2 थिस्सलुनीकियो 2 - बारेली पावरी

पापोन पुरू मतलब नाशोन पुऱ्यु

¹ हे भाशो, हिमी आपनु आपना प्रभू येसु मसिहन आवनेन एने तिंदरे साते आमरा एखठा होयनेन बारामा तुमु काजे विनता कोरतेला छे.

² कि कहानला आत्मा, नीती वचन, नीती चिट्ठीन लारे, जो कि मानु आमरी तोरोफसी छे, जो सोमजू कि प्रभून टेम आव लागली छे, तुमरो मोन उचकालुन एक जागे नि होये एने तुमु बिहू मा.

³ काहना रितीसी, कुदान धोकामा नि आवनो काहाकि चू दाहळू नि आवे जा तोक धोरमोन त्याग नि होये, एने चू अधोरमी माणूस मतलब नाशोन पुऱ्यु प्रगट नि होये.

⁴ जे विरोध कोरतेला छे, एने होर एक साते जे परमेश्वरोन आराधना कोवायतेलो छे, खुदो काजे मोटलु ठेरावतलु छे, न्या तोक कि चू परमेश्वरोन मंदीरमा बोसीन खुदो काजे परमेश्वर ठेरावतलु छे.

⁵ काय तुमुक मालूम नि कि जेतार मी तुमरे न्या होता, ती तुमरेसी ये वाते कोया कोरतु होतु.

⁶ तुमु तीना चीजो काजे जानतला छे, जो तीनुक हिमी रुक रोयो कि चू तेरे टेमोमा प्रगट होये.

⁷ काहाकि अधोरमोन भेद हिमी बी काम कोरे, बाकीन हिमी बी रुकने वावु छे, एने जेतार तोक चू नांबे नि होय जाय चू रुक रोयसे.

⁸ तेत्यार चू अधोरमी प्रगट होयसे, जीनाक प्रभू येसु तेरा मुयोसी फुकिन मार नाखसे, एने तेरा आवनेन तेजोसी भस्म कोरसे.

⁹ तिना अधोरमीन आवनो भुतडान कामोन अनसारे आखा रितीसी झुटी ताकत एने निशाणी एने नेवलायन कामो साते,

¹⁰ एने नाश होयने वावान कोरता अधोरमोन आखा रितीन धोका साते होयसे; काहाकि चू खोरला पुठी मोंग नि कोऱ्यु जिनासी तेरु छुटकारू होयतलु.

¹¹ इना रितीसी परमेश्वर तेरेमा एक खुवाय जाने वावी आत्मा काजे मुकलसे कि जे झुटान भुरसू कोरे,

¹² काहाकि जोतरा माणसे खोरलान तोसो नि कोरतेला, बाकीन अधोरमीसी खुश होयतला छे, चे आखा दोंड भोरसे.

वातळा बनला रोयू

¹³ हे भाशो, एने प्रभून मोंगावा माणसो, जुवे कि आमु तुमरा बारामा सदा परमेश्वरोन धन्यवाद कोरता रोयजे, काहाकि परमेश्वर पेहेले गोथू तुमु काजे नेवाळ लेदलु छे कि आत्मान लारे चुखला बोनीन, एने खोरलान तोसोत भुरसू कोरीन छुटकारू जोळे.

¹⁴ जिनान कोरता चू तुमुक आमरा वारली खोबरोन लारे बुलाव्यू, कि तुमु आमरू प्रभू येसु मसिहन महिमा काजे ली लेये.

¹⁵ इनान कोरता हे भाशो, वातळा रोयू एने; जे-जे वाते तुमुक जुवे वचन नीती चिट्ठीन लारे आमरे जुव भोनला छे, तीनुक धोरला रखु.

¹⁶ आमरू प्रभू येसु मसिह आपसुत, एने आमरू बास परमेश्वर जू आमरेपोर मोंग कोऱ्यु एने ओमोरकाई शांती एने वारली आस आपलु छे.

¹⁷ तुमरा मोनोमा शांती आपे एने, तुमु होर एक वारला कामे एने वचनमा वातळा रोये.