2 तीमथी 4 - बारेली पावरी

वचनोन प्रचार कर

¹ परमेश्वर एने मसिह येसु काजे गोवायी मानीन जो जीवतलो एने मोरलान वियाव कोरसे, एने हिंदरो प्रकट होयने एने राज्यान सुधी आपीन मी तुसेक आदेश आपो.

² कि तू वचनोन प्रचार कोर, टेम एने बिना टेम पोर तीयार रोयजी, आखा भातीन सहनसिलता एने शिक्षा पुठी सिकाळ एने लोळ एने सोमजाड.

³ काहाकि ओसो टेम आवसे जेतार माणसे खोरलु प्रचार नि सहन कोर सोके, पुन कानटामा खुजलीन वोजेह आपनी लालचन कोरता आपनेन कोरता लोकेत प्रचारक हेरे लेसे.

⁴ एने आपना काटा खोरलान चा गोथा वेला कोरीन कहानी पोर लागाळ लेसे.

⁵ पुन तू आखा वातोमा सावधान रोयजी दुख भूगतजी बानमी प्रचारन काम कोरजी एने आपनी सेवा काजे पुरी कोरजी.

⁶ काहाकि मे बलिदान सारखु रेचोवोने जानतलु छे, एने मारे जानेन टेम आव लागली छे.

⁷ मे वारली कुस्ती लोळ लेदलु छे, मे मारी लोळाय पुरी कोर लेदलु छे भुरसान मुवावी कोरलु छे.

⁸ भविष्यमा मारेन कोरता धोरमोन होयो मुकुट मेक मेक्यो छे, जीनाक प्रभू जू धोरमी न्यायी छे मेसेक तीने दाहळे आपसे, एने मेसे ओतरु नि एने हीन आखा काजे बी हिंदरा प्रकट होयनेन काजे मोंगावू मानताला छे.

निजी प्रचार

⁹ मारेंचा छाटू आवनेन प्रयत्न कर,

¹⁰ काहाकि कि देमास इना संसार काजे मोंगावू जानीन मेसे काजे छुळ देदलु छे एने थेस्सलुनीकामा जात रोयलु छे. क्रेसकेस गलातियानचा एने तीतुस दलमतीया काजे जात रोयलू छे.

¹¹ निसतू लुका मार पुठी छे. मरकुस काजे लीन आव लाग; काहाकि सेवान कोरता होयू मारे रेट कामोन छे.

¹² तुखीकुस काजे मे इफिसुस काजे मुकललु होतु.

¹³ जू झोगु त्रोआसमा करपूसन होया छुळीन आवलु छे, जेतार तू आवे ती हिनाक एने किताब खास कोरीन चामळान चिट्ठी काजे लीन आवजी.

¹⁴ सिकनदर थोठरु मारा पुठी जुदु बुराई कोरलु छे; प्रभू हिनाक हेरा कामोन अनसारे बदल देसे.

¹⁵ तू हीना गोथो सावध रोयजी काहाकि होयू आमरी वातोन बी जुदा खिलाप कोरतेलू छे.

¹⁶ मारे पेहेले जोखळी होये कुदू मी मारी साथ नि देदा, एने आखा मेसेक छुळ देदला, वारला होतु कि इनान हीना काजे लिखीन नि आपनो पोळ्यो.

¹⁷ पुन प्रभू मारे साते रोयलु एने मेसेक ताकत आपलु काहाकि मेसेक पुरान पुरा प्रचार होये एने सोब जातोन सोमवी लेये मी सिहान मुयोम गोथू छुळावलु होतु.

¹⁸ एने प्रभू मेसेक हर एक भुंडला काम से वाचाडसे एने हेरा सोरगोन राजमा ठीक-ठाक पुगाळने हेरी महिमा पिढ्यान पिढ्या होती रोये. आमेन.

आखरी सुभेच्छा

¹⁹ प्रीस्कील्ला एने अक्कविल्ला एने उनेसिफुरूसन घोराना काजे नमस्कार.

²⁰ इरास्तुस कुरिन्थुस मा रोय गोयू एने त्रुफीमूस काजे मे मिलेतूसमां मांदलु छुळलु छे.

²¹ सिवायन पेहेले आवनेन कोरजी, युबुलूस एने पुदेस एने लीनुस एने कलौदिया एने सब भाशोन तुसेक नमस्कार.

²² प्रभू तरी आत्मान पुठी रोये तार पोर दया होयतू रोये.