2 कुरीन्थियो 9 - बारेली पावरी

मदतोन अगवा

¹ हिमी तिनी सेवान बारामा यु चुखला माणसोन कोरता कोराय तेलो छे, मेसे काजे तुमुक लिखनेन गोरोज नि होय.

² काहाकि मेसेक तुमरा मोनोन तीयारी मालूम छे, कि जिनान वजेसी तुमरे बारामा मकीदुनीयान निवासीन सामने घोमंड देखला कि अखायान माणसे एक साल गोथा तीयार होयला छे, एने तुमरी खुशीसी एने घोना सोवटा काजे तीयार कोऱ्या.

³ बाकीन, मे भाशो काजे इनान कोरता मूकल्यु कि आमु तुमरा बारामा यो घोमंड देखाळ्या चो इनी वातोम वायबार नि होये; बाकीन जोसो मे कोयु तीयार रोयू.

⁴ ओसो नि होयो कि ओगर कुदू माणूस मकीदुनीया मायलु मारे साते आवे एने तुमु काजे तीयारीमा नि देखे, ती होय सोके कि इना भुरसान वजेसी आमु (यो नि कोयता कि तुमु) लाजवाय जाय.

⁵ इनान कोरता मे भाशो साते जी विनता कोरणे गोरोजोन सोमज्यु कि चे पेहेलेसी तुमरेनचा जाय, एने तुमरे खुशीन फोव जिनान बारामा पेहेलेसी वचन आपलो होतो, तीयार कोरीन मेके कि यो जोबरदोस्ती नि बाकीन मोनोसी फोवोन तोसा तीयार रोयू.

वारला दान आपन्या

⁶ बाकीन वात जी छे कि जू थुलोक वेरतेलु, चू थुलोक काटसे एने जे जादा वेरतेला चे जादा काटतेला.

⁷ होर एक जोना जोसा मोनोमा विचार कोरे तोसाच दान बी कोरे; नि कुर-कुर कोरीन एने नि दबाव सी, काहाकि परमेश्वर खुशीमा आपनेवावा पोर मोंग कोरतेलु छे.

⁸ परमेश्वर आखी भातीन दया घोनी सोवटी आप सोकतेलु जिनासी आखी वाते होर एक टेमे, आखो काय जो तुमु काजे गोरोज छे, तुमरे जुव रोये; एने होर एक वारला कामोन कोरता तुमरे जुव घोनो काय रोये,

⁹ जोसो लिखलो छे, “चू वेरवी देदू, चू गोरीब काजे दान आप्यू, तेरु धोरम कायमोन बोनलू रोयसे.”

¹⁰ आखरी चू वेरणे वावा काजे बीज एने खाणान कोरता रुटू आपलु छे, चू तुमु काजे बीज आपसे, एने तीना काजे फोव लागाळसे; एने धोरमोन फोवो काजे बोढावसे.

¹¹ तुमु आखा वातोमा आखा भातीन मोनमोकवान कोरता जे आमरे लारे परमेश्वरोन धन्यवाद कोरतेला छे, मालदार कोराय जाय.

¹² काहाकि इना सेवा काजे पुरो कोरणेसी नि निसतू चुखला माणसोन गोरोज पुरी होये, बाकीन माणसो तोरोफसी परमेश्वरोन बी जादा धन्यवाद होयतेलो.

¹³ काहाकि इना सेवा काजे कबूल कोरीन चे परमेश्वरोन महिमा सामने लावतेला छे, कि तुमु मसिहन वारली खोबर काजे सोमवीन मानीन तेरे स्वाधीन मा रोयतला एने तिंदरी एने आखान मदत कोरणेमा उद्धारता प्रगट कोरतेला छे;

¹⁴ एने चो तुमरेन कोरता प्रार्थना कोरतेला; एने इनान कोरता कि तुमरे पोर परमेश्वरोन घोनी सोवटी दया छे, तुमरी लालच कोरता रोयतेला छे.

¹⁵ परमेश्वरोन तेरा तीना दानोन कोरता जी वारू कोरायने सी बी जादा वारू छे, धन्यवाद.