2 थिस्सलुनीकियो 1 - बारेली पावरीसुभेच्छा 1 पौलुस एने सिलवानुस एने तीमथीन तोरोफसी थेस्सलुनीकि देस वावान मंडवीन नावे, जू आमेरू बास परमेश्वर एने प्रभू येसु मसिहमा छे. 2 आमरू बास परमेश्वर एने प्रभू येसुन मसिह तोरोफसी तुमुक दया एने शांती जोळती रोये. नियावोन दाहळू 3 हे भाशो, तुमरा बारामा आमु काजे होर टेमे परमेश्वरोन धन्यवाद कोरनो जुवे, एने यो सही बी से इनान कोरता कि तुमरू भुरसू जादा बोडतो जातलू, एने तुमरे आखान मोंग एक दिसरामा जादा बोळतू जातलु. 4 या तोक कि आमु खुद परमेश्वरोन मंडवीमा तुमरा बारामा घोमंड कोरतेला कि जेतार संकट एने तोकलीत तुमु सोहोन कोरतेला इनू आखामा तुमरू धीर एने भुरसू देखायतलु छे. 5 यो परमेश्वरोन खोरला नियावन सबूत छे कि तुमु परमेश्वरोन राजोन कोरता खोरला ठोरु जिनान कोरता तुमु दुख बी उठावतला. 6 काहाकि परमेश्वरोन साते यु नियाव छे कि जे तुमुक तोकलीत आपतला, तीनुक बोदलामा तोकलीत आपे. 7 एने तुमु जे तोकलीत झेलतला, आमरे पुठी आराम आपे; तिने टेमे जेतार कि प्रभू येसु आपना ताकत वावा दूतो साते हुळू-हुळू धापतला आगठामा सोरगोमा गोथू प्रकट होयसे, 8 एने जे परमेश्वरोक नि उवेखतला एने आमरा प्रभू येसुन वारली खोबर नि मानतला तिंदरो हिसाब लेसे. 9 चे प्रभून अगोव गोथा एने तेरी ताकतोन तेरा जोस सी नांबे होईन ओमोरकाईन विनाशोन दोंड जोळसे. 10 यो तिने दाहळे होयसे, तेत्यार चू तेरा चुखला माणसोमा महिमा देखणे एने आखा भुरसू कोरणे वावामा नोवलायन वजेसी होयने कोरीन आवसे; काहाकि तुमु आमरी गोवायी पोर भुरसू कोऱ्या. 11 इनान कोरता आमु हमेशा तुमरेन कोरता प्रार्थना बी कोरतेला कि आमरू परमेश्वर तुमुक इना बुलावलान लायक सोमजे एने भोलाईन होर एकन मोर्जी एने भुरसान हर एक कामो काजे ताकत पुठी पुरा कोरे. 12 काहाकि आमरू परमेश्वर एने प्रभू येसुन मसिहन दयान अनसारे आमरा प्रभू येसुन नाव तुमरेमा महिमा आपे एने तुमु तीनामा. |
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation