2 योहान 1 - बारेली पावरी

पुढाऱ्यान चा गोथा प्रेषितोन स्वागत

¹ मारा डायला जुव तेरे जुव गोथो नेवाळली बायर एने तेरा पुऱ्यान नाव, जिंदरे पोर मे खोरलो मोंग कोरतेलू छे, एने मे ओतरू नि बाकीन जे आखा बी मोंग कोरतेला जे खोरला काजे जानतला.

² चो खोरलो, जो आमरेमा वातडा राखतेलो छे एने हमेशा आमरे साते रोये.

³ परमेश्वर बास, एने बसोन पुऱ्यु येसु मसिहन जुव गोथू दया एने शांती, खोरलो एने मोंग पुठी आमरे साते रोयसे.

मसिहीन आग्यामा चालनो

⁴ मे जूदु खुशी होयू कि मे तारा कानलात पुऱ्या काजे तीना आग्यान लारे, जो आमुक बासो जुव गोथी जोळली छे, खोरला पोर चालतला जोळ्या.

⁵ हिमी, हे बायर, मे तुसेक कहानली नोवली आग्या नि बाकीन चीत पेहेले गोथीत आमरे जुव छे, लिख रोयू; एने तारे जुव विनता कोरो कि आपनु एक दिसरा पोर मोंग राखू.

⁶ एने मोंग यो छे कि आमु तेरा आग्यान लारे चालू; जी चीच आग्या छे कि तुमु पेहेले गोथा सोमवी रोया, एने तुमु इनापोर चालनो बी जुवे.

मसिही दुष्मोनसी सावधान

⁷ काहाकि कहानला ओसा भनकावने वावा जोगोमा निकावी रोया, जे यो नि मानतला कि येसु मसिह डीलोमा होईन आयु; भनकावने वावु एने येसु मसिहक रुकने वावा जेच छे.

⁸ आपना बारामा हुशारीमा रोयू, कि जो मेहनत आमु कोरतेला छे तिनाक तुमु वायबार मा जावाळू पुन तेरो पुरो इनाम लेवु.

⁹ जो कुदू मसिहन भोननेमा ओगोव बोळ जातला छे, एने तिंदरेमा नि रोयतला, तिंदरे जुव परमेश्वर नि होय; जू कुदू हिंदरी प्रचारमा पाका रोयतला, तिंदरेजू बास बी छे एने पुऱ्यु बी.

¹⁰ कोबी कुदू तुमरे जुव आवे एने जो भोनावे नि आपे, तिनाक घोरमा मा आवने देवू, नि ती नमस्कार कोरु.

¹¹ काहाकि जू कुदू ओसला जोना काजे नमस्कार कोरतेलू छे, चू आपना भुंडला कामोमा बी भेसकाय जातलु छे.

आखरी अभिवादन

¹² मेसेक घोणा सोवटा वाते तुमुक लिखनो छे, बाकीन कागदो एने शाईसी लिखलो नि जुवतो, बाकीन आस छे कि मे तुमरेनचा आवीस एने आमने सामने वाते कोरिस, जेरेसी तुमरी खुशी पुरी होयसे.

¹³ ते बी नेवाळली बहोनिशोन पुऱ्या तुसेक नमस्कार कोरे.