2 कुरीन्थियो 4 - बारेली पावरी

वारली खोबरोन विजावो

¹ इनान कोरता जेतार आमरे उपर परमेश्वरोन ओसी दया होई कि आमु काजे जी सेवा जोळी ती आमु हिंमत नी छुळतला.

² बाकीन आमु लाजोन डूकायला कामो काजे छुळ देदा एने नी हुशारी चालता एने नी परमेश्वरोन वचनमा भेसोक कोरतेला; बाकीन खोरला काजे सामने लावीन परमेश्वरोन सामने होर एक माणसोन सद्वी विवेक बुद्धीमा तिंदरी भोलाई बोसाळतला छे.

³ बाकीन ओगर आमरा वारली खोबर प्रचार पोर पोरदु मेकायलु छे ती यो नाश होयने वावा पोर पोळलो छे.

⁴ एने तीनु अविस्वासन कोरता जिंदरी बुद्धी इना संसारोन भोगवान आंदवी कोर देदलु छे, काहाकि मसिह जू परमेश्वरोन प्रतिरूप छे, तेरे विजावान वारली खोबरोन विजावो तीनु पोर चोमके.

⁵ काहाकि आपनु काजे बी बाकीन येसु मसिह वारली खोबर प्रचार कोरतेला कि चू प्रभू छे; एने आपना बारामा यो कोयतेला कि आमु येसुन वोजेसी तुमरा सेवक छे.

⁶ इनान कोरता कि परमेश्वरुत छे, जू कोऱ्यु, “आंदारलामा गोथो विजावो चोमके, एने चू मोनोमा चोमक्यू कि परमेश्वरोन महिमान उवखनोन दिवू येसु मसिहन मुयो पोर विजावो होये.”

धुवान टाहरामा धोन

⁷ आपने जुव चो धोन धुवान ठाहरामा मेकलो छे कि यो मोल्यवान ताकत आपने तोरोफसी नी बाकीन परमेश्वर तोरोफसी ठेरे.

⁸ आपनु चारू धोळे गोथा दुखे भुगतला; बाकीन संकोटमा नी पोळतेला नी कोर सोके ओसला ते छे बाकीन निशाणी नी होयतला.

⁹ सताव ते होयतलु छे बाकीन त्याग नी कोरतेला पोळी ते जातला बाकीन नाश नी होयतला.

¹⁰ आपनु येसुन मोरनो काजे आपना डीलोमा होर एक टेम लीन फिरतला कि येसुन जीवन बी आपना डीलोमा देखाये.

¹¹ काहाकि आपनु जीवतलान हमेशा येसुन कोरता मोतोन होवाले कोराय जातला कि येसुन जीवन बी आपना मोरणे वावान डीलोमा प्रगट होये.

¹² इना रितीसी मोरोन ते मोरने वावा डीलोमा बी ओसोर मेकतलो छे एने जीवन तुमरे पोर.

¹³ इनान कोरता कि आपनोमा चू भुरसान आत्मा छे जेरे बारामा लिखलो छे; मे भुरसू कोरतेलू छे इनान कोरता मे कोयू आखरी, आमु बी भुरसू कोरतेला इनान कोरता कोयतेला,.

¹⁴ काहाकि आमु काजे मालूम छे कि जू प्रभू येसु काजे जीवाळ्यु, चू आपनु काजे बी येसुमा भागीदार सोमजीन जीवाळसे, एने तुमरे साते आपने सामने उबराख सके.

¹⁵ काहाकि आखा चीजे तुमरेन कोरता छे, काहाकि दया घोणा सोवटान लारे जादा होयीन परमेश्वरोन महिमान कोरता धन्यवाद भी बोढावे.

¹⁶ इनान कोरता आमु हिंमत नी छुळता; हिंमत आपनो बारथेलो स्वभाव मनुषत्व खोतम होय जातलो छे, ते बी आपने वावो माणसोन स्वभाव दाहळी दाहळीन नोवलो बोनतो जातलो छे.

¹⁷ काहाकि आपनो थुलोक वारोन कोरलो दुख आपनेन कोरता जुदो महत्वान एने ओमोर महिमा पोयदा कोरतेला;

¹⁸ एने आपनु देखली चीज नी बाकीन नी देखाये ओसली चीजो काजे देखता रोयतला; काहाकि देखे ओसली चीज थुलाक दाहळान छे, बाकीन नी देखायतली असला चीज ओमोरकाईन बोनली रोयतली.