प्रेषित 10 - बारेली पावरी

कुरनेलियुसोन दर्शन

¹ कैसरीयामा कुरनेलियुस नावोन एक माणूस होतु जू इटलीयन नावोन पलटनोन सुभेदार होतु.

² चू भक्त होतु, एने आपना आखा घोरल्या पुठी परमेश्वरोक बिह्तु होतु, एने यहुदि माणसो काजे घोनो दान आपतू होतु, एने बारबार परमेश्वरोन प्रार्थना कोरतू होतु.

³ चू दाहळान तीसरे पेहरोन साते दर्शन मा चुखो देख्यू कि परमेश्वरोन एक सोरग दूत तिंदरे साते माहाय आवीन कोयु, “हे कुरनेलियुस.”

⁴ चू तीनाक ध्यानसी देख्यू एने बिहीन कोयू, “हे प्रभू काय छे?” चू तीनाक कोयू “तारी प्रार्थना एने तारू दान फोम कोरीन परमेश्वरोन ओगोव पुगलो छे.”

⁵ एने हिमी यापामा माणूस मुकलीन शिमोन काजे, जू पतरस कोवायतलु तीनाक बुलावीन लाव.

⁶ चू शिमोन, चामळान धंदू कोरने वावानचा पाहांतऱ्यू जेरो घोर दोरीयान काठे छे,

⁷ जेतार चू सोरग दूत जू तीना पुठी वात कोरतू होतु जात रोयू, ती चू दुय सेवक, एने तिंदरेनचा रोयता होता तिंदरे माहीन एक भक्त सिपायळा काजे बुलाव्यू.

⁸ एने तीनुक आखा वाते कोयीन यापामा मुकली देदु.

पतरसोन दर्शन

⁹ दिसरे दाहळे जेतार चे चालता-चालता गाव साते पुग गोया ती दिसून टेमे पतरस छोत पोर प्रार्थना कोरणे चोळ्यु.

¹⁰ तीनाक भूक लागी एने काहीन खाणे लागतो होतो, बाकीन जेतार चे तीयारी कोरता होता ती चू बेशुद्ध होय गोयू;.

¹¹ एने चू देख्यू, कि सोरग उगळी गोयो; एने एक ठाहरु मोटला चादरान सारखो चारा खुनासी लोटकी रोयो, धोरती भूनी उतरणे बाज रोयो.

¹² जीनामा धोरती पोरला आखा भातीन चार पाया एने घीसळायने वावा जंतू एने सोरग मायला चिल्ला होता.

¹³ “तीनाक ओवी ओसू बुल सोमवाय देदु हे पतरस उठ मार एने खा.”

¹⁴ बाकीन पतरस कोयू, “नि प्रभू कोबी नि; काहाकि मे कोबी काहणी अपवित्र एने भुंडली चीज नी खादु.”

¹⁵ एने दिसरे कावा तीनाक एक बुल सोमवायु, “जो काहीन परमेश्वर चुखो ठेरावलु छे तीनाक तू विटावा काहा कोये.”

¹⁶ तीन कावा ओसोच होयो; ती तेतारुत चो चादरो सोरगोमा उपोर लेवाय गोयू.

कुरनेलियुसोन घोर पतरस

¹⁷ जेतार पतरस तेरा मोनोन शोंकामा होतु, कि यो दर्शन मी देख्यू चो काय होय सोकलो, ती देख्यू चू माणूस तीनाक कुरनेलियुस मुकेल्लू होतु शिमोनोन घोरोन पोतू लागाळीन झोपलेत आवीन उभू रोय गोयू.

¹⁸ पुछने बाज गोयू, “काय शिमोन यु पतरस कोवायतलु या आव रोयू?”

¹⁹ पतरस ते तिना दर्शन पोरसी विचारमा होतु कि आत्मा तीनाक काय कोयू, “देख तीन माणसे तुसेक हेरने बाज रोया.

²⁰ हिमी उठीन नेचू जा, एने शंका नि कोरता तिंदरे पुठी जा; काहाकि मेट तीनु काजे मूकललु छे.”

²¹ तेत्यार पतरस उठीन तीनु माणसो काजे कोयू “देखू जीनाक तुमु हेरने बाज रोया, चू मेत छे तुमरो आवनेन काय मतलब छे?”

²² चे कोया कुरनेलियुस सुभेदार जू धोरमी एने परमेश्वरोक बिहीने वावू एने आखा यहुदि जातीमा धोरमी माणूस छे, चू एक चुखला सोरग दूतो सी यो दर्शन देखलू कि तुसेक आपने घोर बुलावीन तारा मुयसी वचन सोमवे.

²³ तेत्यार चे तीनाक माहाय बुलावीन तीनाक पाहांतऱ्या कोऱ्या दिसरे दाहळे चू तिंदरे पुठी गोयू, एने यापान भाशोमा गोथा थुलाक तेरे साते जात रोया.

²⁴ एने दिसरे दाहळे चे कैसरीयामा पुग्या एने कुरनेलियुस तेरा परिवार, एने मोंगावा दुस्तीदार काजे एखठा कोरीन तेरी वाट जू रोया होता.

²⁵ तेत्यार पतरस माहाय आवने बाज रोयू होतु, ती कुरनेलियुस तीनाक मेवाळ्यु एने तेरा पायो पोर पोळीन तीनाक नोमोन कोऱ्यु;

²⁶ बाकीन पतरस तीनाक उठाळीन कोयू, “उबरोय मे बी माणूस छे,”

²⁷ एने तेरे पुठी वात कोरतू माहाय गोयू, एने लोकेत माणसे एखठा होय रोयला देखीन,

²⁸ तीनु काजे कोयू, “तुमुक मालूम छे कि दिसरा जाती साते दुस्ती कोरनो एने तिंदरेनचा जाणो यहुदिन कोरता रिती रिवाज खिलाप छे बाकीन परमेश्वर मेसेक देखाळ्यू छे कि कुदु माणसो काजे भुंडलो मा कोयू.

²⁹ इनान कोरता मेसेक जेतार बुलावला ती बिना काहीन कोयासी मे आव लागलु हिमी मे पुछतलु कि मेसेक काहना कोरता बुलाव्यू?”

³⁰ कुरनेलियुस कोयू, “इनी टेमे पुरा चार दाहळा होय गोया, मी आपना घोरोमा तिसरे प्रहर प्रार्थना कोरतू होतु; ती देख्यू एक चमक्या छिंदरा पेहेरीन मार सामने आवीन उभू रोय गोयू.”

³¹ एने कोयने बाज गोयू, “हे कुरनेलियुस, तारी प्रार्थना सोमवाय गोयली छे एने तारो दान परमेश्वरोन सामने फोम कोराय गोयलो छे.”

³² इनान कोरता कुदा काजे यापा मुकलीन शिमोन काजे “जू पतरस कोवायतलु बुलाव लाव चू दोरीयान धोळे शिमोन चामळान धंदू कोरने वावान घोरमा पाहांतऱ्यू छे.”

³³ तेत्यार मे मामार तारेनचा माणसे मूकल्यु एने तू भोलो कोऱ्यु आव लाग्यू हिमी आपु आखा या परमेश्वरोन सामने छे, काहाकि जो काहीन परमेश्वर तुसेक कोयलु तीनाक सोमवे.

कुरनेलियुसोन घोर पतरसोन प्रचार

³⁴ तेत्यार पतरस कोयू, “हिमी मेसेक पक्को मालूम होयो कि छाचलीन परमेश्वर कुदान भेदभाव नि कोरे.”

³⁵ बाकीन हर जातीन जू तीनाक बिहतेलु एने धर्मान कामे कोरतेलू चू तीनाक गोवतेलु.

³⁶ जो वचन चू इस्राईलोन चा मूकल्यु, जेतार चू येसु मसिहन लारे (यो आखो काहीन प्रभू छे) शांतीन वारली खोबर सोमवाळ्यु.

³⁷ चो वचन तुमुक मालूम छे जो योहानोन बाप्तिस्मा प्रचारोन ओवते गलीलमा गोथा सुरवात कोरीन आखा यहुदिमा फेल गोयो.

³⁸ परमेश्वर काहना रितीसी येसु नासरी काजे पवित्र आत्मा एने ताकतसी अभिषेक कोऱ्यु चू भोलाई कोरतू एने आखा काजे भुतडान छुळावला होता, वारलो कोरतू फिरू काहाकि परमेश्वर तेरे साते होतु.

³⁹ आमु आखा कामोन गोवा छे; जे चे यहुदियान देस एने यरुशलेम बी कोऱ्यु एने चे तीनाक खांबा पोर टांगीन मार नाख्या.

⁴⁰ तीनुक परमेश्वर तिसरे दाहळे जीवाळलु एने देखाळ बी देदलु छे;

⁴¹ आखा माणसो पोर नि बाकीन इना गोवापोर जीनुक परमेश्वर पेहेलेसी नेवाळ लेदलु छे कि यु चू छे जीनाक परमेश्वर जीवतान एने मोरलामा गोथू जीव उठनेन ओवतेन तेरे-पुठी खादा पिदा.

⁴² एने चू आमुक आग्या आप्यू कि माणसोमा प्रचार कोरु एने गोवायी आपु कि जू चू छे जीनाक परमेश्वर जीवतलान एने मोरलान न्याय कोरणे ठेरावलु छे.

⁴³ तेरी आखा भविष्य कोरता गोवायी आपतला कि यु कुदु इनापोर भुरसू कोरसे तीनुक चू तेरा नावोन लारे पापोन माफी जोळसे.

दिसरा यहुदिया पर चुखली आत्मान आवनो

⁴⁴ पतरस ये वाते कोयनेत बाज रोयू होतु कि पवित्र आत्मा वचनोक सोमवने वावा आखापोर उतरी आव्यु.

⁴⁵ एने जोतरा सुंता कोरला विस्वासी पतरस पुठी आवला होता, चे आखा वाहराय गोया कि दिसरा जातीन माणसो पोर भी पवित्र आत्मान दान रेचवायलो छे.

⁴⁶ काहाकि चे तीनुक भाती-भातीन भाषा बुलतला एने परमेश्वरोन बोढाई सोमवला इनापोरसी पतरस कोयू.

⁴⁷ “काय कुदु पाणी काजे रुक सोकतलु कि यो बाप्तिस्मा नि लेये, जे आमरे सारका पवित्र आत्मा ली रोया.”

⁴⁸ एने चू आग्या आप्यू कि येसु मसिहन नावोमा बाप्तिस्मा आपाये तेत्यार चे तीनाक विनता कोऱ्या कि चू थुलाक दाहळा ओवी तिंदरे साते रोये.