2 कुरीन्थियो 8 - बारेली पावरी

पुरा मनसी दान आपनो

¹ हिमी हे भाशो आमु तुमु काजे परमेश्वरोन तीना दयान खोबर कोयतेला जो मकीदुनीयान मंडवी पोर होयो,

² दुखोन मोटली परीक्षामा तिंदरी मोटली खुशी एने जुदो काम गोरीबी तिंदरो मोनमोकवा जादा बोढ गोयो.

³ तिनान बारामा मारी जी गोवायी छे कि चे आपनी ताकतसी भोरीन, बाकीन ताकतसी बी बारथे मोनसी आप्या.

⁴ एने इना दानमा मे एने चुखला माणसोन सेवामा भागीदार होयनेन दयान बारामा आमु काजे घोळी-घोळी जुदी विनता कोऱ्या.

⁵ एने जोसा आमु आस कोरला होता, तोसी नि बाकीन चे प्रभू काजे एने परमेश्वरोन मोर्जीसी आमु काजे बी चे खुदो काजे आप देदा.

⁶ इनान कोरता आमु तीतुस काजे सोमजाड्या कि जोसो पेहेले चू सुरुवात कोरलु होतु, तोसोच तुमरे इचमा इना दानोन कामो काजे पुरो बी कोरले.

⁷ इनान कोरता तुमु होर एक वातोमा मतलब भुरसू, वचन, ग्यान एने आखा भातीन कोशिश, एने तिना मोंगोमा जो आमरेपोर मेकतेला छे बढतो जातलो, तोसोच इना दानोन कामोमा बी बोढता जावू.

येसु मसिही आपनु नमुनु छे

⁸ मे आग्यान रिती पोर ते नि, बाकीन दिसरा खुशीन वजेसी मे तुमरे मोंगोन खोरलाय काजे पारखनेन कोरीन कोयो कि,

⁹ तुमुक आपना प्रभू येसु मसिहन दया मालूम छे कि चू धोनवान होयीन बी तुमरेन कोरता गोरीब बोन गोयू, काहाकि तेरे गोरीब होयनेसी तुमु धोनवान बोन जावू.

¹⁰ इना वातो पोर मारी सला जी छे कि जो तुमरेन कोरता वारलो छे, चो एक सालोसी नीती निस्तु इना कामोन कोरीन नि बाकीन इना वातो काजे सोमोजनेमा बी पेहला होयला होता.

¹¹ इनान कोरता हिमी यो काम पुरो कोरु कि जोसी मोर्जी कोरणेमा तुमु तीयार होता, तोसीच आपनी-आपनी कोमायीन पोर बी कोरु.

¹² काहाकि ओगर मोनोन तीयारी होय ती दान तेरे अनसारे स्वीकार बी होयलो छे, जो तेरे जुव छे, नि कि तेरे अनसारे जो तेरे जुव नि होय.

¹³ यो नि कि दिसरा काजे आराम, एने तुमु काजे तोकलीत जोळे.

¹⁴ बाकीन बोराबोरीन विचारमा इने टेमे तुमरी बोढती तिंदरी कोमीमा काम आवे, काहाकि तिंदरी बोढती बी तुमरी कोमजूरीमा काम आवे, कि बोराबोरी होय जाय.

¹⁵ ओसो लिखलो छे, “जे जादा टूवू कोऱ्या तिंदरो काय जादा नि भोरायो, एने जे थुलोक टूवू कोऱ्या तिंदरो काय कोम नि निकव्यो.”

¹⁶ परमेश्वरोन धन्यवाद होये, जे तुमरेन कोरता जीत खुशी तीतुसोन मोनोमा मेक देदलु छे,

¹⁷ कि चू आमरो सोमवतेलु, मानतेलु बाकीन जादा खुशी होयीन चू तेरी मोर्जीसी तुमरेनचा गोयलु छे.

¹⁸ आमु तुमरे साते तिना भाशो काजे मुकली देदा जेरे नावे वारली खोबरोन बारामा आखा मंडवीमा पुग गोयलो होतो;

¹⁹ एने ओतरो नि, बाकीन चू मंडवीन लारे ठेराय गोयलो कि इना दानोन कामोन कोरता आमरे साते आवे, आमु जी सेवा इनान कोरता कोरतेला कि प्रभून महिमा एने आमरे मोनोन तीयारी सामने आव लागे.

²⁰ आमु इनी वातोमा हुशारीमा रोयतेला कि इना छुटकारान कामोन बारामा जेरी सेवा आमु कोरतेला, कुदू आमरेपोर गुणू नि लागाळनो जुवे.

²¹ काहाकि जी वाते निसतो प्रभून वाते नि बाकीन माणसो साते भोली छे, आमु तीनुन चिंता कोरतेला.

²² आमु तिंदरे साते आपना भाशो काजे मुकेल्ला छे, जीना काजे आमु घोळी-घोळी पारखीन घोणा सोवटा वातोन खुशीमा देख्यू, बाकीन हिमी तुमरे पोर तेरु मोटूत भुरसू छे, इनान रितीसी चू ओवी बी जादा खुशीमा छे.

²³ ओगर काहनुस तीतुसोन बारामा पुछे, ती चू मारू साती एने तुमरेन कोरता मुकोलला मोदतगार छे एने आमरा भाशोन बारामा पुछे ती चे मंडवीन मुकलला एने मसिहन महिमा छे.

²⁴ आखरी आपनो मोंग एने आमरो चो घोमंड जी तुमरे बारामा छे, मंडवीन ओगोव उबराखीन तीनु काजे देखाळ्यू.