प्रेषित 12 - बारेली पावरी

हेरोदोसोन हिंसा

¹ तिनी टेमे हेरोद राजा मंडवीन काहनास माणसो काजे तोकलीत आपनेन तिंदरे पोर हात नाख्या.

² चे योहानोन भाश याकुब काजे तलवारे कोरीन मार नाख्या.

³ तेत्यार चे देख्या कि यहुदि इनी वातोसी खुश होयतला ती चे पतरस काजे बी धोरणेन कोरीन पाय चुट्या, जे बेखमीर रुटान तीहीवारोन दाहळा होता.

⁴ एने चे तीना काजे धोरीन बंदी वाळामा मेक देदा एने चार-चार सेनान चार तुकडीन पहरा इना रितीसी मेक्या कि वोलांडोनोन टेमे तीनाक बारथे माणसो सामने लावाय जाय.

पतरसोन जेलमा गोथो छुटनो

⁵ इना रितीसी पतरस बंदी वाळामा मेक देदा, बाकीन मंडवी तेरेन कोरता परमेश्वरोनचा मोन लागाळीन एकजूट होयीन प्रार्थना कोरता होता.

⁶ जेतार हेरोद तीना काजे माणसोन सामने बारथे लावणे वावू होतु तिने राती पतरस दुय साकवोसी बांदायू, दुय सीपायळान इचमा सुव रोयू होतु एने राखवाव्या बंदी वाळान राखवावी कोरता होता.

⁷ एने देखू प्रभून एक सोरग दूत आयु एने तिना खुलीमा विजावो चोमक्यो एने चू पतरसोन पासवी पोर हात लागाळीन तीनाक जागाळ्यु एने कोयू “साटू उठ एने तेरो हातोमायला साकव्या निकवीन पोळ गोया.”

⁸ सोरग दूत तीना काजे कोयू, “कोळ्यो बांध एने तारा खासळा पेहेर” चू तोसुत कोऱ्यु ओवतेन चू तीना काजे कोयू “तारा डोगला पेहेरीन मारे पोछोव आव.”

⁹ चू बारथे निकव्यू एने तेरे पोछो पोछोव चालतू गोयू बाकीन तीनाक यो नि सोमज्यो कि यो काय सोरग दूत कोर रोयो चो छाचलीन छे बाकीन यु सोमज्यू कि मे दर्शन देखने बाज रोयू.

¹⁰ एने जेतार चे पेहेले एने दिसरा पहरा देने वावानचा गोथा निकवीन लुहळान तिना झोपले तोक आव्या, जू सोहरो भूनी छे. चू तिंदरेन कोरता आपसुत उगळी गोयू चे बारथे निकवीन एक गोविमा गोथा निकवीन जात रोया, अतरामा सोरग दूत तीनुक छुळीन जात रोयु.

¹¹ तेतार पतरस हुशारीमा कोयू “हिमी मे छाचलीन जान लेदू कि प्रभू आपना सोरग दूतोक मुकलीन मेसेक हेरोदोन हाथमा गोथू छुळाव लेदलु छे, एने यहुदिन आखा कामो पोर पाणी फिरवीन देदलु छे.”

¹² जेतार तीना काजे यो मालूम होय तिना योहानोन आव मरीयमन घोर गोयू जीनाक मरकुस बी कोयता होता चा घोन सोवटा माणसे एखठा होयीन प्रार्थना कोर रोया होता.

¹³ जेतार चू झोपला काजे ठुक्यू ती रूदा नावोन पावेरनी देखणे आवी.

¹⁴ जेतार ची पतरसोन आवाज उवखी ती खुशीन लारे झोपलु उगाळे बिना दोवळीन माहाय गोयी एने देखाळी कि पतरस झोपले उबरोय रोयू.

¹⁵ जेतार तिनी काजे कोया “तू गांडवाय गोयी” बाकीन ची भुरसू आपीन कोयी कि यो छाचलीन छे, तेत्यार चे कोया, “तेरु सोरग दूत होये!”

¹⁶ बाकीन पतरस झोपलु ठूकतू रोयू जेतार चे झोपलु उगाळ्या ते बी चे देखीन नोवलाय कोरता रोया.

¹⁷ बाकीन चू तीनु काजे हुगा रोयनेन हात वारू कोरीन देखाळ्यू प्रभून काहनास रितीसी मेसेक बंदी वाळामा गोथू बारथे निकव्यू, एने चू कोयू याकुब एने भाशो काजे जी वात कोय देजु “तेत्यार चू चा गोथू निकवीन दिसरे जागे जात रोयू.

¹⁸ सोंदारे होयताच सिपायळा घाबराय गोया कि पतरसोन काय होयो.”

¹⁹ हेरोद जेतार तेरी वात हेऱ्यु एने चू नी जोळ्यू ती चू राखवावी कोरणे वावान विचार चौकसी कोऱ्यु एने ओवी आग्या आप्यू कि इनाक लीजायीन मार नाखू, एने चू यहुदिमा गोथू कैसरमा जायीन रोयने बाज गोयू.

हेरोदोसोन किळाक मारनो

²⁰ चू सेर एने सिदोनोन माणसोसी जादा रीसवाय रोयू होतु चे एक मन होईन तेरेनचा आव्या एने राज भवनोन प्रबंधक बलास्तुस काजे मोनावीन भोलो कोरनेन कोऱ्या काहाकि राजा देसोम गोथा तिंदरा देसोमा पालन पोषण होयतो होतो.

²¹ ठेरावले दाहळे हेरोदोन राजान छिंदरा पेहेरीन नियावोन गादीपोर बोस्यू एने तीना काजे भाषण आपने बाज गोयू.

²² एने माणसे आयळता रोया, “युत माणसोन नि, परमेश्वरोन वाणी छे,”

²³ तिने टेमे प्रभून एक दूत तीनाक देदु काहाकि चू परमेश्वरोन महिमा नि आप्यू तिनान डीलोमा किडा पोड गोया एने चू दोम छुळ देदु,

²⁴ बाकीन परमेश्वरोन वचन बोढतो एने फैलतो गोयो.

²⁵ बरनाबास एने शाउल जेतार आपनी सेवा पुरी कोर देता ती यरुशलेममा गोथा पोछा आव्या आपने साते योहान काजे बी, जू मरकुस कोवायतू होतु लीन आव्या.