2 कुरीन्थियो 6 - बारेली पावरी

सेवकाईन अनुभव

¹ आमु जे परमेश्वरोन सहकारी छे यो बी सोमजतेला छे कि तेरी दया जी तुमरे पोर होयी, तिनी काजे वायबार मा जाणे देवू.

² काहाकि चू ते कोये कि “आपनी खुशीन टेम तारी सोमवी लेदू, एने छुटकारान दाहळामा मे तारी मदत कोऱ्यु, देखू हिमी चू खुशीन दाहळू छे; हिमी चू छुटकारान दाहळू छे.”

पौलुसोन तोकलीत

³ आमु काहणी वातोमा ठूकर लागणेन कायबी मोकू नि आपतला काहाकि आमरी सेवा पोर कुदू गुणू नि लागाळे.

⁴ बाकीन होर एक वात परमेश्वरोन सेवक सारखो आपना वारला गुणे सामने लावे, घोना हिंमतसी, तोकलीतसी, गोरीबोमा, संकोटोमा.

⁵ चाबका खाणेसी, बोंदी होयनेसी, आयळने वावासी, मेहनतसी, जागता रोयनेसी, उपास कोरणेसी,

⁶ चुखलासी, ग्यानसी, धीर धोरीने सी, मोंगसी, पवित्र आत्मासी,

⁷ खोरला मोंगसी, खोरला वचन सी, परमेश्वरोन ताकतसी, धारमिकतान हत्यारसी जे जेवळे-डाखरे हातोमा छे.

⁸ आदर एने नी आदर सी, भुंडलो नाव एने वारला नावोसी कोदापी भूलवाडने वावा जोसा मालूम होयतला छे ते बी खोरलो छे;

⁹ ओनजानलान देखायनेसी, तीबी प्रसिद्ध छे; मोरणे वावान सारखो छे, एने देखू जीवतला छे; मार खाणे वावान सारकू छे बाकीन जीव सी माराय नी जातला;

¹⁰ दुख कोरणे वावान सारखो छे, बाकीन दाहळीन खुशी कोरतेला छे; भिकारी सारका छे, बाकीन जादा जोना काजे मालदार बोनाव देतला छे; ओसला छे जोसा आमरे पुठी काय नी होय ते बी आखो काय राखतला छे.

¹¹ हे कुरीन्थ, आमु उगाळीन तारे पुठी वात कोरला छे, आमरो मोन तुमरे भूनी उगाळलो छे.

¹² तुमरेन कोरता आमरा मोनोमा काय सोवाल नी होय, बाकीन तुमरेत मोनोमा सोवाल छे.

¹³ बाकीन आमरा पुऱ्या जानीन तुमु काजे कोय कि तुमु बी तेरा बोदलामा आपनु मोन उगाळ देवू.

आपनु परमेश्वरोन मंदीर छे

¹⁴ अविस्वास्या साते असमान जुवळामा जुपु काहाकि धारमिकता एने पापोन काय मेल-जुल? नीती विजावो एने आंदारलान काय संगती?

¹⁵ एने मसिहन बलियाल साते काय लगाव? नीती अविस्वास्या साते विस्वास्यान काय नातो?

¹⁶ एने मुर्त्यान साते परमेश्वरोन मंदीरोन काय रीसतो? काहाकि आमु ते जीवतला परमेश्वरोन मंदीर छे; जोसू परमेश्वर कोयलु छे, “मे तिंदरेमा बोसीस एने तिंदरेमा चाल्या फिऱ्या कोरिस; एने मे हेरु परमेश्वर होयीस, एने चे मारा माणसे होयसे.”

¹⁷ इनान कोरता प्रभू कोये, “तिंदरे इचमा मा गोथा निकवू एने ओलोग रोयू; एने भुंडली चीजो काजे मा छिमू, ती मे तुमुक स्वीकार कोरिस;.

¹⁸ एने मे तुमरू बास होयीस, एने तुमु मारा पुऱ्या एने पुरायटा होयसू यो आखा गोथू ताकत वावू प्रभू परमेश्वरोन वचन छे.”