प्रेषित 14 - बारेली पावरी

पौलुसोन एने बरनाबासोन इकुनियुममा खिलाप

¹ ओवतेन ओसो होयो कि इकुनियुममा चे साते-साते यहुदियान प्रार्थना घोरोमा गोया, एने चे इना रितीसी वाते कोऱ्या कि यहुदि एने युनानी दुयो मायीन घोणा सोवटा माणसे भुरसू कोऱ्या.

² बाकीन जे यहुदि भुरसू नि कोऱ्या, चे दिसरा जातीन मोनोमा भुंडली वाते भोराइन तिंदरा मोनोमा भाशोन विरोधमा भोळकाव्या एने भुंडलो कोय देदा.

³ इनान कोरता चे चा घोणा सोवटा दाहळा तोक रोया एने प्रभू तिंदरे हातोसी मोटला काम कोरीन आपना दयान वचनोन गोवायी आपता रोया.

⁴ बाकीन देसो मायला माणसोमा फुट पोळ गोयी जीनाम गोथा काहीन यहुदिन पक्षामा एने काहना प्रेषितोन पक्षामा होय गोया.

⁵ बाकीन जेतार दिसरा जाती मायला एने यहुदि तीनुक बोदनाम एने तीनु काजे दोगळा देणे कोरता तिंदरा सरदार साते दौडीन गोया.

⁶ उवखीन चे लुकाउनिया प्रांतमा लुस्त्र एने दिरबेन देसोमा एने आस-पासोन प्रदेशमा दोवळी पोळ्या;

⁷ एने चा वारली खोबर कोयता रोया.

लुस्त्रामा लेंगळा काजे वारू कोरनो

⁸ लुस्त्रमा एक माणूस बोस रोयू होतु जेरा पाय कोमजुर होता चू आशोन पेटोमा गोथू लेंगळू होतु एने कोदि नि चाललु होतु.

⁹ यु माणूस पौलुसोन वात कोरतेलू सोमवी रोयू होतु पौलुस तेरे भूनी निंगा लागाळ्यु एने यो देखीन कि तीनाक वारू होयनेन भुरसू छे.

¹⁰ जुरेत कोयू, “आपना पायो पोर सुदू उबरोयजा,” एने चू उछविन उभू रोय गोयू एने चालने फिरने लाग्यू.

¹¹ पौलुसोन इना कामो काजे देखीन लुकाउनिया भाषान माणसे आयळीन कोयने बाज गोया, परमेश्वर.

¹² चे बरनाबास काजे ज्यूस कोयने बाज गोया एने पौलुस काजे हिमर्स कोयू कि चू वात कोरनेन प्रमुख होतु.

¹³ ज्यूसोन चू मंदीर सोहोरोन सामने होतु तेरा पुजारी जू तिंदरा गावोन न सामने होतु, बुल एने फुलोन हार झोपले लीन आव्यु एने माणसोन सामने बलिदान कोरणे कोऱ्यु.

¹⁴ बाकीन जेतार प्रेषितोन बरनाबास एने पौलुस यो मालूम पोळ्यो ती चे तिंदरा डोगला फाळ देदा, एने माणसोन गोरदीन सामने यो कोयता जायीन कोया.

¹⁵ “हे भाशो यो आखो काय कोरणे बाज रोया? आमु बी ते तुमरे सारखा माणसे छे; एने तुमुक इना रितीसी वारली खोबर कोयजे कि, तुमु इना वायबार चीजोन कामे छुळीन जीवतला परमेश्वर भूनी फिरू जू सोरग धोरती एने दोरीया एने जो काय तेरेमा छे आखाक बोनाव्यू.”

¹⁶ चे गोया दाहळामा आखा जाती काजे आपना-आपना वाटे चालने सिकाळ्यु.

¹⁷ ते बी चू आपना खुदो काजे बिगर गोवान नि छुळ्यु बाकीन चू वारलो कोरतू रोयू एने सोरगोमा गोथो तुमु काजे पाणी मोसोमसी फोवे तुमरो मोन काजे खाणो एने खुशी भोरतू गोयू.

¹⁸ यो कोयनो बी चे तिनी गोरदी काजे मुशकीलसी रुक्या कि तेरेन कोरता बलिदान मा आपु.

¹⁹ बाकीन अन्ताकिया एने इकुनियुम गोथा यहुदि आव्या एने चे गोरदी काजे आपने भूनी वावीन पौलुस काजे दोगळा देदा एने तीनाक मोर गोयू सोमजीन गावोन बारथे घिसळीन लीजायीन नाख देदा.

²⁰ बाकीन चेला जेतार तेरे चारो धोळे आवीन उबरोय गोया ती चू उठ्यू एने गावमा गोया दिसरे दाहळे चे बरनाबास साते दिरबेमा जात रोया.

सिरीयामा गोथा अंतखीयामा जाणो

²¹ एने जिना देसोमा वारली खोबर कोये एने घोणा सोवटा चेला बोनावने कोरता चे लुस्त्र, एने इकुनियुम एने अन्ताकियामा पोसा गोया.

²² एने चेलान मोनो काजे पाका कोरता एने भुरसामा टीकिन रोयनु जुवे कोरीन तीनु काजे धीर आपता गोया, “आमु काजे जुदो तोकलीत कोरीन परमेश्वरोन राजमा जाणो छे.”

²³ एने चे आखा मंडवीमा पुढारी नेम देदा एने उपास प्रार्थना कोऱ्या एने तीनुक प्रभून हातोमा सोप देदा जीना पोर चे भुरसू कोरता होता.

²⁴ ओवतेन चे पिसिदियामा गोथा पमफुलीयामा पुग गोया.

²⁵ ओवतेन पीरगामा वचन सोमवाळीन चे इटली गोया.

²⁶ चा गोथा चे ढोंड्या पोर बोसीन अन्ताकियामा गोया, जा चे परमेश्वरोन दयामा तीना कामोक पुरो कोरला होता.

²⁷ चा पुगीण चे मंडवी काजे एखठा कोऱ्या एने जो काहीन परमेश्वर तिंदरे साते कोरलु होतु तीनाक कोयीन सोमवाळ्या एने यो बी कि काहना भातीन परमेश्वर दिसरा जातीन कोरता विस्वासोन झोपलु उगाळलो छे.

²⁸ तेत्यार चे चेला इंदरे साते घोणा सोवटा दाहळा तोक रोया.