2 थिस्सलुनीकियो 3 - बारेली पावरी

प्रार्थनान विनता कोरनो

¹ आखरीमा, हे भाशो, आमरेन कोरता प्रार्थना कोऱ्या कोरु कि प्रभून वचन ओसो मामार फेले एने महिमा लेये जोसो तुमरेमा होयो.

² एने आमुक हेट्या एने भुंडला माणसोसी वाचाडीन राख, काहाकि होर एक मा भुरसू नि होय.

³ बाकीन प्रभू खोरलू छे; चू तुमु काजे पाका रितीसी वातळू कोरतेलू एने तीना पापोसी वाचाडीन राखतलु.

⁴ आमुक प्रभूमा तुमरे पोर भुरसू से कि जी-जी आग्या आमु तुमुक आपला छे, तुमु तीनुक मानतला छे, एने मानता भी रोयू.

⁵ परमेश्वरोन मोंग एने मसिहन धीर एने प्रभू तुमरे मोनमा ओगवाई कोरे.

उजग्यान खिलापमा चेतावनी

⁶ हे भाशो, आमु तुमुक आपना प्रभू येसु मसिह नावोसी आग्या आपजे कि तुमु हर एक ओसला भाशोसी ओलोग रोयू जू भुंडली चाल चालतलु एने जी शिक्षा चू आमरे जुव गोथो भोन्यु तेरे अनसारे नि कोरतेलू.

⁷ काहाकि तुमु खुद जानतला छे कि कहानला रितीसी आमरेन तोसी चाल चालनो जुवे, काहाकि आमु तुमरे इचमा योग्य चाल नि चालजे.

⁸ एने कुदान रुटू फुकोटोन नि खादा, बाकीन काम एने मेहनतसी रात दाहळू काम धोंदा कोरता होता कि तुमु काजे कुदासी भार नि होये.

⁹ यो नि कि आमुक होक नि होय, बाकीन इनान कोरता कि आमु खुदो काजे तुमरेन कोरता आदर्श ठोरायजे कि तुमु आमरेन तोसी चाल चाले.

¹⁰ काहाकि जेतार आमु तुमरेनचा होता तेत्यार जी आग्या आपता होता कि ओगर कुदू काम नी कोरणे हिंडे ती खाणो बी नि जुळे.

¹¹ आमु सोमवतला छे कि कहानला माणसे तुमरे इचमा नि तोसली चाल चालतला छे, एने काहीन काम नि कोरतेला बाकीन दिसरान कामोमा हात नाख्या कोरतेला.

¹² ओसला काजे आमु प्रभू येसु मसिहमा आग्या आपतला छे एने सोमजाळतला छे चुपचाप काम कोरीन तेरुत रुटू खाया कोरे.

¹³ तुमु हे भाशो भोलाई कोरनेमा हिंमत मा छुळू.

¹⁴ कोदि कुदू आमरा इना चिट्ठीन वातो काजे नि माने ती तिना पोर नोजोर राखू, काहाकि तिंदरी संगती मा कोरु जीनासी चू लाजवाय जाय.

¹⁵ तीबी तीनाक दुष्मोन मा सोमजू बाकीन भाश जानीन जोताळू.

आखरी सुभेच्छा

¹⁶ हिमी प्रभू जू शांतीन झोरू छे खुद ते तुमुक कायम एने होर एक भातीन शांती आपे. प्रभू तुमरे आखा साते रोये.

¹⁷ मी पौलुस आपने हाते कोरीन नमस्कार लिखलू छे, हर चिट्ठीमा मारी जीत निशाणी छे मे इना रितीसी लिखलू छे.

¹⁸ आमरा प्रभून येसु मसिहन दया आमरा आखापोर होयती रोये.