प्रेषित 11 - बारेली पावरी

पतरसोन यरुशलेममा आवनो

¹ ओवतेन प्रेषित एने भाशे जे आखा यहुदियामा होता सोमव्या कि दिसरा जाती बी परमेश्वरोन वचन सोमवी लेदला छे.

² आखरी जेतार पतरस यरुशलेममा आव्यु ती सुंता कोरला माणसे तीना काजे यो कोयीन वाद विवाद कोरणे बाज गोया.

³ “तू ते बिगर सुंतान माणसोन घोर जायीन तिंदरे साते खादु.”

⁴ तेत्यार पतरस तीनु काजे लाईनशीर सोमजाडीन सोमजाडने चालू कोऱ्यु,

⁵ मे यापा देसमा प्रार्थना कोरतू होतु मे सोपनामा एक दर्शन देख्यू कि एक मोटोत चादरान तोसो चार धोळे टांगायलो सोरगोमा गोथो उतरणे बाज रोयो, चो मारेंचा आव लाग्यो.

⁶ एने जेतार मे तीना काजे ध्यान लागाळीन देख्यू ती तीनामा धोरतीन चार पायोन बोयळा मायला जोनावरे एने घिसळाय ने वावा जंतू एने सोरग मायला चिल्लाक देख्यू.

⁷ तेत्यार मेसेक आवाज सोमवायी, पतरस उठ एने खा.

⁸ बाकीन मे कोयू, “हे प्रभू कोबी नी, काहाकि मारा मुयोमा भुंडली चीजे कोबी नि गोयी.”

⁹ बाकीन एरा जवाबमा दिसरे कावा सोरगोमा गोथी आवाज आवी, जीना काजे परमेश्वर चुखलो ठेरावलु छे तीना काजे भुंडली मा कोये.

¹⁰ तीन कावा ओसोत होयो तेत्यार आखो काय ओवतेन पोसो सोरगोमा चुटाय गोयो.

¹¹ एने देखू, तिनी टेमे तीन माणसे जे कैसरमा गोथा मारेंचा मुकलला होता तिना घोरोन सामने आवीन उबरोय गोया, जा आमु रोयला होता.

¹² पवित्र आत्मा मेसे काजे कोयू कि बिना विचारोन तिंदरे साते जा एने छोव भाशे बी मारे साते आवला आमु तिना माणसोन घोर गोया.

¹³ चू आमु काजे देखाळ्यू कि काहना रितीसी चू सोरग दूतो काजे तेरे घोरोमा उबोरोयलो देख्यू यो कोयतू सोमव्यू काहनास काजे यापा मुकलीन शिमोन काजे जिनाक पतरस कोयतेला छे न्या बुलाव ले.

¹⁴ चू तुसे काजे ओसी वात देखाळसे जिनान लाव लारे तू एने तारो आखो घरानो छुटकारू होयसे.

¹⁵ एने जोसू मे बुलनो चालू कोऱ्यु ती पवित्र आत्मा तिंदरे पोर बी तीना रितीसी उतऱ्यु जिना रितीसी पेहेले आमरेपोर उतरलु होतु.

¹⁶ तेत्यार परमेश्वरोन वचन मेसेक फोम आवी जो चू काय कोरतू होतु, योहान ते पाणीन कोरीन बाप्तिस्मा आप्यू बाकीन तुमुक पवित्र आत्मासी बाप्तिस्मा जोळसे.

¹⁷ आखरी जेतार परमेश्वर तीनुक भी चो दान आप्यू, जो आमुक प्रभू येसु मसिह पोर भुरसू कोरणेसी जोळलो होतो; कि मे कून होतु जू परमेश्वर काजे रुकतू?

¹⁸ चो जे सोमवीन हुगात रोय गोया एने परमेश्वरोन बोढाई कोरता जायीन कोये बाज गोया तेत्यार ते परमेश्वर दिसरा जाती काजे जीवनोन कोरता मोन फिरावनेन वरदान आपलु छे.

अन्ताकियामा शाउल एने बरनाबास

¹⁹ आखरी, माणसे तिना तोकलीतोन वोजेसी जे स्तेफनुसोन बारामा सुरवात होयली होती वेर-वेर होय गोया, चा फिरता-फिरता फीनीके एने साईप्रस एने अन्ताकियामा पुग्या, बाकीन यहुदिक छुळीन दिसरा काजे वचन नि सोमवाळता होता.

²⁰ बाकीन तीनु मायला कुदू साइप्रसोन एने कुरेनी होता जे अन्ताकिया पुगीण युनानी काजे बी प्रभू येसुन वारली खोबर सोमवाळने बाज गोया.

²¹ प्रभून हात तिंदरे पोर होतु एने घोणा सोवटा माणसे भुरसू कोरीन प्रभूनचा वोव गोया.

²² जेतार तिंदरी वाते यरुशलेमोन मंडवी काजे सोमवायी ती चे बरनाबास काजे अन्ताकियामा मुकली देदा.

²³ जेतार चू चा पुगीण परमेश्वरोन मोंगोक देखिन चू खुश होय गोयू एने चू तीनु आखा काजे उत्साहित कोरणे बाज गोयू कि चे पुरा मोनोसी प्रभूनचा चीटकिन रोये.

²⁴ काहाकि बरनाबास एक वारलु माणूस होतु एने पवित्र आत्मा एने भुरसामा पुरू होतु एने घोणा सोवटा माणसे परमेश्वरोनचा लावाय गोया.

²⁵ तेत्यार चू शाउल काजे हेरने कोरीन तरसुस गोयू.

²⁶ जेतार चू तीना काजे मेव्यू ती तीनाक अन्ताकियामा लीन आव्यु, ती ओसो होयो कि एक साल तोक मंडवीन साते संगती एने लोकेत माणसो काजे प्रचार कोरता रोया एने चेला आखान पेहेले अंताखीयामा पेहेला मसिही कोवाया.

²⁷ तीनु दाहळामा काहनास भविष्य कोरता यरुशलेममा गोथा अन्ताकियामा आव्या.

²⁸ तीनुमा गोथा अगबुस नावोन एक माणूस उबरोयीन पवित्र आत्मान भोरायीन कोयू कि छाचलीन आखा जोगोमा जुदु काव पोळसे एने क्लौदियुसन राजमा ओसोत होयो.

²⁹ चेला पक्कू विचार कोऱ्या कि आखा आपना-आपना लायकीन अनसारे यहुदियामा रोयने वावा भाशोन सेवान कोरता मुकले.

³⁰ चो ओसोत कोऱ्या एने बरनाबास एने शाउलोन हाते पुढारीनचा लीन मुकली देदा.