2 कुरीन्थियो 7 - बारेली पावरी

खुशी एने पछतावू

¹ आखरी हे मोंगावा भाशो, काहाकि आपनेजू वायदू से जेतार कि यो वचन आपनु काजे जोळतलो, ती आवू आपु आपना खुदो काजे डील एने आत्मान आखो भुंडलो, चुखो कोरु, एने परमेश्वरोन बिक धोरता जायीन चुखला काजे पाको बोनावू.

² आमुक तुमरा मोनोमा जागू आपु, आमु नी कुदा साते अन्याय कोऱ्या, नि कुदा काजे बिगाड्या, एने नि कुदा काजे ठोग्या.

³ मे तुमु काजे गुणावा ठेरावनेन कोरता यो नि कोयतु काहाकि मे पेहेलेसी कोय देदलु छे कि तुमु आमरा मोनोमा ओसा बोस गोया कि आमु तुमरे साते मोरने जीवने कोरीन तीयार छे.

⁴ मे तुमु काजे जुदु हिंमतसी कोय रोयू, मेसे काजे तुमरे पोर जुदो घोमंड छे; मे शांतीसी मोर गोयलु छे आपना आखा खुदोमा खुशीसी जादा मेवायलु रोयतेलु छे.

⁵ काहाकि जेतार आमु मकीदुनीयामा आव्या ते बी आमरा डीलो काजे आराम नि जोळ्यो, बाकीन आमु चारू धोळे गोथो तोकलीत लीन फिरता होता; बारथे झोगळा होता, माहिय जुदा बिहाळनेवावा वाते होता.

⁶ ते बी कोमजुर वावा काजे शांती आपने वावु परमेश्वर तीतुसोन आवनेसी आमु काजे शांती आप्यू;

⁷ एने निस्तु तेरे आवनेसी बाकीन तेरी नीती शांतीसी बी जी तीना काजे तुमरे तोरोफसी जोळली होती, चू तुमरी मोर्जी तुमरा दुखे एने मोतोन कोरता तुमरी आवाजोन खोबर आमु काजे कोया जिनासी मेसेक ओवी बी खुशी होयी.

⁸ काहाकि हिमी तोक मे मारा चिट्ठीमा लिखीन तुमुक दुखी कोऱ्यु, बाकीन तीनासी पसतावू नि कोरतेलू जोसु कि पेहेले पसतावू कोरतू होतु, काहाकि मे देखलू कि तिनी चिट्ठीमा गोथो तुमु काजे दुख ते होयो बाकीन थुलिक वार तोक होतो.

⁹ हिमी मे खुशीमा छे बाकीन इनान कोरता नि कि तुमु काजे दुख होयो, बाकीन इनान कोरता कि तुमु तिना दुखोन वजेसी मोन फिराव्या, काहाकि तुमरो दुख परमेश्वरोन मोर्जीन अनसारे होतो कि आमरे तोरोफसी काहणी वातोमा नुकसान नि होयो,

¹⁰ काहाकि परमेश्वर भोक्तीन दुख ओसो पसतावू पोयदा कोरलु छे, जेरो ओसोर छुटकारू छे, एने ओवी तिनासी पोसतावू कोरणो नि पोळे बाकीन जोगोन दुखसी मोरोन पोयदा होयतेलो.

¹¹ हिमी देखू, इनी वातोसी कि तुमुक परमेश्वरोन भोक्तीन दुख होयो, तुमरेमा कोतरी खुशी एने पोछो बुलनो एने रीस, एने बिक, एने मोर्जी, एने आवाज, एने सजा आपनेन विचार पोयदा होयो? तुमु आखा भातीन यो तीयार कोरीन देखाळ्या कि तुमु इनी वातोमा चुखला रोये.

¹² ओवतेन मे यो तुमरेनचा लिखलो होतो चो नि ते तेरे वजेसी लिख्यू यु अन्याय कोऱ्यु, एने नि तिना वजेसी जिना पोर जुलूम कोरायलो होतो बाकीन इनान कोरता कि तुमरी खुशीन जी आमरेन कोरता छे, चो परमेश्वर सामने तुमरे पोर प्रगट होय जाय.

¹³ इनान कोरता आमु काजे शांती जोळी आमरी इनी शांतीन लारे तीतुसोन खुशीन वजेसी ओवी बी खुशी जोळी काहाकि तेरु जीव तुमु आखान वजेसी निवो-निवो होय जातलो छे.

¹⁴ काहाकि ओगर मे तेरे सामने तुमरे बारामा काहीन मोटायकी कोऱ्यु ती लाजवायलु नि बाकीन जोसो आमु तुमु काजे आखी वाते आखो छाचलीन छाचलीन कोय देदलु होतु, तोसोच आमरो मोटायकी देखाळने, तीतुसोन ओगोव बी खोरलो निकव्यो,

¹⁵ जेतार तुमु काजे आखा आग्याकारी होयनेन फोम आवतेली ती कोसा तुमु बिहीता एने कापता जाईन तेरी भेट लेदा, ती तुमरो मोंग तुमरे तोरोफसी ओवी बी बोढतो जातलो छे,

¹⁶ मे खुशीमा छे, काहाकि मेसेक होर एक वातोमा तुमरे पोर पुरू भुरसू छे.