2 पतरस 2 - बारेली पावरी

नाश कोरणे वावु सिद्धांत

¹ इना रितीसी तीना माणसोन झुटा भविष्य कोरणे वावा होता, तिना रितीसी तुमरेमा बी झुटा प्रचारक होयसे, जो नाश कोरणे वावा भुंडला विचारन मोनोन कोरसे एने तिना महाराजोन जे तीनु काजे मुले लेदलु छे इनकार कोरसे, एने आपना आपु काजे तेत्यारुत नास मा नाख देसे.

² जुदा सोवटा तिंदरे ओगोव लुचळाय कोरसे, जिनान कोरता खोरला वाटोन बुराई कोरली जासे.

³ चे लुबोन कोरता वाते गाळीन तुमु काजे आपना लाभोन कोरता बोनावसे, एने तिंदरा पोर पेहेलेसी होय रोई तेरे आवनेसी काहीन टेम नि होय, एने तिंदरा नाश सुवतलु नि.

झुटा मास्तऱ्यान नियाव

⁴ काहाकि जेतार परमेश्वर तिना सोरग दूत काजे जे पाप कोरला नि होय छुळयु, बाकीन नोरोकोमा आंदारला कुंडामा नाख देदु, काहाकि नियावन दाहळे तोक बांदायला रोयसे.

⁵ एने जूनला वारान जोगो काजे बी नी छुळ्या, नि तेत्यार भक्तीहीन जोगो पोर मोटला जलप्रलय मूकल्यु, बाकीन धर्मान प्रचार कोरणे वावू नुहा साते आठ जोनाक वाचाड लेदू;.

⁶ एने सदोम एने गोमोरान नोगोर काजे नाशोन ओसू दोंड आप्या कि तीनुक नाश कोरीन रुखडामा मेवाड देदु काहाकि चे आवने वावान भोक्ती कोरणे वावा माणसोन शिक्षान कोरता एक दाखलू बोनसे.

⁷ एने धोरमी लुत काजे जो अधोरमीन भुंडला चाल चलन सी घोणा दुखी होता, छुटकारू आप्यू,

⁸ (काहाकि चू धोरमी तिंदरे इचमा रोयतू जाईन अधोरमीन कामे देखीन एने दाहळीन जोसू देखे एने सोमवाळे, एने आपना खोरला मोन काजे दुखीत कोरतू होतु.)

⁹ तीबी भक्त काजे पारोखमा गोथू वाचाड लेणे एने अधोरमी काजे नियावोन दाहळे तोक दोंडोन हालोतमा राखणे बी जानतलु छे.

¹⁰ विशेष कोरीन तीनु काजे यो खिलाप लालचोन पोछोव, डीलोन लारे चालतला एने ओसोर काजे विटोव मानतला चे ठीक एने हट्टी छे एने उचला पोदो वावा काजे भुंडला कोयनासी नि बिहीतेला.

¹¹ ते बी सोरग दूत बी जी शक्ती एने ताकत मा तिंदरेसी मोटला छे प्रभू ओगोव तीनुक बुराई कोरीन गुणू नी लागाळतला.

झुटा मास्तऱ्यान भ्रष्टता

¹² बाकीन जे माणसे बिना दिमाकोन जोनावर सारखा छे, जे धोराय जाणे एने नाश होयनेन कोरता पोयदा होयला छे; एने जिना वातो काजे उवेखतला नि तिंदरा बारामा दिसरा काजे वारलो भुंडलो कोयतेला छे चे आपनी सोळलामा खुद सोळ जासे.

¹³ दिसरान भुंडो कोरनेन बोदले तिंदरोत भुंडलो होयसे. तीनुक दाहळा भोरमा भोग विलास कोरनो वारलो लागतलो छे, यो गुणावा एने गुणू छे; जेतार चे तुमरे पुठी खातला पितला छे, ती आपने जुव गोथो मोंगोन भोजन कोरीन भोग विलास कोरतेला.

¹⁴ तिंदरा डूवामा वैश्या मा बसला छे, एने चे पाप कोरे बिना रोय नि सोकतला, चे अस्थिर मोनवावा काजे फुसलावी लेतला छे; तिंदरा मोनो काजे लाभ कोरणेन पोढायी होय गोयलु छे; चे रीसोन वारीस छे.

¹⁵ चे सुदला वाट काजे छुळीन भटकी गोयला छे, एने बओरन पुऱ्यु बिलामोन वाटे पोर लाग गोयला छे, जे अधोरमी काजे मजबूरी काजे मोंगावा जानतला;.

¹⁶ पुन तिनाम गुणान बारामा सोमजाड देदला छे, न्या तोकून कि अबोल गोदळी माणसोन बुलीसी तीना भविष्य कोरणे वावा काजे तारा गांडापोन काजे रुकी.

¹⁷ जे माणसे सुकला कुवा, एने आंजीन उढावलो वादवो छे; तिंदरेन कोरता आखरी तोक आंदारो ठोराव देतला छे.

झुटा मास्तऱ्यान धोका

¹⁸ चे वायबार मोटायन वाते कोरीन लुचळान कामोन लारे, तिना माणसोन डीलोन भुंडली मोर्जी आपतला छे जे भोटकलामा गोथा हिमी निकवनेण बाजरोयला छे.

¹⁹ चे तीनु काजे छुटकारू कोरनेन वायदू कोरतेला छे, बाकीन आपुत सोळलान चेला छे; काहाकि जी एक जन जीनामा हार गोयला छे, चू तेरु दास बोन जातलु.

²⁰ जेतार चे प्रभू एने छुटकारू आपनेवावू येसु मसिहन उवोखन लारे जोगोन भाती भातीन विटोवायला सी वाचीन निकव्या, एने ओवी तीनामा कोरीन हार गोया ती तिंदरी पोछली हालत पेहेले गोथी बी भुंडी होय गोयली छे.

²¹ काहाकि धारमिकता वाट नि जाननो यित तिंदरेन कोरता इंदरेन गोथा वारलो होता कि तीनाक उखीन, तिनी चुखली आग्यासी फिर जाता जे इनुक आप देतला होता.

²² तिंदरे पोर जी कोहावत बोराबोर बोसतली, कि कुत्रा आपनी उखवला भूनी एने उंगवावली सुवरीन कीचळमा घोसडायनेन कोरता पोछि जात रोयतली.