलु छे कि मारा मुयोसी दिसरा जातीन माणसे वारली खोबर सोमवे एने भुरसू कोरे.

⁸ एने परमेश्वर जू माणसो काजे पारखे, तीनु काजे बी पवित्र आत्मा आपीन तिंदरा बारामा गोवायी आपे.

⁹ इना रितीसी विस्वासोन लारे तिंदरा मोन चुखा कोरीन आमरेमा एने तेरेमा काय अंतर नि मेक्यू.

¹⁰ आखरी चेलान खांदा पोर ओसो जुवळो मेकु, जीनाक नि आमरा डाहला पुढारी चूट सोक्या एने नि आमु चूट सोकजे, ती हिमी काहा परमेश्वरोन पारोख लेणे बाज रोया.

¹¹ बाकीन आमुक मालूम छे कि प्रभू येसुन दयामा आमरा छुटकारू होयलु छे जिना रितीसी तिंदरी.”

¹² तेत्यार आखी सभा हुगा रोयीण बरनाबास एने पौलुसोन वाते सोमवने बाज गोया कि परमेश्वर तिंदरे लारे दिसरा देसोमा जातीमा मोटला चिन्ह देखाळ्यू एने चमत्कार कोऱ्यु.

याकुबोन फैसलू

¹³ जेतार चे हुगा होय गोया तेतार याकुब कोयने बाज गोयू, “भाशो मारी सोमवू”.

¹⁴ शिमोन देखाळ्यू छे कि परमेश्वर पेहेल दिसरा जाती पोर कोसू दया कोऱ्यु कि तिंदरेमा गोथो तेरे नावोन कोरता एक प्रजा काजे नेवाळलु छे.

¹⁵ इनी वातोसी भविष्य कोरतान वचन बी मेवतलो छे जोसो कि लिखलो छे.

¹⁶ इनी वातोन ओवतेन मे पोछु आवीस एने मे दाऊदन पोळला तंबू काजे एने पोछु उबराखीस एने तिंदरा तूटला डेराक पोछु उबराखीस.

¹⁷ इनान कोरता माणसे एने दिसरा देसोन जो मारा नावोन कोवायता छे प्रभूक हेरे,

¹⁸ यो चू प्रभू कोये कि प्राचीन काव गोथू इना वातो काजे सामने लावतू गोयलु छे.

¹⁹ आखरीमा मे इना वातो पोर पुग्यू कि आपु इना काजे दुख नि आपता जो दिसरा जातीमा गोथा परमेश्वरोनचा फिरे.

²⁰ बाकीन तीनु काजे लिखीन मुकलो कि चे मूर्तीन भुंडला मा गोथा सिनावासी छुळ देयेगोवा दाबीन मारला जोनावरे मास एने लुयसी नांबे रोयजू.

²¹ काहाकि जोनावरोमा गोथो सोहोर-सोहोरमा मुसान नियम शास्त्रण वारली खोबर कोयने वावा होयने आवला छे, एने आखा शब्बाथोन दाहळे प्रार्थना घोरमा वाचाय जातली छे.

दिसरा यहुदिन विस्वास्या काजे चिट्ठी

²² जेतार पुरी मंडवी साते प्रेषितोन एने काहना काजे यो वारलो मालूम पोढ्यो कि आपना इचमा काहना माणसोक नेवाळीन बरसब्बा कोवायतलु यहुदा एने सिलास काजे यु भाशोमा पुढारी होतु, तीनुन पौलुस एने बरनाबास साते अन्ताकिया मूकले.

²³ चे तिंदरे हाते यो लिखीन मुकल्या “प्रेषितोन एने तीनु भाशोन तोरोफसी जे डायला छे, अन्ताकिया सिरीया एने किलिकिया मंडवीन भाशो काजे जे दिसरा जातीन होता नमस्कार.”

²⁴ जेतार आमु सोमव्या कि आमरे मायला काहनास आमरे आदेश बिगुर आमरी वातोसी तुमु काजे बिगाळ देदा, एने तुमरा मोनो काजे कोमजुर कोर देदला छे.

²⁵ एक मत होयीन आमु काजे यो मालूम पोळ्यो कि आपनु मोंगावू बरनाबास एने पौलुसोन साते काहीन भाशोन काजे नेवाळीन तुमरेनचा मुकले.

²⁶ यो ओसा भाश छे जे आमरा प्रभू येसुन मसिहन नावोसी आपना जीवो काजे तोकलीतमा नाखतला.

²⁷ इनान कोरता आमु यहुदा एने सिलास काजे मुकलला छे खुद आपना मुयोशी आखी वातोन खोबर आपसे.

²⁸ काहाकि पवित्र आत्मा एने आमु काजे यो वारू लाग्यो इना गोरोजोन वाते छुळीन तुमरे पोर एने काहीन भार नि मेके;.

²⁹ कि तुमु मूर्ती पोर बलिदान चोळावला चीजोसी, लुयसी, गोवू दाबीन मारलो जोनावर मास सी, एने सिनावो सी छेटा रोयजू इंदरेसी वाचीन रोयजू तुमरो भोलो होयसे.

³⁰ चे आखा मुकोलनेके बाद अन्ताकिया गोया एने चो सोभा भोरावीन बुलावीन तीनु काजे ची चिट्ठी आपी.

³¹ जेतार चे ची चिठ्ठी वाच लेदा ती तिंदरेसी पाका होयीन घोनी खुशी लागी.

³² यहुदा एने सिलास बी खुद भविष्य कोरता होयनेन नाते भाशो काजे मोटूत संदेश आपीन पाक एने मजबूत कोऱ्यु.

³³ चे थुलाक दाहळा चा रोयनेन ओवतेन भाशोनचा शांतीसी तिंदरा मुकलने वावानचा तीनु काजे मुकली देदा.

³⁴ बाकीन सिलास काजे चा रोयनो वारू लाग्यो,

³⁵ पौलुस एने बरनाबास भी अन्ताकियामा रोय गोया एने घोणा सोवटा माणसोन साते प्रभून वचन सिकाळ्या एने तेरो वारली खोबरोन प्रचार कोरता गोया.

पौलुसोन एने बरनाबास मा मतभेद

³⁶ थुलाक दाहळा बादमा पौलुस बरनाबास काजे कोयू जिना-जिना सोहोरोमा आपु परमेश्वरोन वचन सोमवला होता चाल आपु पोसा तीनुक भाशो काजे देखणे कि चे कोसकाय छे.

³⁷ बरनाबास तेरे साती मरकुस कोयने वावू योहान काजे बी लीन जाणेन कोऱ्यु.

³⁸ बाकीन पौलुस तीना काजे यु पमफुलीयामा तीनु गोथू ओलोग होय गोयलु होतु, एने कामे हिंदरे साते नि गोयू, साते लीजाणे वारू नी सोमज्यू.

³⁹ आखरी ओसू विवाद उठ्यू कि चे, एक दिसरासी ओलोग होय गोया, एने बरनाबास मरकुस काजे लीन ढोंड्यो पोर साईप्रस जात रोयू.

पौलुसोन सिलास साते दुसरी प्रचार

⁴⁰ बाकीन पौलुस सिलास काजे नेवाळ लेदू, एने भाशो काजे परमेश्वरोन दयासी सोपाय जायीन चा गोथू जात रोयू.

⁴¹ एने चू मंडव्या काजे वातळा कोरतु जायीन सिरीया काजे किलिकिया जातु जायीन चा गोथू जात रोयू.