प्रेषित 1 - बारेली पावरी

परिचय

¹ हे थियुफिलुस, मे पेहेली यी किताब तिनी आखी वातोन बारामा लिख्यू जो येसु पेहेले गोथू कोरतू एने सिकाळतू होतु.

² तिने दाहळे तोक जेतार चू तीनु सेवक काजे जीनुक चू नेवाळलु होतु पवित्र आत्मान लारे आग्या

³ आपीन उपोर नि चूटायु गोयू. येसुन दुख हाकलनेन ओवतेन घोणा सोवटा पक्का सोबूत आपना खूदो काजे जीवतलु देखाळ्यू, एने चावीस दाहळा तोक येसु तीनु काजे देखा पोळ्यु, एने परमेश्वरोन राजोन वाते कोयतू रोयू.

चुखली आत्मान वायदू

⁴ एने मेवीन तीनु काजे आग्या आप्यू, “यरुशलेम काजे छुळता झुनी, बाकीन बासोन वायदाक पुरी होयनेन वाट देखता रोयू, जेरी वाते तुमु मारेंचा गोथा सोमवला छे.”

⁵ काहाकि योहान ते पाणीमा बाप्तिस्मा आप्यू बाकीन थुलाक दाहळान बादमा तुमु पवित्र आत्मासी बाप्तिस्मा लेसू.

⁶ आखरी चे एखठा होयीन तीना काजे पुछ्या, “हे प्रभू काय तू इना टेमे इस्राईल काजे राज पोछो आपीस?”

⁷ चू तीना काजे कोयू, “तिनी टेमोक एने काव काजे जाननेन, जीनाक बास आपना होकमा मेकलु छे, तुमरो काम नी होय.”

⁸ बाकीन जेतार पवित्र आत्मा तुमरे पोर आवसे तेत्यार तुमुक ताकत जोळसे; एने यरुशलेम एने आखा यहुदियामा, एने सामरिया, एने धोरतीन जोगोन धोळे तोक मारा गोवा बोनसू.

येसुन सोरगोमा जाणो

⁹ यो कोयीन चू तिंदरे देखते-देखते उपोर चूटायु गोयू एने वादवो तीनाक तिंदरे नोजोरमा गोथू डुकाळ लेदू.

¹⁰ तेरे जाणेन टेमे चे सोरगोमा देखता रोया, ती देखू, दुय माणसे धोव्वा छिंदरा पेहेरलु साते आवीन उबरोय गोया.

¹¹ एने तीनु काजे कोया, “हे गलीली माणसो तुमु काहा उबरोयीन सोरगोमा देखता रोया? युत येसु तुमरेनचा गोथू सोरगोम चूटायु गोयलु छे जोसा तुमु तीना काजे सोरगोमा जातलू देख्या, तोसुच चू पोछु आवसे.”

एखठा होयीन प्रार्थना

¹² तेत्यार चे जेतुन नावोन बोयळाम गोथा यरुशलेमोन साते एक शब्बाथोन दाहळू थुलोक नांबे छे, यरुशलेममा गोया.

¹³ जेतार चे चा पुग्या ती चे एक घोरोन तावापोर गोया, जा पतरस एने योहान, एने याकुब, एने शिमोन, एने अन्द्रियास, एने फिलीप एने थोमा, बरतुल्मै, एने मत्ती, एने हलफईन पुऱ्यु याकुब, एने शिमोन जीलोद एने याकुबोन पुऱ्यु यहुदा रोयता होता.

¹⁴ ये आखा, घोणा सोवटा बायरा, एने येसुन आया मरीया, एने तेरा भाशो साते एक मोन लागाळीन प्रार्थना कोरता होता.

नवला अगवाक नेवाळनो

¹⁵ तीनु दाहळान पतरस भाशोन इचमा जे एकसोव वीस माणसोन लगभग होता, उभा रोयीण कोयने बाज गोयू,

¹⁶ “हे भाशो, जोरुरी होतो कि पवित्र शास्त्रन चू लेख पुरू होये जो पवित्र आत्मा दाऊदन मुखोसी यहुदान बारामा, यो येसुन धोरावनेन अगोववान्यू होतु, पेहेले गोथो कोयलो होतो.

¹⁷ काहाकि चू आमरेमा गीनाय गोयू, एने इनी सेवकाईमा भागीदारी होयू.”

¹⁸ (चू अधोरमोन कोमायीमा गोथू एक खेत मुले लेदू, एने मुनकान भुरसे पोळ्यु एने तेरो पेट फाट गोयो एने तेरा आखा आतळा निकवी पोळ्या.

¹⁹ इनी वातो काजे यरुशलेममा रोयने वावा जान गोया, न्या तोकून कि तीना खेतोन नाव तिंदरी भाषामा “हकलदमा” मतलब “लुयोन खेत पोड गोयो).”

²⁰ भजन संहितान किताबमा लिखलो छे, तेरो घोर उजळी जाय, एने तीनामा कुदू नि वोसे, एने तेरो पोद कुदु दिसरू ली लेये.

²¹ इनान कोरता जोतरा दाहळा तोक प्रभू येसु आमरे साते आवतू जातू रोयू मतलब योहानोन बाप्तिस्मानचा गोथो लीन आमरेनचा गोथू चूटायतेलोग जे माणसे आमरे साते रोयला छे,

²² वारू छे कि तिंदरेमा गोथू एक माणूस बाप्तिस्मा आपने वावु योहान आमरे साते तेरे जीव उठनेन गोवा होय जाय.

²³ तेत्यार चे दुय जोना काजे उभा कोऱ्या, एक युसूफ काजे जू बरसभा कोवायतलु छे, जेरु आडनाव युसतुस छे, दिसरू मतीयाह काजे,

²⁴ एने जी प्रार्थना कोऱ्या, “हे प्रभू, तू जे आखान मोन जानतलु छे, यो देखाळ कि इनू दुय जोनामा तू कुनी काजे नेवाळलु छे,

²⁵ कि चू सेवा काजे एने प्रेषितोन जागू ली लेये, जिना काजे यहुदा छुळीन आपने जागे जात रोयू.”

²⁶ तेत्यार चे तिंदरे बारामा चीठ्या नाख्या, एने मतीयाह नावोन निकवी आखरी चू तीनु ग्यारा प्रेषितोन साते गीनाय गोयू.