प्रेषित 13 - बारेली पावरी

बरनाबास एने शाउल काजे मुकलनो

¹ अन्ताकिया मंडवीमा काहनास भविष्य कोरता एने भोनावने वावा होता जोसा बरनाबास एने शिमोन जीनाक नीगर कोयता होता एने लुकीयुस कुरेनेकर, चौथाईन देसोन राजा हेरोदसोन दुधभाई मनाहेम एने शाउल.

² जेतार चे उपास एने प्रभून आराधना कोरता होता ती पवित्र आत्मा कोयू, “मारेन कोरता बरनाबास एने शाउल काजे इना कामोन कोरता ओलोग कोरु जिनान कोरता मे हिनु काजे बुलावलो छे.”

³ चे जेतार उपास प्रार्थना कोर लेदा ती तिंदरे पोर हात मेकीन तीनु काजे मुकली देदु.

पौलुसोन पेहली प्रचार यात्रा

⁴ आखरी; पवित्र आत्मान लारे मुकलाय गोयला चे सिलूकिया गोया चा गोथा ढोंड्या पोर साईप्रस गोया.

⁵ सलमीस पुगीण चे यहुदियान प्रार्थना घोरोमा परमेश्वरोन वचनोन प्रचार कोरनेन चालू कोऱ्या योहान तिंदरू सेवक होतु.

⁶ चे तिना आखा टापुमा जाता जायीन पाफूसमा तोक पुग्या चा तीनुक बार-येसु नावोन एक यहुदि जादू टोना एने झुटा भविष्य कोरता मेव्यू.

⁷ चू हाकिम सिरगियुस पौलुस साते होतु जू बुद्धिवान माणूस होतु, चू बरनाबास एने शाउल काजे आपने साते बुलावीन परमेश्वरोन वचन सोमवावने कोऱ्यु.

⁸ बाकीन एलीमास जादुवावू काहाकि योत तेरा नावोन मतलब छे तिंदरू खिलाप कोरीन अधिकारी काजे भुरसू कोरनेसी रुकनेन कोऱ्यु.

⁹ तेत्यार शाउल जेरो नाव पौलुस बी होतो पवित्र आत्मा भोरायीन तेरे भूनी टोक लागाळीन देख्यू एने कोयू.

¹⁰ “हे आखा कपटी दोगावा एने आखा लुचळा मायला भोरायलु भुतडान पुऱ्या आखा धोरमीन दुष्मोन तू परमेश्वरोन सुदली वाटोक वाको कोरने नि छुळे काय?”

¹¹ हिमी देख प्रभून हात तारे पोर लागलु छे; एने तू काहीन टेम तोक आंदवू रोयीस एने दाहळा काजे नि देखे, ती तेतारुत धुंदवायलो एने आंदारो तेरे पोर छावाय गोयो, एने चू उरू पोरु चालने बाज गोयू काहाकि कुदु तेरु हात धोरीन नि चाले.

¹² तेत्यार अधिकारी जो होयलो होतो तीनाक देखीन एने प्रभून प्रचार सी नोवलाय कोरीन भुरसू कोऱ्यु.

पिसिदियान अन्ताकियामा पौलुसोन प्रचार

¹³ पौलुस एने तेरा साती पाफूसमा ढोंड्याक सुळीन पमफुलीयान पीरगामा आव्या; एने योहान तीनुक छुळीन यरुशलेममा पोछु जात रोयू.

¹⁴ पीरगा गोथो ओगोव जाईन चे पिसिदियान अन्ताकिया पुग गोया; एने शब्बाथोन दाहळे प्रार्थना घोरमा जायीन बोस गोया.

¹⁵ तेत्यार नियम शास्त्र एने भविष्य कोरतान किताब भोननेन ओवतेन प्रार्थनान घोरोन सरदार तिंदरेचा कोय मुकल्या, “हे भाशो अगर माणसोक प्रचार कोरणे कोरता तुमरा मोनोमा काहीन होय ती कोयू.”

¹⁶ तेत्यार पौलुस उबरोयीन एने हातोसी इशारा कोरीन कोयू “हे इस्राईल एने परमेश्वर काजे बिहीन सोमवू.”

¹⁷ इनू इस्राईलोन माणसोन परमेश्वर आमरा डाहा-डाहा काजे नेवाळ लेदू एने जेतार माणसे मिसर देसमा परदेशी होईन रोयता होता ती तिंदरो वारू कोऱ्यु; तेरे ताकतसी निकाव लाव्यू.

¹⁸ चे चावीस साल तोक बोयळामा तिंदरो सोहोन कोऱ्यु.

¹⁹ एने कनान वातोमा सात ओलोग माणसोन झुंड काजे नाश कोरीन तिंदरू देस साळे चार सालमा तिंदरो हातोमा कोर देदु.

²⁰ तेरे ओवतेन चू शमुवेल भविष्य कोरता तोक तीनुमा न्यायी ठेराव्यू.

²¹ तेरे ओवतेन एक राजा मांग्या; तेत्यार परमेश्वर चावीस साल तोक बिन्यामीन पिढी मायलु एक माणूस, मतलब किशोन पुऱ्या शाउल काजे तीनु पोर राज ठेराव्यू.

²² तीनाक निकावीन ओवतेन दाऊद काजे तिंदरू राजा बोनाव्यू जिनान बारामा चू गोवायी आपलु एने कोयू, मेसेक एक माणूस यिशै पुऱ्यु जोळलु छे, जू मारा मोनोन अनसारे छे, एने जू मारी आखरी मोर्जी पुरी कोरसे.

²³ इना माणसोन पिढीमा गोथू परमेश्वर वायदू नुसार इस्राईलोन एक छुटकारू आपन्यु येसु काजे मूकल्यु.

²⁴ तिनान पेहेले योहान आखा इस्राईलोन माणसोन मोन फिरावनेन बाप्तिस्मान प्रचार कोरलु होतु.

²⁵ जेतार योहान आपनो काम पुरो कोरणे पोर होतु ती चू कोय रोयू होतु, तुमु मेसेक काय सोमजी रोया? मे चू नि होय बाकीन देखू मारे पोछोव एक आवने वावू छे तेरा पायोन खासळान बोंद बी छुळनेन मारी लायकी नि होय.

²⁶ हे मारा वारला भाशो अब्राहामन पुऱ्या तुमरे मायला जो परमेश्वरोन बिक धोरतला, तुमरेनचा इना छुटकारान वचन मुकोललो छे.

²⁷ इना माणसो काजे भविष्य कोरतान वाते जीनुक दाहळीन शब्बाथोन दाहळे भोनतला छे नि सोमवता जायीन यरुशलेमोन रहीवाश्या एने तिंदरा अधिकारी तीना काजे गुणावा ठेरावीन इनी वातोक पुरो कोऱ्यु.

²⁸ बाकीन तिंदरे जुव तीनाक मार नाखनेन काहनुस टूवू नी होतु, ते बी चे पिलातोन चा मोंग कोऱ्या कि तीनाक मार दे,

²⁹ जेतार चे तेरे बारामा लिखायली आखी वाते पुरो कोर देदू, तेत्यार चे तीना काजे ख्रुस पोर गोथू उतारीन मोळवाट्यामा मेक देदा,

³⁰ बाकीन परमेश्वर तीना काजे मोरलामा गोथू जीव उठाळ्यु.

³¹ एने जे तिंदरे साते गलीली गोथा यरुशलेम आवला होता तीनु पोर घोणा सोवटा दाहळा तोक देखतू गोयू, जे चेत छे हिमी माणसो सामने तेरा गोवा छे.

³² आमु तिना वायदान बारामा जी वायदू परमेश्वर डाहला काजे कोरलु होतु जी वारली खोबर सोमवाळतला.

³³ परमेश्वर येसु काजे जीवाळीन चीत वायदू आमरा पुऱ्यान कोरता पुरो कोऱ्यु छे कि दुसरा शास्त्रमा लिखलो छे तू मारू पुऱ्यु छे, आजुत मी तुसे काजे जन्मो आपलु छे;.

³⁴ चू तीना काजे मोरलामा गोथू जीवाळ्यु कि चू कोबी सोळे, चू पाको कोयू, मे दाऊदन पवित्र विस्वासीन दान चो तुसेक आपीस.

³⁵ इनान कोरता चू एक एने शास्त्रमा कोयू कि, तू आपना पवित्र माणसो काजे सोळने नि देये.

³⁶ काहाकि दाऊदन परमेश्वरोन मोर्जी नुसार आपना पीढीन माणसोन सेवा पुरो कोरीन सुव गोयू एने आपना आखा बाप दादानचा गाळाय गोयू, एने सोळ गोयू.

³⁷ बाकीन जीना काजे परमेश्वर जीवतू कोरतेलू छे सोळे नी.

³⁸ इनान कोरता हे भाशो तुमु यो सोमजी लेवू कि इनान लारे पापोन माफीन वारली वाते कोय रोया.

³⁹ एने तिनान लारे होर एक भुरसू कोरणे वावू तिनी आखरी वातोसी छुटकारू लेतलु जीनासी तुमु मुसान नियम शास्त्रण लारे निरदोष नि ले सोकतला होता.

⁴⁰ इनान कोरता हुशारीमा रोयजू कि भविष्य कोरतान वाते तुमरे पोर नि आवे;.

⁴¹ हे बुराई कोरणे वावा देखू नोवलाय कोरु एने नाश होय जावू काहाकि मे तुमरा दाहळामा एक काम कोर रोयू चो काम ओसो कि, जो कुदू तुमु काजे वात कोयने से तीना पोर तुमु भुरसू नि मेके.

अंतखीयामा पौलुस एने बरनाबास

⁴² जेतार पौलुस एने बरनाबास बारथे जाणे बाज गोया ती माणसे तीनुक विनता कोऱ्या कि आवने वावा शब्बाथोन दाहळे जी वाते ओवी सोमवाळे.

⁴³ जेतार आराधना सोर गोयी ती घोन सोवटा यहुदिवावा आवला एने भोक्तीवावान गोथा घोणा सोवटा माणसे पौलुस एने बरनाबास पोछोव चाल पोळ्या चे वाते कोयता जायीन तीनु काजे सोमजाड्या कि परमेश्वरोन दयामा टीकिन रोयजू.

⁴⁴ ओगला शब्बाथोन दाहळे घोणा सोवटा आखा गावोन माणसे परमेश्वरोन वचन सोमवने एखठा होया.

⁴⁵ बाकीन जेतार यहुदि भिळ काजे देख्या ती चे हेवाय कोरणे बाज गोया एने बुराई कोरता जायीन पौलुसोन कोयली वातो काजे रुकने बाज गोया.

⁴⁶ तेत्यार पौलुस एने बरनाबास हिंमतसी कोया, “यो होयनोत होतो कि परमेश्वरोन वचन पेहेले तुमु काजे सोमवाळ देता बाकीन इनान कोरता कि तुमु तेरी नि सोमवतला एने आपना खुदो काजे ओमोर जीवनोन जाणेन लायकी नी कोरतेला ती आमु दिसरा देसोमा जाता होता.”

⁴⁷ काहाकि प्रभू आमु काजे जी आग्या आपलु छे कि, “मे तुसे काजे दिसरा जातीन कोरता विजावा ठेरावलु छे, तू धोरतीन धोळे तोक छुटकारू कोरने वावू बोनीस.”

⁴⁸ जेतार दिसरा जाती वचन सोमव्या ती चे खुशी कोरतेला जायीन प्रभून वचनोन स्तुती कोरणे बाज गोया एने जोतरा ओमोर जीवनोन कोरता ठेराव गोयला होता, चे भुरसू कोऱ्या.

⁴⁹ एने प्रभून वचन पुरा इलाकामा पोसोरतो गोयो.

⁵⁰ बाकीन यहुदि भोक्त एने कुलीन बायर एने सोहोरोन अधिकारी काजे भोनकाव्या एने पौलुस एने बरनाबास काजे तोकलीत आपीन गावोन बारथे निकाव देदा.

⁵¹ इनान कोरता चे तिंदरा खिलापमा आपना पायोन सोयळू झोटकीन इकुनियुम जात रोया.

⁵² एने चेला खुशीसी पवित्र आत्मासी पुरा-पुरा होयता गोया.