2 पतरस 1 - बारेली पावरी

सुभेच्छा

¹ शिमोन पतरसोन जुव गोथो, जू येसु मसिहन पावोर एने प्रेषितोन छे, तीनु माणसोन नाव जे आमरू परमेश्वर एने छुटकारू आपने वावु येसु मसिहन धारमिकतान लारे आमरेन तोसो किमतीन भुरसू हासील कोर लेदू.

² परमेश्वरोन जू आमरा प्रभून येसुन उवखोन लारे दया एने शांती तुमरेमा जादा कोरीन बोडती जाय.

भुरसामा उन्नती

³ काहाकि तिंदरी परमेश्वरोन ताकत आखो यो जीवन एने भक्तीसी संबंध राखतेलु, आमुक तेरी ची उवखोन लारे आप देदू, जू आमुक आपनीच महिमा एने वारला गुणोन अनसारे बुलाव्यू.

⁴ जिंदरे लारे चू आमु काजे किमतीवान एने जुदी मोटी वायदू आप्यू, काहाकि तिंदरे लारे तुमु तिनी सोळनेमा गोथा छुळीन जो जोगोमा भुंडली लालूचसी होयतेली छे, परमेश्वरोन स्वभावोमा एखठा होय जावू.

⁵ इनान वजेसी तुमु आखा भातीन कोशिश कोरीन आपना भुरसा पोर वारला गुणे एने वारला गुणोपोर सोमज,

⁶ एने सोमज पोर संयम, एने संयम पोर धीर, एने धीरो पोर भोक्ती.

⁷ भोक्ती पोर भाईचारान मोंग एने भाईचारान मोंग पोर मोंग बढावता जावू.

⁸ काहाकि कोबी चे वाते तुमरेमा चालू कावोमा रोये एने बोढती रोये, ती तुमुक आमरे प्रभू येसु मसिहन उवखोमा रिकामा एने बिना फोवोन नि होयने देय.

⁹ काहाकि जेरेमा ये वाते नि होय, चू आंदवू छे एने धुंदवोस देखतलु, एने आपना पेहेला पापो काजे धुवीन चुखलो होयनेन कोरता विसरी गोयू.

¹⁰ एरेन कोरता हे भाशो, आपनुक बुलाय जाणे, एने नेवाळाय जानेन सिद्ध करणेन वारला रितीन कोशिश कोरता जावू, काहाकि कोबी ओसो कोरसु ती कोबी बी ठूकर नि खाये.

¹¹ नि तेत्यार इना रितीसी तुमु आमरा प्रभू एने छुटकारू आपने वावु येसु मसिहन ओमोर राजमा मोटला आदोर साते जासु.

पतरसोन आखरी टेम

¹² इनान कोरता कोदा माईन तुमु ये वाते जानतला छे, एने यो खोरलो वचन तुमु काजे जोळ रोयो तिंदरेमा बोनता रोयू, तीबी मी तुमु काजे इनी वातोन खोबर आपनेन कोरता हमेशा तियार रोईस.

¹³ मी यो आपनेन कोरता वारलो सोमोजतलु छे कि जेतार तोकून मे या डील छे, तेत्यार तोक तुमु काजे फोम देवाळी-देवाळीन जागतू रोयीस.

¹⁴ काहाकि यो जानतलु छे कि मारा रोयनेन जागान पाळ नाखनेन टेम मामार आपनेवावी छे, जोसू आमरे प्रभू येसु मसिहन मारे पोर प्रकट कोरलु छे.

¹⁵ इनान कोरता मी ओसो कोशिश करिस कि मारा ओगो जानेन बादमा तुमु इना आखी वातोमा हमेशा फोम कोर सोकसू.

मसिही महिमान दर्शन

¹⁶ काहाकि जेतार आमु तुमु काजे आपना प्रभू येसु मसिहन ताकत एने आगमोनोन खोबर आपलु होतु, ती चू हुशारीसी बोनावने गाळायला काहन्यान चाल नी चालनो होतो, नि तेत्यार आमु आपनूत तिनान मोटला कामो काजे देखला होता.

¹⁷ काहाकि जेतार चू परमेश्वर जून आदर एने महिमा जोडी एने प्रतापमय महिमासी जी आवाज आयु, “यु मारा मोंगावा पुऱ्यु छे, जेरेसी मी खुश छे.”

¹⁸ तेत्यार आमु तिंदरे साते चुखला बोयडा पोर होता एने सोरगोमा गोथी यु आवाज आवतेली सोमव्यू.

¹⁹ आमरे साते जो भविष्य कोरने वावान वचन छे, चू इनी घटनासी पको ठोहऱ्यो, तुमु यो वारलो कोरतेला जू या सोमजीन तिंदरे पोर ध्यान कोरतेला कि चू एक दिवू छे, जू आंदाराला जोगोमा तीने टेमे तोकून विजावो कोरतू रोयतलु जेतार तोकून कि पाय नि फाट जाय फाटे एने सोंदारेन चांदणी तुमरा डीलोम नि चोमके.

²⁰ बाकीन पेहेले यो जान लेयू कि पवित्र शास्त्रान कुदुबी भविष्यवाणी कोरीन आपना विचारोन पुरो नि होयतलो.

²¹ काहाकि खुद बी भविष्यवाणी माणसोन मोर्जी सि कुदुबी नी होये, बाकीन भक्त जोन पवित्र आत्मान लारे उबा रोयता जाईन परमेश्वरोनचा बुलता होता.